Pơla hơnăm 2021-2023, tiô tối hdrối liăn ngân xiâm tơnêi têa pơcháu pêi pro tơdroăng pơkâ dêi tơnêi têa tung kong pơlê Dak Lak vâ chê 1 rơpâu 500 rơtal liăn, liăn ngân kong pơlê lối 130 rơtal liăn. Laga, kong pơlê nếo bú ăm xo lối 800 rơtal liăn. Tơdroăng xo liăn ngân hrá chiâng tơdjâk kân troh tơdroăng tơbleăng mâu tơdroăng tơkêa bro a kong pơlê.

Tiô pơkâ séa ngăn tơbleăng, khu lăm séa ngăn pêi pro tơdroăng pơkâ tơnêi têa mơnhông cheăng kâ - rêh ối kơpong hdroâng kuăn ngo ƀă kong ngo a Dak Lak ai 6 ngế. Tung pơla 45 hâi pêi cheăng, riân sap hâi tơbleăng Pơkâ séa ngăn, khu lăm séa ngăn ai pơkâ tối tơbleăng, ăm ‘nâi mâu tơdroăng ‘na hlá mơ-éa chêh tơ’nôm ‘na tơdroăng pêi pro Tơdroăng mê sap hơnăm 2021 troh tâi hơnăm 2023.