Kong tôu ó, khăng khuô̆t ton hâi pro tơdroăng ki vâ xúa on tơhrik a Dak Lak tâk hên. Apoăng khế 4/2024, kơmăi mơ’no dêi troăng kơxái châ lối 510MW, tâk 27% tâng vâ pơchông ƀă khế kố hơnăm hdrối. Kơnôm rĕng hbrâ rơnáu mâu troăng hơlâ hbrâ ví, troăng kơxái on tơhrik kong pơlê Dak Lak ối mơ’no on tơhrik tơniăn, rak vế tŭm on tơhrik vâ mơ’no pơtối hlối ăm kuăn pơlê.

Mâu tơdroăng ki xiâm tung pơkuâ ngăn kih thuât hiăng pêi pro klêi tơƀrê ƀă tơkâ luâ kơlo pơkâ châ pơcháu. Ing apoăng hơnăm troh nôkố, mâu tíu pêi cheăng ‘na kơvâ on tơhrik tung kong pơlê hiăng lăm séa ngăn, tơleăng mơnhên 158 tíu ki ai tơdjâk troh on tơhrik.

A Rôh hôp mơgêi hnoăng cheăng pơkuâ ngăn kih thuât nếo a chê kố, pôa Trần Tấn Phùng – Kăn phŏ pơkuâ Kŏng ti on tơhrik Dak Lak pơkâ thế mâu tíu pêi cheăng pơtối mơdêk hiâk mơno pôu râng, séa ngăn tung tơdroăng ki ai khât vâ tơkŭm po pêi pro tro mâu hnoăng cheăng, rak vế tơniăn bê tŭm on tơhrik vâ ‘no ăm kuăn pơlê.