Tơpui mơgêi rôh hôp, Kăn xiâm pơkuâ hnê ngăn cheăng Đảng tối nhên: Tung hneăng cheăng hdrối nah, ƀă tơdroăng ki mơeăm dêi tâi tâng Đảng, tâi tâng khu lêng ƀă tá khu pơkuâ tơdroăng kal kí, tơnêi têa pin hiăng pêi châ tơƀrê hên mâu tơdroăng ki kal, châ kong têa ê tơmâng xo ƀă kuăn pơlê môi tuăn, malối cho tung tơdroăng ki hbrâ mơdât kâ kơluâ, kâ kơhveăm liăn ngân, ƀă chêh pro pơhlêh luât.

Khu pơkuâ cheăng tơnêi têa ai hnoăng cheăng kal khât tung mâu tơdroăng ki pêi pro châ tơƀrê mê. ‘Na hnoăng cheăng tung la ngiâ, kăn xiâm pơkuâ hnê ngăn cheăng Đảng pơkâ thế khu xiâm pơkuâ tơdroăng kal kí mơeăm pêi péa tơdroăng xiâm tung la ngiâ: troh hơnăm 2030, Việt Nam cho tơnêi têa pêi lo liăn dâ dâng hên; troh hơnăm 2045, chiâng tơnêi têa mơnhông pêi lo liăn hên. Malối, kal tí tăng ‘nâi plĕng pơxâu phâk kơtăng vâ pôi tá pro mơhrê liăn ngân tê kơtê, ôh tá tro luât pơkâ tơleăng mâu tơdroăng athế tro tơdroăng.