Tui iek dom harei ngak bruk di nyom raya, TS Bùi Ngọc Hiền (Akadami Urang karaja di Ban raya HCM) mboh njauk hatai kayua bruk marat hatai ngak mai meng harei nyom Raya.

Tui ong, Nyom Raya mbang ka XIV ieu lac sa bruk praong, taong yaom khang tame glo akaok jeng ye brei ka ba bruk ngak kinh te - xa hoi. Harak gal pok tagok Nyom Raya ba prein yawa brei ka bruk “ngak chip capat dan gam samar”. Bruk salih cara ngak di urang pan akaok yau ye anek ciar patom ba prein khang bruk ngak di nagar:

“Drei sahneng lac meng anak tui sarak di Nyom Raya XIV di Ndang ba patambak prein khang piah jak ba ralo jang praong jang brei ka bruk patagok taneh ia nagar dalam jaman bahrau. Caong lac kon drei mek hu ralo baoh siam makre, peih jalan siam lagaih brei ka taneh ia tagok”.

Jeng tui sa hatai yau nan, ong Phạm Chánh Trực, dahlau ngak Phaok Bi thu Thuong truc Ban uy Ban raya Ho Chi Minh taong yaom glaong dom panuac pok tagok harei Nyom Raya. Ong jie tame dom harak meng harei Nyom Raya jeng jalan yam tal thun 2045 (harei hadar 100 thun padang taneh ia nagar), pok Viet Nam jeng nagar ngak kong tagok glaong gam song jien tame brei ka yaok urang takik di nyu meng 15.000 – 20.000 USD/thun:

“Dahlak jie lac Harei Nyom Raya mbang ka XIV di Ndang mada peih akaok ngak siam dalam bruk ngak tui jalan ngak kong nghiep hoa, hien dai hoa nagar. Dahlak hulij jie tame jeng ye cang tame dom sarak ngak, dom jalan ngak cambaic, dom bruk ngak cambaic brei ka bruk pan akaok di Ndang drei, yau ye Ban Chap hanh Trung uong Ndang hu pilih ruah dalam harei Nyom Raya mbang ka XIV ba tabiak ba ngak cambaic laic”.

Dom baoh kadha praong di Harei Nyom Raya mbang ka XIV di Ndang ieu lac ngak brei sampurana jalan patagok dan saong Nagar Nha nuoc phap quyen xa hoi chu nghia, mek bruk ngak brei ka talei dut; kham marat klak co che "lakau – brei "dan saong kaoh klak maneng harak gal oh tapak gah karja. Bruk ngak ini ngak brei ka pachreih brei ka urang ngak mbang. Luat su Phạm Ngọc Hưng, Phaok akaok Jabat Roh duah bahrau saong patagok karo di Lien hiep dom kapul Pahasa Ilamu dan saong Ky thuat Viet Nam, brei thau lac:

“Mayah caong khin biai yah dom jalan nao tui Nyom Raya mbang XIV ba tabiak, ieu lac padang co che bahrau mek bhap bini song urang ngak mbang blei salih nao akaok oh lac brei ka urang iek glang. Gai taong yaom brei dut iei ieu lac majam jabat jeng ye karja nagar meng jeng bruk kadha. Urang ngak mbang blei salih caong lac jaman bahrau mada hu yam nao khang kadang jang”.

Amuk Lý Kim Chi, Akaok Pahasa Ndap nda kaya mbang Ban raya Ho Chi Minh brei thau lac, dom sarak bahrau daong ka urang ngak mbang yam tagok ralo jang, daong siam tame bruk patagok karo. Muk caik hatai caong tame dom janih ilamu kong nghe, salih lek taka so saong salih bahrau mada ba mai ralo baoh siam makre brei ka manuac urang:

“Mayah khin patagok kong nghe ye co che pok glaong manuac urang hu ilamu, taong yaom tui dom janih ndap nda, uak yaom jien ndo, thau pambuak bruk palei nagar saong bruk yaok urang, dak brei ka roh duah gam saong bruk di darak pasar. Tal tuk ilamu khoa hoc kong nghe tame bruk ngak mbang, blei salih nyu mada daong peih siam bruk ngak tabiak ndap nda brei ka urang ngak, pakurang hu jien buh tabiak di rahra jeng ye jhul patagok karo”.

Nyom Raya mbang XIV tamat blaoh, peih tabiak jalan patagok bahrau tui hatai caong khin. Tui jalan nan, caong lac Viet Nam mada ngak njauk jalan nao di drei, sarak ndang nagar aval ba tal akaok mbram di harei oh daok atah./.