Pơla kong tô pơ-oh dêi rơnó mơdrăng, tâng a tơdế kơdrum kơphế. Thiê̆u tă Nguyễn Phúc Thuận, Đông tơkăng kong Dak Lao, Mố đô̆i gak tơkăng kong dêi kong pơlê Dăk Nông hnê nhên ăm kuăn pơlê thôn Dăk Thọ, cheăm tơkăng kong Dăk Lao, tơring Dak Mil kih thuât rak ngăn loăng plâi rơnó tô mơdrăng ƀă hbrâ pêt loăng plâi a rơnó mêi. Hơnăm kố kong tô ó, lăm troh a hngêi ngế ki lâi, ngoh xuân hnê pơchân vâi krâ nhŏng o tôh têa thế ‘nâi kơdĭng, xúa krâ kơvâ vâ ai têa xúa troh mơ’nui rơnó tô mơdrăng.

Pơla kố, loăng kơphế hlo ai pơreăng kâ ‘nhiê, mâu túa pơreăng mê, ki hên cho ôa rơbông, ngoh rơtế ƀă mâu kăn ƀô̆ ngăn ‘na pêi chiâk hnê kuăn pơlê túa hbrâ mơdât pơreăng ti lâi vâ châ tơƀrê. Hơnăm kố yă kơphế to kơnâ, hên kuăn pơlê dế tơmiât vâ pêt nếo. Ngoh đi đo hnê pơchân kuăn pơlê thế rah xo hdrê ki lĕm, ngăn nhên, pôi tá rôe hdrê ki vâi tí tăng tê pro tê hên ôh tá lĕm.

Châ Đông mố đô̆i tơkăng kong Dak Lao rah lăm veăng ƀă mâu chi ƀô̆ thôn Dăk Thọ, cheăm Dak Lao, thiê̆u tă Nguyễn Phúc Thuận đi đo mơ-eăm pêi cheăng tâi ivá tơná vâ veăng ‘no hnoăng pơ’lêh tuăn tơmiât hriăn rơkê tung pêi cheăng, mơnhông tung cheăng kâ rêh ối dêi kuăn pơlê.

“Vâ tơniăn ăm hdrê pêt, mơnăn păn tơtro, mê a hiăng tăng ‘nâi, tơrŭm ƀă chi ƀô̆ kuăn pơlê cheăm dêi tơring tăng ‘nâi tíu lâi ai hdrê lĕm tơtro vâ tối ăm kuăn pơlê rôe pêt. Djâ mâu sinh viên tơpui tơno ƀă kuăn pơlê hnê túa pêi ki tơtro vâ kuăn pơlê pêi ƀối. A xuân khên pâ thế mâu kăn ƀô̆ lăm troh a pơlê, thôn vâ veăng kum hnê  kuăn pơlê ki xơpá’’.

Pôa Nguyễn Khắc Chinh, Bí thư chi ƀô̆ thôn Dak Thọ, cheăm tơkăng kong Dak Lao, tơring Dak Mil, kong pơlê Dak Nông ăm ‘nâi, sap hâi thiê̆u tă Nguyễn Phúc Thuận lăm troh veăng cheăng ƀă mâu chi ƀô̆, hiăng kum ăm thôn hên tơdroăng cheăng ki pơxúa. Mâu rôh hôp chi ƀô̆ tơpui hên tâ. Hên tơdroăng pơkâ pêi ai pơxúa ƀă tơdroăng rêh ối, pêi cheăng kâ châ chi ƀô̆ tối tơbleăng pêi tơƀrê. Mâu đảng viên tung chi ƀô̆ xuân hlê nhên tâ hnoăng cheăng, tơdroăng cheăng pêi dêi tơná.

Hên đảng viên hiăng mơ-eăm tâ tung tơdroăng mơnhông cheăng kâ vâ pro troăng ahdrối ăm kuăn pơlê hlo pêi ƀối. Hên rơpŏng kuăn pơlê ing mê hiăng khên pơ’lêh hdrê pêt, hên túa pêt hdrê loăng plâi, mơnăn păn tơdroăng rêh ối dêi kuăn pơlê rế xông tơƀrê. Thôn ối hên rơpŏng kơtiê xơpá, thiê̆u tă Thuận rơtế ƀă chi ƀô̆ thôn cho ki xiâm mơhnhôk kuăn pơlê, khu râ  veăng tơlo liăn, pro 4 toăng hngêi tuăn pâ.

Tiô pôa Nguyễn Khắc Chinh, ing tơdroăng cheăng pêi dêi thiê̆u tăng Thuân pro ăm kuăn pơlê a tíu tơkăng kong thăm rế loi nhoăm pâ khât kơ mâu lêng krâ kơlŏng ngiât.

“Pôa Thuận cho môi ngế kăn ƀô̆ hơnăm ối nếo, kơhnâ, mơ-eăm tung tŭm tơdroăng cheăng. Tối ‘na kơxô̆ pêi cheăng kâ xuân môi tiah kuăn pơlê tung thôn tung tơdroăng pêi chiâk deăng, rak vế pêi pro tro ‘na tơdroăng veăng kring tơniăn tíu tơkăng kong. Tơxâng hâk nhoăm pâ’’.

Kơhnâ mơ-eăm pêi cheăng rơtế ƀă vâ “hnê puk pak ah kuăn pơlê loi”. Kum kuăn pơlê a tíu tơkăng kong pơ’lêh tuăn tơmiât túa pêi cheăng, mơnhông rêh ối cho hnoăng cheăng pêi dêi mâu đảng viên tíu tơkăng kong châ djâ veăng hôp pêi cheăng ƀă mâu chi ƀô̆ thôn, pơlê a tíu tơkăng kong Dak Nông. Mâu túa pêi cheăng kâ môi tiah mơhnhôk, veăng kum kuăn pơlê păn ro vâ ai kuăn, pêt kơphế, plâi sầu riêng, tiu krúa lĕm lơ mâu túa pêi cheăng rak tơniăn rêh ối pơlê pơla môi tiah kuăn păn dêi đông mố đô̆i tơkăng kong, hnê pơlê  tah lôi tơdroăng rĕng xo on veăng tá hâi tro hơnăm... hiăng tơmâng khât tơdroăng cheăng kâ, rêh ối dêi pơlê cheăm.

Jâ H’Xuân, kăn phŏ hnê ngăn Đảng pơkuâ hnê ngăn tơring Dak Mil, kong pơlê Dak Nông ăm ‘nâi, Mố đô̆i tơkăng kong ăm kăn ƀô̆ đảng viên lăm pro kăn phŏ bí thư cheăm, veăng hôp, pêi cheăng ƀă mâu chi ƀô̆ mâu thôn pơlê a tíu tơkăng kong tơring ai pơxúa khât hlối tơƀrê.

“Ƀă mâu mố đô̆i gak tơkăng kong tung lâp tơring mê xuân hiăng mơjiâng pro hên túa, tơdroăng châ hnê tối lâp lu. Mâu tơdroăng ki mê châ tơbleăng troh lâp lu, ƀă kuăn pơlê tung lâp tơring khĕn kơdeăn. Veăng ‘no hnoăng mơjiâng pơkê xiâm Dak Mil, malối cho pêi pro mâu pơkâ dêi Đảng ‘na mơnhông cheăng kâ rêh ối ƀă mơjiâng kring tơniăn, cheăng lêng tung tơring‘’.

Đăi tă Bùi Đức Chính, Kăn phŏ ngăn Đảng dêi Mố đô̆i tơkăng kong Dak Nông ăm ‘nâi, pêi pro hnê mơhno dêi khu kăn Đảng kong pơlê, tiô hnê mơhno dêi Khu kăn Đảng ủy Mố đô̆i gak tơkăng kong, Mố đô̆i tơkăng kong Dak Nông hiăng tơbleăng inâi 57 ngế đảng viên veăng hôp pêi cheăng a 55 chi ƀô̆ thôn, pơlê; 146 ngế đảng viên pơkuâ 367 rơpŏng kuăn pơlê a kơpong tơkăng kong. Mâu đảng viên đông mố đô̆i tơkăng kong hiăng pơtối rak tro hnoăng cheăng tăng ‘nâi plĕng, kum râ ủy, chi ƀô̆ thôn, pơlê pơtối rak vế pêi tro luât, pêi tơƀrê mâu rôh tơrŭm cheăng dêi chi ƀô̆.

Ƀăng mâu túa pêi pro kuăn pơlê rơkê, mâu tơdroăng cheăng pêi ai pơxúa ƀă tơƀê hiăng veăng kum mơnhông rêh ối dêi kuăn pơlê, thăm mơdêk tơrŭm môi tuăn dêi rơpó pơla mâu lêng ƀă kuăn pơlê a tíu tơkăng kong. Ối achê kuăn pơlê, tơ’nôm ivá rơdêi tung kuăn pơlê cho xiâm vâ Mố đô̆i tơkăng kong Dak Nông kring gak tơniăn pơlê pơla cheăm bêng ƀă rế ton rế mơnhông tơƀrê.