Kố cho môi tung mâu tơdroăng Pơkâ ki kal nếo châ mâu kăn Hô̆i đong hnê ngăn kong pơlê Dak Lak tơbleăng a hneăng hôp ki kal rôh má 12, Hô̆i đong hnê ngăn kong pơlê hneăng 10, hơnăm 2021 – 2026. Tâi tâng kơxô̆ liăn ‘no ăm tơdroăng ki bro 1.200 toăng hngêi ối ăm rơpŏng kơtiê, xơpá ‘na hngêi ối, rơpŏng châ tơnêi têa kum, rơpŏng kuăn pơlê hdroâng kuăn ngo a kong pơlê Dak Lak cho 96 rơtal liăn.

Tung mê, kơxô̆ liăn ‘no 60 rơtal xua Khu xiâm ngăn Kŏng an mơhnhôk, liăn kong pơlê Dak Lak ‘no cho 24 rơtal. 12 rơtal liăn ki u ối cho xua Kŏng an kong pơlê Dak Lak tơrŭm rơtế ƀă khu râ Đảng, kăn pơkuâ mâu tơring, pơlê kong krâm, pơlê kong kơdrâm xo ing mâu liăn kong pơlê ƀă mâu lăn veăng tơlo ing pơlê pơla ki ê.

A hneăng hôp tơdroăng kal rôh má 12, Hô̆i đong hnê ngăn kong pơlê Dak Lak hneăng 10, mâu kăn hiăng môi tuăn tơbleăng “Pơkâ tŏng kum liăn bro 1.200 toăng hngêi ối ăm rơpŏng kơtiê, xơpá ‘na hngêi ối, rơpŏng ki châ tơnêi têa, rơpŏng kuăn pơlê hdroâng kuăn ngo a kong pơlê Dak Lak hơnăm 2024”, ƀă kơlo kum 24 rơtal ing liăn ngân kong pơlê.