Labaih 20 thun ini mai, baoh sang anit ranam di baha Kỳ Quang 2, pak quận Gò Vấp, bal raya Hồ Chí Minh kayua sư trụ trì lac Thượng tọa Thích Thiện Chiếu padang tabiak, hu ngak jeng baoh sang di labaih 200 adei jaoh jo, metui medhar oh hu sang danaok. Hu raong ba dalam baha meng hatai anit ranam di taong abih manuac urang, ralo adei prong tagok, mbang bac jeng manuac jeng urang.

Mai baha Kỳ Quang 2, di labik 154/4A Lê Hoàng Phái, phường 17, quận Gò Vấp, bal raya Hồ Chí Minh tuk melam, mboh biak chreih chrai, bui sambai dalam sap ndom klao. Talei sang hu parabha jeng ralo duk sit, hu sa jalan nao haong gauk. Di sa canah bilik, sư thầy Thích Thiện Chiếu daok ru dom adei ndih. Dom kadha daoh ru bhian randap “ầu ơ... ví dầu cầu ván đóng đinh, cầu tre lắt lẻo, gập gềnh khó đi…ba dom adei pik meta ndih. Di bilik jaik taphia, dom ong bhik daok iek glang anek kamar, dom adei njauk não úng thủy daok ndih luai suan,bruk diuk rai yau tapa harei min. Dom adei njauk bại não, liệt takai tangin, tangaoh, takhlaoh… jeng hu parabha jeng nyaom piah ka dom ong bhik dalam baha mbuan si mong iek. Dom adei prong jang, hu pren yava saong glo akaok bình thường ye hu daok haong gauk dalam sa duk, hu ong bhik parabha gauk iek glang dom adei sit jang atau ngak dom bruk sit sot karei. Tui bruk yau nan meng ralo thun ini mai, taong abih bruk hit dalam baha rah tabiak siam, tani tanat. Adei Trần Ngọc Yến, umo 12 thun, hu ba tame raong dalam baha meng sit lac: Adei biak bui sambai saong patuah hu ong bhik raong saong brei nao bac. Anek kham merat bac ka nyu naih piah bayar dhar phor ini.

Baoh sang anit ranam pak baha Kỳ Quang 2 kayua Thượng tọa Thích Thiện Chiếu padang tabiak meng thin 1994. Ong hadar veik: dalam sa harei hajan prong, hu dua adei sit rup pathah abih, sa adei takhlaoh, adei diah hu tật di takai tame baha likau lisei huak. Anit ralo, ong ba 2 adei tame baha raong saong brei nao bac . blaoh meng nan nao, dom adei metui medar oh hu sang danaok duah mai baha likau tame daok dak harei dak ralo. Tuk taduan raong 20 adei, Thượng tọa likau adat karja palei peih sa baoh sang anit ranam. Dom adei taduan mek tame raong pak ini hu brei angan bahrau, ngak ba-ar khai sinh saong hu brei nao bac. Urak ini baha daok raong 210 adei umo karei di gauk, dalam nan hu 69 adei hu pren yava siam mekre, daok veik lac jaoh jo meng sit mai, ralo adei sit njauk palao klaak anak pabah mbang  tuk tathak jeng daok pagam pruac, tal urak ini jeng oh mboh thEI mai taduan mek veik. Gam ngak ame, gam ngak amaik di labaih 200 adei sit, meng traok lithei, tal ba palua dom adei ndih nan lac bruk ngak oh mbuan, min thầy Thích Thiện Chiếu tuk halei jeng saneng lac, meng taong abih hatung hatai anit ranam, baoh sang ini meda pabak ka dom adei dom bất hạnh di rai diuk. Bruk ngak ini hu makna biak prong  di thầy hu ralo Phật tử pachreih tui, klah rabha, bhian ba saradang, aia tasau, khan aoo …. mai brei saong daong ka dom adei iek glang dom adei. amuk Lê Thị Lan, sa phật tử bhian mai pak ini lac: Khaol dahlak mai ini daong ka thầy pato pakai dom adei ye ralo yau ini thầy oh ngak abih hu. Sa urang daong sa tangin haong gauk.

Di  baoh sang ini, thầy Thích Thiện Chiếu hu dom adei iew lac ame atau “Thầy cả”. Mong jalan pok palua dom adei sit tuk ia, atau bruk kaol nyu nduac tame dalam hatung thầy ndom klao chreih chai, njauk lac oh karei hagait sa baoh sang biak biai, labik daok siam mekre di dom adei oh patuah jamo. Jeng meng baoh sang ini, ralo adei sit prong tagok, duah hu bruk ngak tani tanat min jeng mai veik gam haong thầy iek glang, pato pakai dom adei sit yau drei dahlau diah. Ngan haong Thượng tọa Thích Thiện Chiếu – ong bhik dang akaok baha ini hu mbaok mong biak salut mbut saong cambuai klao hiền từ ini, hu taom gaok dom adei nan lac “duyên” dalam rai diuk: Tal harei ini, meda ndom lac khaol dahlak taduan hu ralo bruk daong di dom urang ngak pahla, daong ka dom adei yam tapa kan kandah. Tuk mong iek dom adei, drei mboh biak haniem phul, mboh hu công đức di amaik ame brei ka anek bhik. Kadha bui sambai ini thầy lac urang mboh dahlau di abih, ini jeng lac hạnh nguyện di urang tu hành ngan haong rai diuk.

Oh lac taduan raong uranaih metu medar oh hu sang danaok, pak baha Kỳ Quang 2, sư trụ trì Thích Thiện Chiếu daok hu padang Duk jru Tuệ Tĩnh Đường, bhian iek ruak saong brei jru saoh ka urang ruak kathaot. Tuk vak anak tal, thầy meda taduan raong dom urang tahadaok sa drei oh hu labaik daok, tui điều kiện di baha. Ong saneng lac: “Agama” njauk pagam haong “Dunya”, nan ye kadha hagait siam gheih, hu kein ye njauk ngak, piah daong padam trun dom pandik harao. Yaok urang tok truac tagok sa mbaik diêm nhân ái, khaol drei meda hu sa mbaik troy bak hatai anit ranam"./.