Roh kong mêi kân apoăng rơnó a kơxê măng hâi lơ 3/5 tung kong pơlê Kon Tum xuân tah lôi ki pá kân ăm mâu khu pơkuâ kong drêng ai hrĭng rơpâu ha kong a mâu tơring: Sa Thầy, Ia H’Drai, Đăk Tô, Ngọc Hồi, Kon Rẫy, Đăk Glei, pơlê kong kơdrâm Kon Tum dế a kơlo tối tơbleăng chếo kong ki rơ-iô tơ’lêi chếo kân, on kâ rơdâ.

Pôa Nguyễn Văn Huy, Kăn pơkuâ pơtâng tối hyôh kong prâi kong pơlê Kon Tum tối ăm ‘nâi: Kố cho roh kong mêi kân apoăng rơnó. Kơxô̆ kong mêi a mâu tơring Đăk Hà, Sa Thầy, Đăk Tô, Kon Plông và Đăk Glei châ sap ing 50 – 70 mm. Mâu tơring ki ê tung kong pơlê kơxô̆ kong mêi xuân châ sap ing 20 – 40 mm. Ƀă tơdroăng kong mêi môi tiah mê, loăng plâi a kong pơlê bê têa tôh vâ xông ngiât lĕm tung pơla sap ing 5 – 7 hâi.

Kơxê ƀă kong măng lơ 3/5, a pơlê kong kơdrâm Plei Ku (Gia Lai) ƀă mâu tơring ki achê hiăng ai mêi tung lâp lu, ton châ 1 chôu. Kố châ pơtih môi tiah kong têa ki kơnía xua hiăng kum ai têa tôh ăm mâu hdrê loăng pêt a hên cheăm tơring tung kong pơlê. Rôh kong mêi apoăng rơnó a Plei Ku ƀă mâu cheăm dêi mâu tơring ki achê môi tiah Čư̆ Pah, Ia Grai ƀă Đăk Đoa, Čư̆ Prông, kong pơlê Gia Lai tung lối 1 chôu. Rôh kong mêi kố chía kân hiăng kum pro kơdroh ki tôu pơ-oh tung pơla hên hâi hdrối kố nah.

Tơdrêng amê hlối tôh ăm lối hrĭng ha kơphế ƀă hdrê loăng pêt ki ê dế răng hlâ. Tiô tối pơtâng dêi hyôh kong prâi kơpong Tây Nguyên, tung mâu hâi la ngiâ, a Gia Lai kô pơtối ai mêi tung hên tíu. Tơdroăng kố kô bro ki tôu tung lâp kong pơlê kơdroh. Laga, xua kong tôu, khăng khoăng ton, mê mơni kô ai rôh kong tôu, mêi ôh tá tơniăn môi tiah mêi príu, khía jâ kơdo, tơro tê, pro ôh tá tơniăn ăm loăng pêt. Xua mê, vâi krâ nhŏng o  kal hbrâ rơnáu túa ki hbrâ ví.