Nâ Phạm Thị Phương Đông – kê̆ toăn Hngêi trung râ má môi Y Ngông, pơlê kong krâm Ƀuôn Ma Thuột (kong pơlê Dak Lak) hiăng 5 hơnăm kố rêh ối tơdjuôm ƀă tơdroăng châi kơkốu. Rế pêi cheăng a hngêi trung hriâm, rế rêm hneăng rêm măng tĭng pơlât kơkốu a Hngêi pơkeăng kân pơlê kong krâm Ƀuôn Hồ, nâ cho ngế ki pơxôk ‘na hiêm mơno dêi rơpŏng kŭn drêng mâi nâ pêi chiâk deăng ƀă lăm pêi cheăng vâi a hơhngế. Tơdah phĭu kơdĭng liăn kơnâ 5 rơtuh liăn ing tơdroăng ‘’Búa liềm vàng’’, nâ Đông ôh tá kâi kơtôa ki rơrêk tung hiêm mơn:

‘’Phĭu kơdĭng liăn búa liềm vàng nôkố kum á o hên ‘nâng, á o rôe pơkeăng xua mê á o mơnê hên. Kơnôm mê á o kơdroh ki pá puât tâ, ai ivá vâ kâi ƀă pơreăng’’.

Tơdroăng dêi rơpŏng Y K’Lơn Niê ối a ƀuôn H’Né, cheăm Ea Yông xuân cho mơnhên tơdroăng ki châ tơƀrê păng ‘nâng dêi tơdroăng ‘’Phĭu kơdĭng liăn Búa liềm vàng’’. Ƀă péa ngế kuăn ối kŭn hơnăm dế lăm hriâm, on veăng ngoh nâ bu ai 2 sao klâng ƀă môi iâ tơnêi pêt kơphế. Tơdroăng ki hngăm ‘na cheăng kâ pơkâ thế ngoh Y K’Lơn thế lăm pêi cheăng vâi a hơhngế, ƀă nâ H’Puê Niê – kơdrâi ngoh – pro kŏng nhân kơtăn hngêi 10 km. Hơnăm 2024, rơpŏng ngo châ khu pơkuâ hnê ngăn cheăng Đảng pơlê kong krâm Ƀuôn Hồ diâp phĭu kơdĭng liăn kơnâ 12 rơtuh liăn. Ing kơxô̆ liăn kố, nâ H’Puê rôe 4 to chu hdrê. Klêi kơ’nâi 4 khế rak ngăn, khu chu apoăng djâ ăm pêi lo châ 24 rơtuh liăn. Kơnôm mê, rơpŏng nâ ai liăn vâ pơtối po rơdâ păn mơnăn mơnôa, tơniăn tơdroăng rêh ối.

‘’Á mơnê mâu ngoh nâ hiăng kum á tung tơdroăng păn chu. Ki nhên cho Khu pơkuâ hnê ngăn cheăng Đảng pơlê kong krâm hiăng tŏng gum phĭu kơdĭng liăn ‘’Búa liềm vàng’’ ƀă kơxô̆ liăn 12 rơtuh liăn vâ rơpŏng á rôe chu păn. Troăng pêi păn chu kố tơtro ƀă tơdroăng rêh ối dêi rơpŏng ngin. La ngiâ, rơpŏng ngin kô pơtối mơnhông păn chu vâ tơdroăng rêh ối tơniăn tâ’’.

        Parŏng mâu phĭu kơdĭng liăn mê cho tơdroăng tơdjuôm ivá ôh tá pơ’lok laga krá dêi rêm kăn ƀô̆, đảng viên. Nâ Nguyễn Thị Trúc dế pêi cheăng a Khu pơkuâ pơtâng tối ƀă Mơhnhôk kuăn pơlê Khu pơkuâ hnê ngăn cheăng Đảng pơlê kong krâm Ƀuôn Hồ tối ăm ‘nâi, rêm ngế tung kơ koan pơrá vâ kơdĭng liăn, ai drêng 5 rơtuh, 3 rơutuh, lơ bu to hrĭng rơpâu liăn, tiô a tơdroăng pơkâ dêi rêm ngế, vâ kô chiâng tơdjuôm ivá tŏng gum mâu ngế ai tơdroăng rêh ối pá puât.

‘’Á hlo tơdroăng kố cho kơnâ trâu hơhngế, cho rơkê ‘nâng. Tung tơdroăng pêi ngin veăng tơlo kế tơmeăm khoăng kŭn lag hên ki kơnâ ƀă mâu đảng viên ai tơdroăng rêh ối pá puât, ƀă xuân ing tơdroăng kố, mâu đảng viên ai tơdroăng rêh ối pá puât kô pêi cheăng kâ rơkê, hlŭn ing kơtiê ƀă mơ-eăm xông tơtêk’’.

Pôa Nguyễn Văn Út – Kăn pơkuâ pơtâng tối ƀă Mơhnhôk kuăn pơlê Khu pơkuâ tơdroăng cheăng Đảng pơlê kong krâm Ƀuôn Hồ, kong pơlê Dak Lak tối ăm ‘nâi, troăng pêi ‘’Phĭu kơdĭng liăn Búa liềm vàng’’ châ pêi pro sap hơnăm 2023, tiô hiêm mơno hriâm tâp ƀă pêi tiô rơkong hnê Pôa Hồ, rêh kơdĭng ƀă kum dêi pó. Kăn ƀô̆, đảng viên veăng tơlo xêh vâ mơjiâng kơxô̆ liăn kơdĭng, kum mâu đảng viên trâm pá puât, ki rơhêng vâ tối cho mâu đảng viên hdroâng kuăn ngo, rêh ối a kơpong hơhngế hơhngo. Nguyễn Văn Út tối:

‘’Ki kal má môi tung tơdroăng diâp mê ai 3 pơlê cho ƀuôn Tring 1,2,3 dêi bêng An Lạc, a mê xuân ai đảng viên cho mơngế kuăn pơlê hdroâng kuăn ngo pá puât làa vâi ôh tá vâ tơdah phĭu liăn kơdĭng kố ƀă vâi pơkâ diâp ăm đảng viên mơngế hdroâng kuăn ngo a mâu cheăm ai tơdroăng rêh ối pá puât tâ. Ing tơdroăng hriâm tâp ƀă pêi tiô troăng tơdjâ hiêm mơno lĕm Pôa Hồ, ƀă hiêm mơno dêi kăn ƀô̆ đảng viên pâ nhuô̆m dêi pó, kum dêi pó hiăng mơjiâng ivá troh lâp lu tung kăn ƀô̆ đảng viên dêi tâi tâng pơlê kong kong krâm’’.

Bu kơ’nâi 2 hơnăm pêi pro, tâi tâng pơlê kong krâm Ƀuôn Hồ hiăng diâp 175 Phĭu kơdĭng liăn Búa liềm vàng ƀă tâi tâng ki kơnâ 769 rơtuh liăn. Mâu phĭu mê hiăng kum đảng viên mơ’no liăn mơjiâng pro tơmeăm, rôe hdrê pêt, pơlât tơdroăng châ ƀă tơniăn tơdroăng rêh ối. Rêm phĭu liăn ôh tá xê djâ ki kơnâ kế tơmeăm khoăng, mê ối cho tơdroăng ki mơhnhôk hiêm mơno kơnía, pơtối ivá vâ mơ-eăm tung tơdroăng pá puât. Jâ H’Blă Mlô, Phŏ Kăn hnê mơhno má môi Khu pơkuâ tơdroăng cheăng Đảng pơlê kong krâm Ƀuôn Hồ, kong pơlê Dak Lak tối ăm ‘nâi:

‘’Troăng pêi kố troh lâp lu troh mâu ngế châ kum xuân môi tiah khu tơrŭm cheăng đảng, đảng viên tung hriâm tâp ƀă pêi tiô troăng tơdjâ hiêm mơno lĕm Hồ Chí Minh. Klêi kơ’nâi rah xo bro lế lĕm tro tíu pêi cheăng tơnêi têa, mâu tơdroăng ki klâi châ Khu hnê mơhno má môi Khu pơkuâ tơdroăng cheăng Đảng pơlê kong krâm tung pơla kố nah  rế pêi lĕm tro mê la ngiâ kô châ mâu cheăm bêng pơtối po rơdâ pêi pro, pro ti lâi troăng pêi mê troh ƀă mâu đảng viên kơtiê’’.

Rêm kơxôp ‘’Phĭu kơdĭng liăn Búa liềm vàng’’ cho môi tơdroăng mơnhên ro hơniêp tiah hlo ƀă mâ ăm tơdroăng tơrŭm môi tuăn, kum dêi pó ƀă pôu râng hnoăng cheăng tung khu kăn ƀô̆, đảng viên Khu pơkuâ tơdroăng cheăng Đảng pơlê kong krâm Ƀuôn Hồ, kong pơlê Dak Lak. Ôh tá xê to kum ‘na kế tơmeăm khoăng, troăng pêi mơnhông tơdroăng ki loi tơngah, tơdroăng ki khŏm mơ-eăm ƀă pói vâ mơ-eăm tung rêm đảng viên. Ing tơdroăng cheăng pêi ki păng ‘nâng ƀă ki rơkê mê, troăng tơmiêt, troăng tơdjâ Pôa Hồ Chí Minh hiăng ƀă dế châ troh lâp lu rơdêi, chiâng tơdroăng ki hnê troăng prôk tung tơdroăng pêi pro, kum mơjiâng khu tơrŭm cheăng Đảng rế hía rế krúa lĕm, krá tơniăn ó rơdêi ing tíu pêi cheăng./.