Sa-ai Nguyễn Thị Xiếu, Phaok Akaok Nghiệp ndoan harak ve so Mỹ Phước, phuong Bến Cát (Ban Bến Cát, Binh Duong klak), tani tanat pasang duah harak angan 94 urang ndoan dahlau tuk payua tal Uy mban Mat tran Negar phuong. Nan lac dom bruk ngak duah jien meng bruk pablei harak ve so di dom jalan, darak, tapen radaih dalam bhum. Sa-ai Nguyễn Thị Xiếu brei thau:  “Thun ini, brei hu bruk kuhria bahrau, kayua hadei labaih 1 thun ngak tani tanat, nghiep ndoan tame bruk paje ye mbang chap hanh jeng nyaom biai blaoh paje, langiu banah kaya alin di lien ndoan lao dong, kong ndoan phuong, nghiep ndoan harak ve so brei hu pandar dalam kadung jien piah li xi ka urang ndoan vien, daong prein ka dom urang nan”.

Ong Trần Văn Nhẫn, Akaok Nghiep ndoan radaih pajeng phuong Thới Hòa brei thau, nghiep ndoan urak ini hu 34 urang ndoan, rilo meng lac urang ngak bruk praong thun umo, oh daok kein lagaih ngak bruk dalam gah ngak mbang pablei salih, pagam haong bruk ngak radaih pajeng. Tui ong Nhẫn, bruk urang ndoan vien caong maong abih lac yaok mbang Tet lac bruk sangka dil samu meng karja saong kapul kong ndoan. Yaom lac tanut jien daong oh praong min lac sa bruk daong prein daong urang ngak bruk hu bui sambai raok Tet: “Dom thun dahlau, dalam bingun Tet Nguyen dan, urang ndoan vien nghiep ndoan radaih pajeng bhian hu daong meng 1 – 2 trieu dong sa urang, gam haong dom banah kaya alin njauk hu saong bruk sangka rivang tangi daong prein. Daok hu iek veik ka dom adei sa-ai hu ngak bruk siam lagaih jeng hu harak pok meyaom”.

Di dom sang jamraik, arthak ngak bruk di dom harei puac thun hu chreih chrai. Bahrau ini, “Bruk lagaih di urang ndoan vien” caik dalam Kongti TNHH Pou Yuen Viet Nam daong urang ngak kong blei pandar Tet hu yaom patrun tal 50%, daong patakik jien pandar dalam sang. Ong Cù Phát Nghiệp, Akaok Kong ndoan Kongti brei thau, thun ini gah ngak mbang pablei salih alin jien Tet meng 1 tal 2,2 bilan jien bilan; gam haong nan peih var mbang huak puac thun saong caga radaih ba labaih 2.500 urang ngak bruk mai palei raok Tet. Taong abih jien sangka Tet kuhria labaih 1.000 ty dong:  “Kong ndoan pambuak haong Mbang yam ndok kongti peih rilo danak dak sangka ka gah urang ngak kong uan bal pataih pagap yau harak ve radaih nao sang mbang Tet, alin kaya ka urang ndoan vien ngak kong uan bal pataih gaok kan kandah, saong peih nak rilo danak dak yau ngak thaik thaot labik gheih mekre, peih kacah pahat padhih uan bal pataih. Abih di nyu nan lac hu bruk lagaih di urang ndoan vien, duh ka ndpa nda kaya yaok harei ka urang ngak kong ndoan vien”.

Amuk Lê Thị Kim Thúy, Phaok Akaok Lien ndoan Ngak bruk Ban raya Ho Chi Minh brei thau, bruk sangka urang ndoan vien hu pagam haong jalan ngak salih lek taka so, daong urang ngak bruk dak harei dak thau tani tanat ka bruk bayar jien tapa chuyen khoan.

Tui nan, Lien ndoan Ngak bruk Ban raya Ho Chi Minh peih ngak dom daanak dak, labik blei pandar tapa ung dung di dong, brei kein lagaih piah urang ndoan vien pandar dom bruk blei pandar bahrau; gam haong nan pambuak haong gah ngak mbang pablei salih ngak danak dak “Urang Viet Nam pandar kaya Viet Nam”, pabak kaya ndap nda asar siam, angan je. Amuk Lê Thị Kim Thúy lac: “Dalam tukvak anak tal, Lien ndoan Ngak bruk Ban raya Ho Chi Minh hu rilo danak dak, dom labik blei pandar, pamaong tal bruk ngak jeng bruk randap pandar ilamo kong nghe, bayar jien oh meng jien mbaok dalam bruk blei pandar, meyao meyit di urang ndoan vien”.

Kuhria bingun Tet Nguyen dan thun ini Kong ndoan Ban raya Ho Chi Minh brei labaih 3.400 ty dong piah sangka ka urang ngak bruk; dalam nan kadung jien ban raya labaih 400 ty dong, banah daok veik jak ba meng gah ngak mbang pablei salih saong kong ndoan di labik. Lien ndoan Ngak bruk Ban raya Ho Chi Minh jeng pato tacei kong ndoan dom pakat pambuak jak ba gah ngak mbang pablei salih ngak ginup ka sarak jien bilan, alin jien Tet saong peih bruk sangka ka urang ngak bruk oh hu kein lagaih nao bhum palei mbang Tet./.