Dalam labik Hop tac xa ngak nong saong ngak tabiak pablei salih pacuk – pacuk thu – pho thu Chi Lang – Khanh Xuan, phuong Thanh Nhat, tinh Ndak Lak yaok me pacuk – mien – pho hu ba tame ngak tabiak, pluh thu, tapok ba-ar gam gam piah dil ba tabiak darak pasar. Ong Hà Văn Tuyến, Akaok Họi ndong quan tri HTX brei thau: Piah duh ka darak pasar Tet Nguyen Đan Binh Ngo, HTC hu brei patagok dom janih kaya kan ndap nda, pah ralo jang manuac urang ngak tui waktu, kuhria caga ginup abih ndap nda piah ngak tabiak saong ba tabiak jalan ngak ka nyu laghaih piah grap tanat halaw pabak brei ka nyu tani tanat. Ong Hà Văn Tuyến brei thau:

“Akaok thun saka aia harei saong puac thun saka aia bilan ye khaol dahlak kuhria caga jaik 40% ndap nda ngak tabiak patagok dut haong dom bilan karei. Langiu di nan, khaol dahlak daok kuhria caga urang ngak ngak bruk tui tukvak ngan haong ndap nda kuhria ngak tabiak piah laghaih saong grap ranat halaw pandap pabak brei tabiak darak pasar dalam tukvak raya Tet”.

Bruk jan van jeng brei mboh cambaih laih di dom labik ngak tabiak ndap nda kaya ngak nong prong. Di Kong ty TNHH Đuc Thinh – sa di dalam dom jabat ngak tabiak asal pa-aok blait dalam tinh – dom talei nduac ngak tabiak, kak pok daok nduac si abih prein di nyu. Amuk Nguyễn Ngọc Thùy Sơn, Urang dang akaok tacei pato kong ty brei thau, langiu di darak pasar pablei tabiak langiu nagar, masa tuk puac thun jabat pataom tame rilo jang ka darak pasar dalam negar, abih di nyu lac duh ka bruk cai pandar dalam tukvak Tet. Jabat jeng hu ngak tabiak dom janih ndap nda bahrau, caik hatai tal thaik thaok ndap nda piah paglaong bruk duah thau ka angan je.

“Jabat hu ngak tabiak dom janih ndap nda bahrau ngan haong thaik thaok brei mboh ka makna jum pataom. Daok ndom ka yaom pablei, jabat khik tamo yaom pablei si sang mac, tok hu takik ndap nda rakik veik yaom kaom tagok jaik 5% kayua jien blei ndap nda tame ngak nyu patagok. Dalam tukvak masa raya Tet, ndap nda pablei tabiak darak pasar dalam negar tagok jaik 10%”.

Di gah Pur tinh Ndak Lak, rilo labik ngak tabiak ndap nda kaya OCOP tui jalan ngak di baoh sang jeng daok kacah gauk nduac dil tukvak piah pabak brei ganap ndap nda ka darak pasar raya Tet. Di labik pablei salih dom janih ndap nda OCOP di xa Song Hinh, dom janih pandap yau menuk tapok sara, limo sa pandiak, limo caik ghing, meuk thu, pabui thu hu ngak tabiak saong tapaok gam gam.

Ong Nguyễn Duy Hùng, po labik ngak tabiak Hung Mien brei thau, mbang aia sua meng blaoh ngak pambak biak rilo tal halaw ndap nda piah ngak jeng yau tukvak masa ngak tabiak, yau nan min urak ini jabat ini daok pasiam bruk ngak di drei piah pabak brei tabiak darak pasar. Ong Hùng khan brei thau:

“Khaol dahlak daok duah blei tame ndap nda kaya kan piah ngak, peih ngak gam gam piah duh ka darak pasar Tet. Tukvak Tet thun ini, hatai caong khin blei pandar tui kuhria meda patagok jaik 35% dut haong bhian harei, yau nan min yaom kaom pablei tabiak oh patagok rilo”.

Gam haong bruk kham merat di urang pablei salih saong baoh sang ngak tabiak, bruk khik iek darak pasar, grap tanat hacih sa-at ndap nda jeng hu dom gah jabat karja peih ngak catang. Dom gah jabat karja njauk ngak catang bruk pasang iek, khik iek dalam tukvak masa tabung glaong di puac thun.

Yaom lac mada jeng daok gaok rilo kan kandah kayua hajan ribuk aia ndik aia sua caik veik, min ngan haong hatai kham merat, nan ye bruk jan van di dom labik ngak tabiak, pablei salih gam haong bruk peih ngak catang di dom jabat karja, darak pasar ndap nda masa raya Tet di Ndak Lak hu caong khin meda parilo jang, pabak hu hatai caong khin blei pandar di bhap bani dalam tukvak masa raya Tet Nguyen ndang mai meng anak tal./.