Kơmăng lơ 27/7, a Tíu pêi cheăng Chin phuh, pôa Phạm Minh Chính - Ngế pro xiâm hnê ngăn Chin phuh pơkuâ hôp ‘na troăng hơlâ mơjiâng pro hngêi trung hriâm ăm mâu cheăm tơkăng kong, mê cho hngêi ối ăm mâu hok tro ƀă thái cô Ngế pro xiâm hnê ngăn tơnêi têa tối nhên, tơdroăng pêi pro mơgêi kơxô̆ 81 dêi khu xiâm kal kí cho troăng hơlâ ki kân, ai pơxúa lĕm khât.

Tung pơla hơnăm 2025-2027, kô mơjiâng pro 248 toăng hngêi trung phôh thong ai tíu kâ koi ối pơtê, hngêi ai tíu kâ ối pơtê kơhâi dế râ má môi - má péa a 248 to cheăm tơkăng kong ƀă tơnêi. Ngế pro xiâm hnê ngăn tơnêi têa pơkâ thế tơbleăng pêi rĕng, vâ pê klêi ki iâ má môi 100 to hngêi trung hdrối mot hơnăm hriâm nếo lơ 10/8/2026.

Pakĭng mê, pơkâ thế mâu cheăm kong pơlê thâ séa ngăn pơkâ hdró, mơhno tíu tơniăn tơnêi, on tơhrik, têa, hyôh phôn... pêi ai pơxúa tung mơjiâng pro. Kố cho tơdroăng pêi pro kăl rĕng pêi vâ mơnhông rế hên mơngế cheăng, mơdêk kuăn pơlê hlê plĕng, pro hlâu ăm hok tro hriâm ki ối a kơpong hơngế hơngo, veăng kring vế pơlê pơla  ƀa tíu tơkăng kong dêi Tơnêi têa.