Yaok page mon 6 tuk, ong Bùi Hoàng Phú di Tieu khu An Sơn (pulao Nam Du), ndac khu Kiên Hải, tinh An Giang panduan tabiak gaiy raong ikan bớp, ikan mú srap gap pablei di jaik Tet. Baoh sang ong dahlau diah rilo meng lac ngak bruk taong mek kaya ikan dalam ia, min tuk mboh ikan hadang kurang takik jang, ong tame ngak bruk buh jien raong ikan dalam bai gaiy angaok tasik, urak ini baoh sang hu 2 gaiy haong 6 bai raong labaih 1.000 drei ikan rilo janih. Ong Bùi Hoàng Phú brei thau: Meyah lagaih ka jien mek tame meng bruk raong ikan dalam bai gaiy yaok thun meda hu labaih 400 trieu dong.

“Dahlak hulin mboh bruk raong ikan hadang ye nyu hu kein lagaih. Kein lagaih di ini lac bhum kaoh pulao nan oh hu angin ribuk, daok atah ar nan ikan hadang praong cakrok samar, siam”

Urak ini, di Tieu Khu An Sơn, daok hu 35 baoh sang raong ikan hu 160 ro bai, ikan raong di thun 2025 kuhria hu 120 tan, taong abih jien mek tame labaih 10 ty ndong sa thun. Langiu di bruk raong ikan piah pablei, dom urang ngak mbang tasik daok di pulau Nam Du jeng daok pambuak ngak dom bruk ka gah jirah rivang tasik pagam haong bruk rivang me-in saong mbang kaya mbang di bai gaiy. Sa-ai Nguyễn Thanh Tùng, baoh sang raong ikan di kaoh pulao Nam Du brei thau: "Hu tuai damuai mai trun gaiy ye drei payak tuai, vah ikan me-in, am ikan di gaiy, langik lagaih ye drei meng brei ka tuai damuai trun ia hu".

 Tui ong Huỳnh Quốc Hưng, Phaok bi thu ndang uy labik Tieu khu An Sơn: Bruk raong ikan jeng daok gaok dom kan kandah kayua yaom ikan pajaih, kaya brei ka nyu mbang mbang tagok yaom glaong, jit ruak di ikan jeng rah tabiak. Urak ini, An Giang daok peih danak dak patagok bruk raong di ia tasik, pataom tame bruk dak iek saong dom sarak daong ka ilamo ngak kong …

“Tui jalan ngak di tinh brei peih danak dak ka bruk raong kaya tasik lac biak njauk hu, ilamo ngak kong hu ba drei tame, jien brei mesraiy laba lap meng dom gilang pariak…"

Oh lac di pulao Nam Du, bruk raong kaya ikan di dalam bai gaiy jeng daok patagok khang di dom pulao karei di bhum tasik Pei Meraong. Di pulao Thổ Chu, dac khu Thổ Châu, tinh An Giang ngak bruk raong ikan di angaok tasik jeng daok tagok biak khang. Ong Huỳnh Ngọc Sanh, po di 5 baoh gaiy bai ro raong ikan di kaoh pulao Thổ Chu brei thau: ong hu mbaok tame hop tac xa raong ikan tasik gam saong 30 urang, buh tame labaih 1 ti dong piah ngak majam raong meng ilamo ngak kong bahrau pambuak di kayau haong kaya compsite.

"Jeng bac magru di dom adei sa-ai nao dahlau ye raong 1 ribau 3, mek laba labaih 20-30%, min meng camreip tuk halei jeng kan kandah, tapa luac jalan bac tangi saong ngak ye ngak hu min, dak tuk dak truh tapa kan kandah".

Bruk raong ikan bhum tasik di Pei Meraong daok dang anak rilo kein lagaih piah tagok bruk ngak mbang karo kajap, pagam haong bruk ngak mbang pacang khik alam langik, paglaong yaom kaom kinh te. Min, piah brei ka nyu hu pamadeih ka dom kein lagaih nan, biak khin hu bruk daong prein dil samu meng dom sarak daong phun jien, ilamo ngak kong, jeng yau bruk ngak jeng dom hop tac xa, kapul daong bruk piah patagok pambuak ngak bruk saong blei abih ndap nda kaya. Tuk rahra sahnang hatai buh jien tame, tani tanat bruk mbang ngui saong pagam suai atah haong tasik, ye yaok gaiy bai, yaok bhum raong oh lac ngak tabiak drap ar, blaoh daok daong khik kajap tasik kaoh pulao ginreih di Taneh ia negar./.