Kơxo lơ 12/6, a Hngêi Kuô̆k hô̆i, xua tơdroăng pơkuâ dêi pôa Vương Đình Huệ, Kăn xiâm hnê ngăn Kuô̆k hô̆i ƀă kăn xiâm phŏ hnê ngăn Kuô̆k hô̆i, Vi ƀan pơkuâ Kuô̆k hô̆i pơxiâm po rôh hôp pơla 2 rôh hôp Kuô̆k hô̆i.

Tiô tơdroăng po rôh hôp, khu kăn pơkuâ Kuô̆k hô̆i kô ăm rơkong tơpui tối ‘na mâu tơdroăng ki kân tơpui leăng, tơmâng, ‘mâi rơnêu, bro klêi mâu tơdroăng tơkêa: Luât Tơbriât tê tơmeăm ki ‘mâi hơ’lêh; Luât Yă tê tơmeăm ki ‘mâi hơ’lêh; Luât Khu pêi cheăng tơrŭm ki ‘mâi hơ’lêh; Luât Rak vế hnoăng pơxúa dêi mâu ngế ki roê tơmeăm ki ‘mâi hơ’lêh; Luât Hbrâ mơdât kuăn pơlê; Luât ‘mâi hơ’lêh, ‘mot tơ’nôm mâu tơdroăng dêi Luât Kŏng an kuăn pơlê; Luât ‘mâi hơ’lêh, ‘mot tơ’nôm mâu tơdroăng luât lăm ngi kong têa, mot tung tơnêi têa pin dêi kuăn pơlê Việt Nam ƀă Luât Mot tung tơnêi têa, tung pơla, rêh ối dêi mơngế kong têa ê a Việt Nam; Luât Tê mơdró điê̆n tưh ki ‘mâi hơ’lêh.

Ăm rơkong tơpui tối ‘na kơxop hlá mơ-éa Pơkâ ‘na tơdroăng ki pơcháu inâi ƀă kơlo liăn ăm mâu hnoăng cheăng, tơdroăng tơkêa ối tung Tơdroăng ‘mâi mơnhông ƀă mơdêk cheăng kâ rêh ối pơlê pơla, pơcháu, ‘mâi rơnêu, ‘mot tơ’nôm túa pơkâ mơ’no liăn cheăng tơdjuôm ki krâ kơvâ hơnăm kơxô̆ liăn tơnêi têa pơla hơnăm 2021 – 2025 ƀă xoăng túa pơkâ liăn ‘no pêi cheăng liăn tơnêi têa hơnăm 2023 dêi tơdroăng pơkâ tơnêi têa ƀă hên tơdroăng kal ki ê.