A veăng thâu dêi Cơ quan teăng mâ kơpong Tây Nguyên, Rơ’jiu Việt Nam ai pơchuât rêm hâi, rơkong tơtô dêi nâ H’Nêč Êñuôl - đảng viên hơnăm ối nếo, cheăng pơchuât - tơplôu tơbleăng dêi mơngế Rơđế - xuân ối chuât rêm hâi. Ing rơkong tơpui tơbleăng tung Rơ’jíu, mâu troăng hơlâ, luât pơkâ dêi Đảng, Tơnêi têa troh a mâu pơlê ối hơngế, tíu rơ’jíu tơbleăng tơdjêp tuăn loi dêi mâu kuăn ngo ƀă Đảng. Nâ H’Nêč tối:

 “Xông kân tung môi pơlê hlê rơkong tơpui dêi kuăn ngo tơná gá kal môi tiah lâi. Rêm Tơdroăng nếo ai, rêm tơdroăng hơ’muăn xuân châ ngin mơ-eăm tơbleăng lo nâl kuăn ngo ăm vâi nhŏng o hlê troăng  pêi pro, troăng hơlâ dêi Đảng, Tơnêi têa troăng ƀă kuăn pơlê. Sap hâi mot Đảng, a hlo nhên hnoăng dêi tơná mơngế ki cheăng ‘na hlá tơbeăng, cheăng tơplôu tơbleăng tung rơ’jíu - hlối hâk tơngăm xua châ ‘no hnoăng rak tơniăn tuăn loi dêi pơlê ƀă Đảng”.

Tâng rơkong tơpui cho kông tơdjêp tuăn loi mê túa lĕm tro cho xiâm rêi ki tơrŭm. A cheăm Čuôr Đăng, kong pơlê Dak Lak nâ H’Pha Ayun - đảng viên hơnăm ối nếo pro Bí thư Đoân cheăm, Bí thư Đoân hneăng hdrối dêi cheăm, nôkố cho chuyên viên Ƀơrô Đảng ủy cheăm - đi đo kơhnâ mơhnhôk mâu hơnăm ối nếo pơtối rak vế túa lĕm tro dêi kuăn ngo, hlối rơtế mơnhông cheăng kâ tơmâng  tung kuăn pơlê. Nâ H’Pha ăm ‘nâi:

“Cheăm Čuôr Dăng hiăng mơjiâng 2 Kâu lăk ƀô̆ tŏn chêng koăng ƀă rơkong tơpui tơdjếi ăm mâu hơnăm ối nếo, vâ mâu vâi pú hlê tâ ‘na túa lĕm tro tŏn chêng, rơkong tơpui tơdjếi dêi hdroâng kuăn ngo tơná. Tâi tâng mâu vâi pú veăng tung kâu lăk ƀô̆ mê xuân chiâng tŏn chêng, hlê tâ rơkong tơpui tơdjếi. Ing mê, mâu vâi pú veăng trâm mâ, veăng ‘no hnoăng tơná tơbleăng troh lâp lu túa lĕm tro kuăn ngo troh ƀă tâi tâng mâu hơnăm ối nếo, droh rơtăm tung kong pơlê Dak Lak”.

Tơdrêng ƀă rak vế túa lĕm tro, hơnăm ối nếo dêi mâu pơlê a Dak Lak ối cho mâu ngế xông prôk ahdrối tung rơxông pơ’lêh nếo - môi tung mâu tơdroăng ki kal dêi Đảng - Tơnêi têa dế pêi kơtăng tơbleăng. Ngoh Lê Pas Tơr - Phŏ kăn hnê ngăn khu pơkuâ ngăn Đoân kong pơlê Dak Lak ăm ‘nâi, hơnăm ối nếo kuăn ngo ôh tá xê khên tơnôu loi a Đảng mê ối djâ troăng ahdrối tung pêi pro, tơdjêp tê tơmeăm pê lo ing chiâk deăng ing kơchơ mơdró điê̆n tưh.   

“Ngin hiăng mơjiâng mâu ngế veăng kơjo kum hnoăng cheăng pêi péa râ, hnê kuăn pơlê pro hlá mơ-éa tiô troăng hyôh măng. Mâu tôh pêi cheăng‘na kŏng ngê̆ tung kuăn pơlê pơtối rak pêi tơƀrê  nhên a kơpong hơngế hơngo. Ing mê, hơnăm ối nếo veăng ‘no hnoăng tung mơjiâng thôn pơlê nếo, kơphô̆ rơkê plĕng ƀă mơnhông krá tơniăn”.