Dom harei jaik tal Tet, meng jalan sit di khu pho Long Hải, phuong Long Hoa, tinh Tay Ninh (ban sit Hòa Thành, tinh Tay Ninh klak) mboh la-an langaoh jang kayua hu gai galau nyang daok bambu bak anak mblang sang.

Galau mbau mboh la-i la-an, sa-ai Lê Thiện Tâm, Po sang ngak nyang Vạn Linh Hương saong dom urang dalam sang ba tangin gheih ghang makre. Urang blah gai tăm, urang papaok nyang, daok urang ba pambu pandiak... abih urang dalam sang ba gauk ngak meng aval masup mbiah tal kreih malam. Tui urang ngak nhang, Tet ieu lac tukvak jal val di abih dalam thun. Bui ralo jang kayua lac nyang Vạn Linh Hương hu mek angan OCOP 4 patuk, harei hrei hu urang pilih ruah ba pandar.

“Mek angan OCOP 4 patuk mai meng kham marat praong, jeng ye padang angan jie di labik ngak. Kayua hu angan tanut siam, sang ngak nyang Vạn Linh Hương hu jalan brei pambak, brei pablei tabiak ralo tinh, ban, tapa di nan daong ka ndap nda kaya nyang Tay Ninh hu ralo urang pandar”.

Truh di palei ngak nyang, nao dua klau mbaik jalan, tuk langik bahrau trun malam, dom baoh giang sang ngak tapei racam mbau hauk ia dru. Palei  ngak tapei racam hu daong di jamraik daong ka ndap nda kaya tapei racam lapih siam samu gauk gheih ghang jang min palei jeng bluh apui luac harei brei ka ganap tapei harei Tet.

Sa-ai Nguyễn Ngọc Sơn, Yam ndok blei salih Kongti TNHH Tân Nhiên, brei thau lac tapei racam ieu lac janih ahar mbang biak bingi di harei Tet, yau nan ye drei caong khin sang halei jeng hu Tet. Tapei racam Tay Ninh harei ini oh daok sa janih ahar tapei yau dahlau blaoh nyu daok ralo janih ralo kaya lagaih lagua tui urang jaman bahrau. Dalam nan tapei racam hu angan OCOP 5 patuk biak chreih ralo brei ka tapei racam Tân Nhiên- Tây Ninh pambak khang, meng dalam tal tabiak langiu nagar. Sa-ai Son ndom manyai lac:

“Tuk ba ndap nda kaya tapei racam tabiak darak pasar dalam jeng ye langiu nagar, ralo urang di langiu nagar thua mbiah angan OCOP… Kayua hu, OCOP daong tame khang brei ka asar janih ndap nda. Kaya tapei racam hu angan jien tabiak darak pasar jeng ye tame siam darak dunya yau ye di Thai Lan dan saong Japan”.

Cagar tagok ceik Bà Đen, jaik si Tet di Tay Ninh tamuh tabiak mboh di mata karei. Harei jaik si Tet, sang ngak apuh mboh yau ye “mbang ndih dalam bein” piah ka baoh karaoh palaik baoh njauk tui hatai, dil samu brei tabiak darak pasar. Sa-ai Lê Minh Trung, Akaok HĐQT HTX Jitvu ngak nong Minh Trung, HTX dang parabha bruk, parabha harei paih baoh ka urang ngak ngak nong. Tui sa-ai Trung, gam hu 100 urang ngak pambuak gauk brei ka bruk ini pambuak gauk, baoh kandiuk nyu “dui” urang ngak nong gam saong bruk ngak bhum palei ngak nong. Oh sa janih phun kayau brei ieik padang harei Tet, baoh kandiuk ceik Bà Đen daok jeng janih ngak mbang karo kajap, khik taneh khik urang brei ka bhum taneh hu angan jie ceik Bà Đen.

“Urak ini HTX ngak siam dalam bruk pablei tabiak langiu brei ka urang ngak urang pala sahnang hatai ngak tabiak ndap nda kaya kan. Gam tui di nan, HTX daok caik hatai iek glang co klaik, halak haling, peih seminan da-a urang ilamu, urang jakar urang gah ky thuat, daong papraong siam ndap nda kaya baoh karaoh palei. Dalam ngak tabiak ndap nda, dalam pablei salih, HTX dang tabiak ngak jeng ye pato padar.

Meng nyang, tapei racam tal baoh kandiuk, thaik thaok palei ngak Tay Ninh dom harei jaik tame darak pasar Tet thun 2026 hu ralo sambo bar gheih makre. Urang pandar dak harei mboh caik hatai brei ka kaya kan palei, ndap nda kaya ndam gam saong ilamu palei. Nyu gam lac kaya krih gam sa janih prein yava bahrau di palei ngak salih bahrau, pasiam ndap nda ngak tabiak, tame angan OCOP jeng ye pambak praong bruk pablei salih kaya kan.. /.