A kố, mâu khu chêh hlá tơbeăng ki hiăng ton hơnăm, kăn pơkuâ kơ koan hlá tơbeăng hiăng tối túa ki rơkê tơtro ‘na mơjiâng troăng pơkâ pêi ki phá tơ-ê, troăng pêi la ngiâ ‘mâi rơnêu Luât Hlá tơbeăng, pơhlêh xúa kŏng ngê̆ ƀă mơnhông hên tơmeăm khoăng.

Kăn xiâm hnê ngăn Kuô̆k hô̆i kheăn kơdeăn mâu tơdroăng veăng kum dêi khu chêh hlá tơbeăng tung tơdroăng cheăng kăch măng, tơdrêng amê tối rơdêi pơhlêh nếo troăng tơmiêt mơjiâng luât, pơkâ mâu tơdroăng ối tung hnoăng Kuô̆k hô̆i, ví pro pơhlêh mâu tơdroăng xiâm ối tung pơkâ, mơ-éa hnê mơhno. Kuô̆k hô̆i kô pơtối pro tơniăn mơngế pêi cheăng, xing xoăng râ, xing xoăng hnoăng ó rơdêi, diâp hnoăng hbrâ ăm Chin phuh tung pêi pro luât, vâ mơdêk châ tơƀrê tơkŭm po pêi pro luât, pro tơ’lêi hlâu ăm mơnhông cheăng kâ – rêh ối pơlê pơla tơnêi têa.