A hneăng hôp, mâu kăn teăng mâ tơkŭm tơpui tơno, veăng tơpui tung tơdroăng ki ai khât nôkố mơnhông ôm hyô a rêm kong pơlê ƀă tơdroăng ‘na mơnhông ki rơdêi rêm kơpong vâ mơjiâng tơmeăm ôm hyô ki má môi, hên kế tơmeăm. Tung mê, Phú Yên ai kĭng têa kơxĭ xŏn 189 km, hên tíu hum, kung king, ai Tơmeăm ron ton nah tơnêi têa ki má môi cho gành Đá Đĩa ƀă hên tơmeăm roh ton nah khôi túa lĕm tro ron nah hiăng ton. Dak Lak ki phá tơ-ê ƀă ôm hyô ngăn loăng pơlái kong kế, khôi túa lĕm, mâu kơdrum kơphế kân rơdâ, xí têa kân ƀă tíu mơhno khôi túa lĕm chêng koăng Tây Nguyên. Drêng tơkŭm chiâng môi Phú Yên ƀă Dak Lak chiâng môi, tơdjêp  ki rơdêi ‘’têa kơxĭ – kong’’ thăm chiâng kal.

Pôa Đặng Hoàng Vũ, Kŏng ti Sao Mai Beach Resort, a Phú Yên tối, tơdroăng tê mơdró pơla 2 kong pơlê ối pá puât, tơdjêp troăng klông tá hâi tơxâng teăm tơdrêng tâng pơchông ƀă tơdroăng kal vâ prôk lăm, pơto tơmeăm khoăng ƀă pơto tơmối, cho tơdroăng ki mơdât kal pro tơniăn vâ mâu tơmeăm ki rơdêi châ rĕng tơdjêp:

‘’Kal thế mơdêk ƀă po rơdâ tâ vâ troăng dêi Dak Lak troh ƀă Phú Yên ƀă Phú Yên troh ƀă Dak Lak kô tơ’lêi hlâu má môi, tơniăn châ tơdroăng pơto kuăn mơngế, tơmeăm rĕng má môi. Ƀă kal thế ai tơdjêp ƀă mơjiâng mâu tơmeăm ki phá tơ-ê, trâu hơhngế ‘na ôm hyô, ki má môi dêi péa tíu cheăng tơdjêp ƀă dêi pó vâ mơjiâng môi um tŭm tâi tâng ‘na ôm hyô, djâ troh tơdroăng ki châ tâ hôm má môi’’.

Kăn teăng mâ xuân pơkâ hên rơkong ki tơdjâk troh mơjiâng mâu tour, tơdroăng prôk, tơdroăng tơdjêp pơla 2 kong pơlê; troăng hơlâ tŏng gum dêi pó vâ rơtế mơdêk ôm hyô mơnhông mơdêk. Pôa Hồ Văn Tiến, Kăn hnê ngăn Khu tơrŭm cheăng Ôm hyô Phú Yên tối ăm ‘nâi, tung pơla Phú Yên ƀă Dak Lak hbrâ tơtro má môi, kơvâ ôm hyô 2 kong pơlê thăm mơ-eăm hên tâ vâ djâ ôm hyô chiâng kơvâ cheăng kâ ki xiâm.

‘’Ngin kô tơkŭm po mâu tơdroăng tơdjêp trâu hơhngế tâ, thăm tơpui tơno mâu khu tơmối pơla Phú Yên ƀă Dak Lak thế hên tâ hdrối, mơ-eăm châ péa xôh. Ai troăng hơlâ tŏng dêi pó ‘na troăng hơlâ kơdroh yă tơtro, tŏng gum tơbleăng tơmeăm ăm dêi pó, tơrŭm pơtâng tối, tơbleăng ƀă mơhnhôk mơ’no ôm hyô, ôh tá xê a tung tơnêi têa mê kô tơkŭm po tơrŭm kong têa ê, ahdrối cho péa kong têa Sinuâ ƀă Hàn Quốc, péa cho kong pơlê ki ai hên tơmối vâ troh ƀă kong pơlê hên tâ’’.

Môi tung mâu tơdroăng ki kal xuân châ 2 khu tơrŭm cheăng tơpui tơno, môi tuăn tung roh kố, mê cho troăng tơrŭm chiâng môi tíu pêi cheăng ƀă tơdroăng pêi cheăng dêi khu klêi kơ’nâi tơmot chiâng môi kong pơlê. Pơtối mê, tiô tối hdrối khu kô tơmot chiâng môi ‘na tơdroăng tơkŭm po pêi cheăng, khu pơkuâ, khu tơrŭm cheăng ƀă mâu chi hô̆i ki ối tung khu, tơniăn tơdroăng tơkŭm chiâng môi troh tơdroăng hnê mơhno dêi péa kăn pơkuâ 2 kong pơlê. Jâ Nguyễn Thụy Phương Hiếu, Phŏ Kăn pơkuâ Khu pơkuâ ‘na khôi túa lĕm tro, Tơ’noăng ivá ƀă Ôm hyô Dak Lak tối troăng tơmiêt:

‘’Xuân pói vâ péa khu tơrŭm mơjiâng châ mâu troăng tơrŭm chiâng môi ƀă dêi pó, xua drêng péa kong pơlê tơkŭm chiâng môi ƀă dêi pó, péa khu tơrŭm chiâng môi ƀă dêi pó mê péa khu kô tơmot chiâng môi ƀă pêi pro tơdroăng pêi cheăng hlối. Khu tơrŭm dêi péa kong pơlê kô rơtế dêi pó mơjiâng châ mâu tơmeăm tơdjuôm ƀă tơtrŏng tơmeăm ôm hyô ‘na kơmăng. Ai mâu pơkâ ‘na troăng hơlâ vâ mâu khu tê mơdró mơnhông mơdêk’’.

‘Na troăng pêi mơhnhôk ôm hyô, Khu tơrŭm Ôm hyô kong pơlê Dak Lak ƀă Phú Yên môi tuăn mơjiâng tơmeăm ki má môi, ôm hyô ‘na kơmăng, pơkâ tŏng gum troăng hơlâ tŏng gum khu tê mơdró; Tơdroăng tŏng gum yă ăm khu tê mơdró 2 kong pơlê vâ tơdjêp mơđah tơbleăng troh 2 kơchơ mơdró Hà Nội, Hồ Chí Minh ƀă kong têa ê...

Hdrối mê, Khu tơrŭm Ôm hyô Phú Yên hiăng ai péa hâi séa ngăn tơmeăm ôm hyô, tíu troh dêi Dak Lak vâ la ngiâ mơjiâng tơmeăm ôm hyô tơdjêp ‘’ têa kơxĭ ngiêt ƀă kơpong kân rơdâ’’. Khu tơrŭm ôm hyô kong pơlê Dak Lak xuân hiăng môi tuăn pơkâ pêi lăm séa ngăn tơmeăm ôm hyô a Phú Yên a tung dế măng tĭng khế 7 la ngiâ vâ hbrâ mâu tơdroăng xiâm mơjiâng mâu tơmeăm ôm hyô tung kong pơlê klêi kơ’nâi tơmot chiâng môi.

Ƀă mâu tơkêa ƀă pơkâ tơrŭm hên tơdroăng tơkêa, tơdroăng ki kal kố mơnhên môi troăng prôk ki kal tung tơdroăng mơdêk ôm hyô Phú Yên ƀă Dak Lak mơnhông mơdêk ó rơdêi ƀă krá tơniăn, mơjiâng môi kơpong ôm hyô ki má môi kơpong peăng Tơdế tơnêi têa – Tây Nguyên ƀă tung lơgât ôm hyô Việt Nam tung la ngiâ./.