Iung pơma tơ̆ Hop akŏm, Kơdră chĕp pơgơ̆r Kuô̆k hô̆i Trần Thanh Mẫn tơbăt, ‘măng hop akŏm mă 8 đei lơ tơdrong jang hloh kơ rim ‘măng hop akom blŭng jăl jang Kuô̆k hô̆i jăl XV truh dang ei. Kiơ̆ kơ ‘noh Kuô̆k hô̆i gô lăng hơlen 39 tơdrong, lơ̆m ou đei 29 tơdrong găh bơ̆ jang pơjing khôi luơ̆t, 10 khul tơdrong jang găh mŭk drăm-tơpôl, kon jên jang teh đak, dăr lăng, bơ̆ jang pôk tơmơ̆t kơdră păng rim tơdrong anai. ‘Măng hop akom mă 8, gô pơgơ̆r blŭng a lơ̆m năr 21/10. Tơchĕng hơlou hop akŏm lơ̆m 29 năr. ‘Măng hop akŏm đei klăh asong pơm 2 ‘măng.

Hop akŏm đei pơgơ̆r hơdrol jơ ‘năr jang kiơ̆ ƀlep Khôi luơ̆t tơlĕch ăn hla bơar khôi luơ̆t; adoi vă pơma dơnuh, drơ̆ng mĭnh nơ̆r găh tơdrong pơgơ̆r hop akŏm mă 8, mă kăl ‘noh rim hơnih bơ̆ jang ăn tơgop nơ̆r lăng hơlen găh jang keh đang dang yơ, jơ ‘năr dôm yơ, tơdrong bơ̆ jang ‘lơ̆ng kiơ̆ tơdrong tơchơ̆t, tơdrong hơmet ăn dôm tơdrong vă pơjing khôi luơ̆t, tơdrong tơchơ̆t vă tơmơ̆t dơ̆ng lơ̆m ‘măng hop akŏm mă 8 kiơ̆ trong hơmet ming tĕnh koăng.

Kiơ̆ đơ̆ng Kơdră chĕp pơgơ̆r Kuô̆k hô̆i Trần Thanh Mẫn, khei năr ou ki, bơ̆ jang iung jang hơdoi ƀar păh Khul kơdră chĕp pơgơ̆r Teh đak păng rim hơnih bơ̆ jang Kuô̆k hô̆i roi năr roi kơjăp, ‘lơ̆ng hơ iă, tơpă păng jơnei, rim hơnih hlôi pơm hơtŏk jơhngơ̆m đon tơnăp, hơmet ăn đơ̆ng hrôih, đơ̆ng hơtăih, bơ̆jang tơ̆ kơ ‘năr, gơmăng vă hơmet ăn rim trong vă pơjing khôi luơ̆t, tơdrong tơchơ̆t kơ Kuô̆k hô̆i.

Lơ̆m khei năr hrei ou, Kơdră chĕp pơgơ̆r Kuô̆k hô̆i Trần Thanh Mẫn pơkă:“Kial hơbŭt kơsô̆ 3 ou ki pơrăm tôch kơtang. Dĭng truh dang ei, tim mă jô̆ keh đang tơdrong hiong răm. Pơđĭ lơ̆m Đảng, kon pơlei, ƀô̆i đô̆i kŏng ang bơ̆n tă đei tơdrong tơnap tap ‘nao dơ̆ng, tơdrong long ‘nao dơ̆ng. Khul kơdră chĕp pơgơ̆r Teh đak kăl dơ̆ng tơ̆ hơnăp tơnap tap, gleh grat mơmat tat hloh dơ̆ng lơ̆m tơdrong tơmơ̆t, tơlĕch kon jên bơ̆ jang, jang kiơ̆ trong pơkăp tŏk lơ mŭk drăm, sơđơ̆ng mŭk drăm, tang găn kơjă tŏk jur păng hơtŏk kơjă rim tơmam drăm vă pơm sơđơ̆ng tơdrong hơrih sa kơ kon pơlei. Kơ yuơ lơ loh, Đảng khul Kuô̆k hô̆i, Khul kơdră chĕp pơgơ̆r Đảng kơ Khul kơdră chĕp pơgơ̆r Teh đak gô iung jang hơdoi ‘lơ̆ng hơ iă hloh dơ̆ng, jơnei hloh dơ̆ng, trŏ lăp hăm tơdrong ‘meh vă yan ou kơ yuơ tơdrong atŏk tơ iung mŭk drăm-tơpôl, sơđơ̆ng hơrih sa ăn kon pơlei păng pơtrŭh tŏk mŭk drăm”.

         Lăp đơ̆ng rŏng mơ̆ng nơ̆r tơgop pơma dơnuh, nơ̆r iung pơma đơ̆ng Kơdră dơnơm, Kơdră chĕp pơgơ̆r hơnih bơ̆ jang, Kơdră chĕp pơgơ̆r Jơnŭm vei lăng kon kông, rim Hơnih bơ̆ jang kơ Kuô̆k hô̆i, Thủ tướng Teh đak Phạm Minh Chính hôn bơnê kơtang tơdrong jang hơdoi kơ Đảng khul Kuô̆k hô̆i hăm Khul kơdră chĕp pơgơ̆r Đảngh kơ Khul kơdră chĕp pơgơ̆r Teh đak roi năr roi ‘lơ̆ng hơ iă hloh dơ̆ng; tơbăt, hop akom vă dăr lăng tơdrong jang oei tơhlăk tơhlĭn, kăl drơ̆ng mĭnh nơ̆r, vă pơtrŭt kơtang bơ̆ jang ‘lơ̆ng kơ hop akŏm. Kơ yuơ lơ loh, Thủ tướng athei ƀar păh kăl đei iung jang hơdoi ‘lơ̆ng hloh dơ̆ng lơ̆m chih pơjing khôi luơ̆t, tơdrong tơchơ̆t. Thủ tướng Teh đak athei rim Hơnih tơm, rim hơnih bơ̆ jang kơrŭn đĭ ai, iung jang hơdoi kơjăp păng jơnei hăm Jơnŭm vei lăng kon kông, rim Hơnih bơ̆ jang kơ Kuô̆k hô̆i:“’Ngoaih tơdrong kăl hơmet pơ ‘lơ̆ng trong bơ̆ jang, trong tơlĕch jang đơ̆ng Đảng vă kơ bơ̆n tơlĕch jang kiơ̆. Bơ̆n hơnơ̆ng tơplih ‘nao trong tơ iung pơjing khôi luơ̆t, đơ̆ng mă lăp akŏm ăn bơ̆ jang vei lăng, jing mĭnh păh akŏm ăn bơ̆ jang vei lăng ‘lơ̆ng, mă lei jei kăl tơgop pơjing hơyak ăn atŏk tơ iung. Kiơ̆ kơ ĭnh kăl tơplih ‘nao lơ̆m rim hơnih bơ̆ jang chih tơlĕch, adoi nhen rim hơnih jang hơlen kĭ tơchơ̆t. ‘Moi kiơ̆ đơ̆ng noh, mă hơvơn đei rim khul jang. Hrei ou, khul jang kơ bơ̆n tŏk bŏk tơhlăk tơhlĭn. Bơ̆n lăp akŏm vei lăng jơnei ‘noh jĭ ‘lơ̆ng bơih. Mă lei, ‘ngoăih kơ ‘noh, kăl pơih trong hle, pơjing hơyak pran ăn atŏk tơ iung, vă chă hơvơn khul jang kơ tơpôl, đơ̆ng kon pơlei”.

Thủ tướng akhan, mơ̆ng kiơ̆ tơdrong vă jang pơjing khôi luơ̆t vă gơ̆h tơlĕch rim tơdrong tơchơ̆t hơdăh, dôm tơdrong oei tim mă lăp, đei lơ ƀơm truh ‘noh kăl hơmet pơ ‘lơ̆ng. Bơ̆ jang pơjing khôi luơ̆t kăl đei iung jang mă ‘lơ̆ng, yă kiơ hlôi hơdăh, hlôi ‘lơ̆ng, hlôi ƀôh hơdăh ‘noh ƀlep, jang kiơ̆ jơnei păng găh lơ drơ̆ng nơ̆r lei gô jing khôi luơ̆t hloi. Găh dôm tơdrong tim mă ‘lơ̆ng, tim mă hơdăh, tim mă ƀlep ‘noh hơdrin jang pơlong năng, jang răh, hơlen răh, hơmet ming dar dah.

Pơma pơtôch Hop akŏm, Kơdră chĕp pơgơ̆r Kuô̆k hô̆i Trần Thanh Mẫn athei, rim hơnih pơm tơlĕch kăl pơtruh hla bơar ăn kơ Kuô̆k hô̆i hơdrol năr 1/10; lơ̆m ou mă kăl lăng truh 6 tơdrong pơtruh ăn tơ̆ 1 ‘măng hop akŏm kăl sơđơ̆ng trŏ ƀlep ‘lơ̆ng.