Di dom harei ini, sang sa-ai Trần Thị Lan Thanh daok di palei 4, xa Cái Bè tuk halei jeng jal val saong bilan ngak tapei bong Tet. Sa-ai Lan Thanh brei thau, baoh sang rilo meng lac ngak tapei bong ia tấu yaok thun, min dak jaik Tet dak ngak samar jang kayua tuai damuai kakei blei rilo jang:

“Maong yaom lac, harei bhian tapei bong ngak takik, tal tame dom harei raya Tet urang kakei blei piah ngak kaya alin nan tapei jeng hu ngak tagok rilo. Tuk ini, baoh sang ngak bhian, arthak chreih chrai tagok. Yaom hu tagok labaih 10%. Meyah tuai kakei blei rilo meda ngak tal harei 26 saka ia bulan, suai abih lac harei 27 saka ia bulan, kayua Tet drei jeng brei padeih padei piah mbang Tet”.

Ngak tapei bong hu di xa Hậu Thành, Đông Hòa Hiệp saong ban sit Cái Bè (urak ini lac xa Cái Bè) hu labaih 100 thun. Pandap tamo rilo lac meng tapung habei plom, rilo meng lac meng tinh Tay Ninh. Dahlau diah, labik ini hu labaih 300 baoh sang ngak tapei bong luac thun, rilo meng lac meng jalan ngak meng tangin yau ye: talaok kanduh bei plom, tahanek tathak, chai klik ka laman, srau saong kaya ngak bangi, mbek thaik thaot tapei, blaoh bambu pandiak atau hana la thu blaoh papaok jeng kaya.

Dom thun jaik di ini, kayua darak pasar pablei suai laik, yau nan dom baoh sang khik bruk ngak ini tok daok dom pluh baoh sang. Ong Trần Văn Nhơn, po labik ngak tapei bong ia tasau Nhơn Hoàng, brei thau baoh sang ong hu klau rairah pagam saong bruk ngak tapei bong. Urak ini, yaok bilan labik ngak labaih 10 tan tapei bong; tame tukvak tabung glaong lac harei Tet bhap bini, ngak tagok dua mbang. Dut saong rilo bruk ngak karei, jien mek tame meng bruk ini oh glaong min baoh sang jeng pagam saong bruk piah khik tani tanat bruk ngak bhap bini di mukkei caik rai mai.

Urak ini, labik ngak tapei bong ia tasau Nhơn Hoàng ieu lac sa di dalam klau labik ngak di xa Cái Bè hu buh jien tame ka ndap nda kaya, jamraik hadah karah, pandar jalan ngak “meteh ngak kong” di dom bruk yau sah tapung, hana tapei (oh daok pambak tame bruk bambu pandiak). Meng nan, patrun rilo prein urang ngak, tui katut labaih 60% tukvak ngak blaoh jeng khik kajap salamat hacih sa-at kaya. Ong Nhơn brei thau:

 “Baoh sang dahlak hulin pagam haong bruk dom pluh thun ini mai, nan tuk hu tani tanat blaoh ye patui veik ngak. Hatai caong di dahlak lac salih lagaih ilamo ky thuat piah patagok tui jalan ngak kong, tal ini hu salih saong rep hu di tanut lagaih. Urak ini dahlak caong khin hu gah buh jien tame pambuak piah peih praong bruk ngak. Bingun Tet, mikva dlaam labik bhian blei mai piah pablei di darak, dom labik padeih radaih, labik jirah rivang saong pablei online. Tet ye ngak tagok 1,5 mbang tal 2 mbang dut saong harei bhian, darak pasar blei rilo ye drei ngak rilo.

Di labik jirah rivang sang yao klak meng kal Ba Đức, xa Cai Be, tapei bong ngak di ini jeng hu parang saong pablei yau sa janih kaya ngak inem krung ka tuai damuai. Sa-ai Nguyễn Quang Vinh, po sang yao klak Ba Đức, brei thau:

Drei ngak tapei bong hadang saong tapei bong taba, tuai jeng blei. Tuai tame mai mbang jeng takre. Tapei drei ngak jeng 10 thun ini paje, hu OCOP, tapei pablei hu lagaih. Tuai mai rah rivang, blaoh mbang huak kreh pandiak, ndih padeih blaoh hu mbang kaya mbang hu angan di bhum palei drei”.

 Tinh Dong Thap urak ini hu biak rilo palei ngak bruk bhap bini meng tangin, dalam nan hu bruk ngak tapei bong di xa Cái Bè. Baoh tapei bong rik daong ngak ka var mbang harei raya Tet hu bangi jang, ba mai hatai bui sambai ka tuai damuai jirah. Min, piah bruk ngak tapei bong Cái Bè khik tani tanat saong pasiam yau dahlau diah, biak khin hu bruk sangka, daong di dom gah jabat saong dom pakat karja, rilo meng lac bruk salih bruk ngak meng tangin tapa jalan ngak kong, jeng yau jhul khang bruk yaih khan kaya piah ka tapei bong dak harei dak hu nao tal rilo labik./.