Kong mêi kân ton hâi hiăng pro tơhnâp ó a ‘noăng kĭng troăng kân Hồ Chí Minh tơkâ hluâ thôn 3, cheăm Quảng Tín, tơring Dak Rlâp, kong pơlê Dak Nông.

Khu râ kăn pơkuâ, kơvâ cheăng hiăng xĕn thâ hên rơpŏng kuăn pơlê kơpong rơ-iô. Khu pơkuâ troăng prôk ƀă rơxế kơtâu kong pơlê Dak Nông tối ăm ‘nâi, xua kong mêi kân ton hâi, troăng kân Hồ Chí Minh a Km1936+080 ƀă Km1936+300 kơpong thôn 3, cheăm Quảng Tín, tơring Dak R’Lâp ai tơdroăng tơhnâ kuâ hngêi ƀă kơnâng ƀă kơpong tơhnâp kân.

2 tíu tơhnâp kố kơtăn dêi pó lối 200 met, ai tơdjâk troh troăng prôk chêng ƀă pro ôh tá tơniăn troăng klông a troăng kân. Khu pơkuâ troăng prôk ƀă rơxế kơtâu hiăng pơkuâ, tơkŭm po pêi cheăng ƀă mâu tíu cheăng ai tơdjâk vâ tăng troăng tơleăng, kơdroh tơdjâk troh tơmeăm troăng prôk chêng, tơniăn troăng kân Hồ Chí Minh tơkâ hluâ kơpong nếo tối mê âi. Khu râ kăn pơkuâ ƀă kơvâ cheăng cheăm hiăng mơhnhôk mâu rơpŏng kuăn pơlê ki tơ’lêi tơdjâk xĕn tơmeăm khoăng lo kơpong tơhnah tơhnâp vâ tơniăn lĕm. Tiô riân apoăng, tơdroăng tơhnâp pro tíu tê têa châu têa kơxăng, tíu tê ôu kơphế ƀă tơnêi kĭng troăng kân dêi 15 rơpŏng tro tơdjâk.