Iung pơma tơ̆ ‘măng tơƀơ̆p, Kơdră chĕp pơgơ̆r Kuô̆k hô̆i Trần Thanh Mẫn hôn bơnê kơtang tơdrong lăng ba, pơrô̆ jang đơ̆ng Kơ iĕng Kơdră chĕp pơgơ̆r Teh đak Trương Mỹ Hoa, Hơnih mong jên hŏk pơhrăm Vừ A Dính hlôi đei trong jang hơ iă, jơnei. Lơ tơdrong jang ‘lơ̆ng hơ iă hloh kơ yuơ Hơnih mong jên ou hlôi păng tŏk bŏk tơlĕch jang nhen: Tơdrong jang “Tơ iung pơjing ăn hơnô̆ hơnăp kơnh” rong ‘me  hloh 600 ‘nu oh hŏk tro đơ̆ng rim tơring sơlam teh đak, tơring achon dơsĭ hŏk pơhrăm oei sa kơtă; Tơdrong jang “Pơih trong ăn hơnô̆ hơnăp kơnh” ‘măn ăn 100 ‘nu oh drŏ kăn hŏk tro kon kông, tơring groi kông păng tơring achon dơsĭ ŭnh hnam tơnap tap,… hlôi pơjing đei lơ tơdrong hơ iă, tơgop kơtang lơ̆m tơ iung pơjing khul jang ăn tơring kon kông, tơring groi kông, achon dơsĭ.

Kơdră chĕp pơgơ̆r Kuô̆k hô̆i pơma tơbăt jơhngơ̆m đon chơt hơ iă hăm tơdrong jang đơ̆ng sơnăm 2009 Hơnih mong jên hlôi pơjing Tơmam hơpăh Vừ A Dính vă pôk pơ ư rim bơngai, khul jang ‘lơ̆ng lơ̆m: Hok pơhrăm; Chă tơchĕng khoa hŏk; Joh ayŏ kơdŏ soang; Vei lăng sơlam Teh đak, Vei lăng sơđơ̆ng tơring tơrang; Tơdrong jang tơpôl ... hơnhăk đei trŏ lăp ăn kon pơlei tơring groi kông păng achon dơsĭ. Jăl jang 15 sơnăm ou ki, Tơmam hơpăh ling lang atok tơ iung: đơ̆ng 15 ‘nu bơngai gơ̆h hơgei păng 5 khul jang ‘lơ̆ng đei sơng iŏk Tơmam hơpăh ‘măng mă blŭng truh dang ei hlôi đei 118 khul păng 210 ‘nu bơngai đơ̆ng 44 hơdrĕch hơdrung, lơ̆m ou đei rim hơdrung măt bơngai kơtoei sơng iok Tơmam hơpăh ou.

Kơdră chĕp pơgơ̆r Kuô̆k hô̆i hôn bơnê rim bơngai tang măt ‘noh hŏk tro, sinh viên, rim kang ƀô̆ Đoàn, rim ƀok thây kô sơnăm mơlôh hlôi kơrŭn jơhngơ̆m hŏk pơhrăm, iung jang, tơchăr hơgei, iŏk đei jơnei kơtang, đei pôk ăn lơ tơmam hơpăh, mê đai teh đak, apŭng plĕnh teh; đei lơ trong jang hơgei, tơchăr hơgei, tơgop gĭt kăl ăn khoa hok, pơjing đei lơ tơmam drăm kăp gĭt, tơlĕch jang kiơ̆ hloi lơ̆m tơdrong hơrih sa păng atŏk tơ iung mŭk drăm, tơpôl, sơđơ̆ng dơ̆ng kơjăp pơlei pơla ăn kon pơlei pơla.

Kơdră chĕp pơgơ̆r Kuô̆k hô̆i jei hôn bơnê dôm tơdrong jang jơnei mă Hơnih mong jên hŏk pơhrăm Vừ A Dính hlôi iŏk đei lơ̆m prăt 25 sơnăm ou ki; hôn bơnê dôm bơngai tơgŭm djru, bơngai đei jơhngơ̆m đon ‘lơ̆ng, ‘ngoăih jang mơdro sa hlôi đei tơdrong jang ‘lơ̆ng rŏ, vang tơgop kơtang jơhngơ̆m đon, mŭk drăm ăn tơdrong jang atŏk tơ iung tơring kon kông, tơring groi kông păng achon dơsĭ ‘moi kiơ̆ Hơnih mong jên lơ̆m prăt dôm sơnăm ou ki.

Kơdră chĕp pơgơ̆r Kuô̆k hô̆i ‘meh vă rim đe hŏk tro, sinh viên, rim ƀok thây kô sơnăm mơlôh jang kiơ̆ ‘lơ̆ng nơ̆r tơtă đơ̆ng Kơdră chĕp pơgơ̆r Teh đak Hồ Chí Minh lơ̆m Kơthơ pơtruh ăn hŏk tro ƀlep lơ̆m năr pơm lêh mơ̆t hŏk blŭng akhan, "Teh đak Việt nam hăm đei jing ‘lơ̆ng liĕm dăh mă ưh, hơdrĕch hơdrung Việt Nam hăm yak truh hơnŭk hơnoa vă kĕ yak hơdoi hăm rim teh đak pran kơtang gơ̆h hơgei lơ̆m plei teh dăh mă ưh ‘noh jĭ gơnơm lơ̆m tơdrong hŏk pơhrăm kơ rim đe oh”. Kơdră chĕp pơgơ̆r Kuô̆k hô̆i Trần Thanh Mẫn athei:“Rim tơpôl, rim bơngai đei sơng iŏk Tơmam hơpăh kăl iung jang kiơ̆ ‘lơ̆ng hloh dơ̆ng dôm tơdrong hlôi iŏk đei, hơnơ̆ng hơdrin tơgop jơhngơ̆m đon tơ iung pơjing pơlei pơla, teh đak roi năr roi ‘lơ̆ng liĕm. Ƀlep lơ̆m jơ ‘năr ou, ĭnh athei Trung ương Đoàn hơnơ̆ng lăng ba kơjăp chĕp pơgơ̆r, pơjing rơvơn vă Hơnih mong jên hŏk pơhrăm Vừ A Dính lang să kơtang jơhngơ̆m đon tơgoăt tơgoăl, vang chă tơgŭm djru dih băl; tơtom tơgŭm djru, hơlêm, tơgop lơ̆m atŏk tơ iung, kiơ̆ yok rok jơ̆ng dôm tơdrong đei kơ kon pơlei kon kông, tơring groi kông păng achon dơsĭ, tơgop lơ̆m tơ iung pơjing khul mơlôh gơ̆h hơgei bơ̆ jang ‘lơ̆ng trŏ lăp ăn tơdrong pơkoel kơ tơdrong jang kmăi kmŏk hơgei kơ teh đak”.

Kơdră chĕp pơgơ̆r Kuô̆k hô̆i jei tơbăt, Đảng, Teh đak kơrŭn đĭ jơhngơ̆m vă tơmơ̆t jên jang lơ hloh dơ̆ng ăn tơring kon kông. Kuô̆k hô̆i hlôi pơjing rim Tơdrong tơchơ̆t găh 3 Tơdrong jang tơm Teh đak ‘noh Tơ iung pơjing tơring tơrang ‘nao; atŏk tơ iung mŭk drăm-tơpôl tơring kon kông păng groi kông; Xut sa pơngot rơvĕt tơjur dơnuh kơjăp ‘lơ̆ng. Hrei ou, Khul kơdră chĕp pơgơ̆r Teh đak tŏk bŏk kơrŭn đĭ ai jang kiơ̆ rim tơdrong jang ou.