Khu pơkuâ Hnê hriâm ƀă Hnê mơjiâng kong pơlê kô thế 1.640 kăn ƀô̆ veăng ngăn tơ’noăng, séa ngăn, châm điêm tơ’noăng... Kŏng an kong pơlê ăm 136 kăn ƀô̆, mâu lêng ƀă 2 toăng rơxế kum ăm tơdroăng pơcháu đê tơ’noăng. Khu pơkuâ ngăn pơkeăng khăm pơlât xuân pơtroh lối 20 kăn ƀô̆ khăm pơlât a tíu tơ’noăng.

Pôa Trần Sĩ Thành, Phŏ Kăn pơkuâ Khu pơkuâ Hnê hriâm ƀă Hnê mơjiâng tối ăm ‘nâi, tơdroăng vêh hriâm pơtâp ƀă hbrâ tơmeăm khoăng châ pêi pro sap ing apoăng hơnăm vâ tơniăn pơkâ tơdroăng tơ’noăng châ lối 98%. Nôkố mâu hngêi trung hiăng kêi đeăng séa ngăn kơbong tơ’noăng, xing xoăng kăn ƀô̆ ngăn tơ’noăng, séa ngăn kơmăi camera séa ngăn ƀă hbrâ tơpâ on chếo. Mâu kơvâ cheăng dế tơrŭm vâ hneăng tơ’noăng tơniăn, kơtăng, tro pơkâ.