Tơdroăng tơkêa bro Luât tơmeăm kơnía mơhno khôi túa lĕm tro (‘mâi rơnêu) pơkâ ‘na mơnhên, tơdroăng pêi pro séa mơnhên tơmeăm mơngế hlâ ki lôi troh rơxông kơ’nâi, tơmeăm ki ton nah, tơmeăm kơnía tơnêi têa ƀă xúa tơmeăm mơngế hlâ ki lôi troh nôkố, tơmeăm ton nah châ hlo. Ki tơtrŏng má môi, mơ-ea chêh hdrối Luât tơ’nôm tơdroăng nếo ‘na gâk kring ƀă rak tơmeăm ton nah, pơkâ ‘na rah tiô khu ƀă túa pơkâ kơnó tơmeăm ton nah; riên tơmeăm ton nah; chêh inâi tơmeăm ton nah; rak tơmeăm ton nah; vêh pro tơmeăm ton nah.

      Pôa Vương Đình Huệ, Kăn xiâm hnê ngăn Kuô̆k hô̆i tối rơdêi: tơmeăm ton nah mơhno khôi túa lĕm tro kal châ ngăn cho xiâm kối ăm mơnhông; kal châ rak ƀă mơnhông, tơdroăng tơrŭm rak vế ƀă mơnhông kal châ séa ngăn tung tâi tâng mơ-éa luât, ƀă hiêm mơno mơjiâng mơnhông. Pơkâ thế Khu rah chêh tơ’nôm troăng pơkâ pêi, troăng pêi ton xŏn ‘na tơdroăng cheăng khôi túa lĕm tro, kơchơ mơdró khôi túa lĕm tro, pơhlêh pêi cheăng xúa kŏng nghê̆ pêi ‘na khôi túa lĕm tro, tơrŭm cheăng pơla tơnêi têa ƀă ngế krê, cheăng kâ khôi túa lĕm tro.

Tơdrêng amê ai troăng hơlâ ki phá tơ-ê rak vế mơnhông tơmeăm kơnía khôi túa lĕm tro hdroâng kuăn ngo, kơpong kong ngo, rơlố têa kơxĭ, tơmeăm kơnía khôi túa lĕm tro ki tơ’lêi hía lôi.