Tơpui pơxiâm po hneăng hôp tơpui tơno, pôa Trần Thanh Mẫn, Kăn xiâm hnê ngăn Kuô̆k hô̆i mơnhên tối khât tơdroăng ki Khu xiâm ngăn liăn ngân ƀă mâu kơ koan tơrŭm cheăng tơkŭm po hôp tơpui tơno Mơjiâng ƀă xúa Tíu pêi cheăng Kong têa ê – Pâ thế ăm Việt Nam vâ mơdêk tơrŭm cheăng pơla Việt Nam ƀă Swiss; tối tiah kố, kố cho tơdroăng cheăng ai pơxúa khât tung rôh lăm pêi dêi hnoăng cheăng dêi Khu kăn xiâm Việt Nam troh a Swiss.

Tối nhên, ki ai hlâu, ki pơxúa dêi péa tơnêi têa xuân ối ai hên, Kăn xiâm hnê ngăn Kuô̆k hô̆i pơkâ thế, Kăn teăng mâ Việt Nam a Swiss ƀă khu kăn xiâm dêi Việt Nam pakĭng Khu lâp kong têa, Khu tơrŭm Tê mơdó lâp plâi tơnêi ƀă mâu kơ koan kong têa ê ki ê a Geneva kô tơrŭm krá tơniăn tâ nếo ƀă mâu kơ koan ki ai tơdjâk dêi Swiss, mâu khu tơrŭm kong têa ê a Swiss vâ teăm tŏng gum mâu tơdroăng ki xơpá tung chêh pro mâu hlá mơ-éa, tơrŭm cheăng hiăng kĭ pơla péa tơnêi têa, pro tơ’lêi hlâu vâ rế hía rế ai hên tâ mâu khu ki ‘no liăn pêi cheăng kong têa Swiss a Việt Nam.