Tiô tơdroăng hneăng hôp, kơxo lơ 15/5, Kuô̆k hô̆i tơpui tơno a hngêi hôp kân ‘na Tơdroăng tơkêa bro Luât on tơhrik kơtâu ƀă trếo tik nik (‘mâi rơnêu). Luât On tơhrik kơtâu ƀă trếo tik nik châ tơbleăng hơnăm 2008, klêi 17 hơnăm pêi pro hiăng hlo hên tơdroăng ki ôh tá tơniăn, tá hâi tơxâng pơkâ nôkố mơnhông tơnêi têa nôkố, tá hâi mơhno tŭm mâu tơdroăng pói vâ lâp plâi tơnêi ki Việt Nam cho khu tơrŭm... Xua mê, tơdroăng ‘mâi rơnêu luât cho kal khât vâ Việt Nam tơxâng pơkâ mơjiâng on tơhrik kơtâu ƀă trếo tik nik tung pơla tơdroăng rêh ối nếo, ki rơhêng vâ tối cho vêh po tơdroăng on tơhrik kơtâu ƀă trếo tik nik, djâ mâu hngêi kơmăi on tơhrik trếo tik nik Ninh Thuận 1 ƀă 2 tung pêi pro hneăng hơnăm 2030 – 2035.

Xuân tung kơxo kố, Kuô̆k hô̆i tơmâng pơtâng tối tung Mơ-éa tơbleăng ƀă Tơbleăng séa ngăn Tơdroăng tơkêa bro Luât ‘mâi rơnêu, tơ’nôm mâu troăng dêi Luât Tơleăng tơdroăng xôi pơkuâ tơnêi têa; Tơdroăng tơkêa bro Luât ‘mâi rơnêu, tơ’nôm mâu troăng dêi Luât Tơbleăng mơ-éa pơkâ Luât; Mơ-éa chêh hdrối ‘mâi rơnêu, tơ’nôm mâu troăng dêi Tơdroăng pơkâ hneăng hôp Kuô̆k hô̆i. Peăng kơxê, Kuô̆k hô̆i tơpui tơno a Tôh ‘na: Tơdroăng tơkêa bro Luât veăng khu gâk kring hơniâp lĕm dêi Khu lâp kong têa; Tơdroăng tơkêa bro Luât liăn ngân Tơnêi têa (‘mâi rơnêu)...