Dom harei ini baoh sang amuk Bùi Thị Phụng daok di Thạnh Mỹ A, phuong Cai Rang ot tanot cang harei ramik tame baoh sang bahrau piah taduan raok suan thun bahrau. Sa-ai Phung khan mayai lac, baoh sang di sa-ai hu rai diuk biak kan kandah. Dua hadiuk pasang di gait nao ngak jang padang sang piah raong 3 urang anek min njauk padeih bruk dua thun ini kayua ruak hakik. Oh hu taneh pala drak, tok hu 100m2 taneh amaik ame brei piah ngak sang, yau nan baoh sang klak daning hala di baoh sang sa-ai taik tahak abih, daning jandia. Anak bruk yau nan, Mbo Chi huy bol lin ban Can Tho gam haong karja puk palei hu daong ka sa-ai 60 trieu ndong piah padang ngak sang bahrau ka nyu siam gheih.

“Baoh sang meng kan diah dua tapen daning tak meng hala kayau, blaoh angin prong ngak tapal tabung sang, mblein ndia yau nan. Hajan aia tanjah anek amaik  pambuk gauk daok pataom veik, angin ribuk ye oh khin ndih. Hu baoh sang piah luak tame luak tabiak jeng mboh bui sambai paje."  

Dalam tuk nan, di Yen Thuong, phuong Cai Rang, gah karja puk palei jeng daok jak pataom manuac urang,jammariak ndap nda piah samar drah ngak salah blaoh bruk pasiam veik canah jalan Nguyễn Việt Dũng atah 700 m, ngan haong phun jien labaih 26 ty ndong. Ini lac canah jalan piah pajeng ba ndap nda meng darak candong Cai Rang nao tal dom labik karei min tukvak tapa khut khat biak triak. Amuk Lê Thị Cầm-urang daok di labik Yen Thuong khan brei thau lac:

"Jalan mbak ye mboh jeng hu ngak salah blaoh meng labaih 12 thun dalau. Sit sot, jeng jak, jeng hu sruh menuk sruh ada. Blaoh urak ini Karja peih prong tabiak, sa binah prong sa mét tra piah ka jalan mbang nyu laneng lanoi, radaih pajeng ndap nda trun tagok nyu mbuan laghaih. Ngak yau nan ye hadei ini darak candong Cai Rang mboh bui sambai jang. Thun bahrau mai tal jalan mbak hu ngak bahrau yau ini ye mboh biak bui sambai chreih chai."

Thun ini, ban Can Tho hu peih ngak raya Tet Bol lin Bhap bani di 6 labik di phuong Hung Phu, Cai Rang saong dom xa Truong Long, Phung Hiep, Hoa Tu saong Vinh Hai, ngan haong kadha: “Uan Ndang, raok thun bahrau thun Asaih; anit Ndang hatai bhap bani, yam tame ky nguyen bahrau”.

Gam song phuong Cai Rang, meng akaok bilan 11 thun dahlau hu peih ngak rilo bruk ngak hu angan dalam tukvak Tet Bol lin – Bhap bani. Urak ini, phuong daok pambuak bruk haong gah Mbo Chi huy bon lin ban, dom so, dom gah, kuhria caga alin hadiah 350 pok pandap brei ka urang kathaot saong baoh sang sarak karja, alin brei 20 sruh radaih juak saong 50 pok jien bac ka anek saih kan kathaot; peih ngak bruk pasang iek ruak, alin brei pandap ka 300 bhap bani saong pataom mbaok alin brei 250 pok pandap ka dam dara tame bol lin... ong Vương Công Khanh- Akaok UBND phuong Cai Rang brei thau:

"Phuong meda pataom tame pambuak bruk haong dom so, dom gah di ban, abih di nyu lac Thuong truc Mban peih ngak bruk raya Tet Bol lin – Bhap bani ban Can Tho meda jak ba dom urang ngak pahla piah daong alin brei pandap Tet ka dom baoh sang kathaot, baoh sang jaik kathaot, baoh sang hu rai diuk kan kandah, dom urang laman lamuac dalam rah ra. Dalam nan, abih di nyu lac meda alin brei pandap ka dom urang pablei salih angaok darak pasar kandong piah rik daong tame bruk khik ramik jeng yau cak rok patagok bruk rivang ma-in darak kandong dalam tukvak masa mai meng anak."

Meda mboh lac, tapa bruk ngak raya Tet Bol lin – bhap bani thun 2026, ban Can Tho oh lac sa janih hu ba mai kadha bui sambai, bruk klah rabha ka bhap bani hu rai diuk kan kandah, bo daok ngak jeng inem dalam ka hatung hatai di bol lin saong karja puk palei. Dom bruk ngak hu mboh di anek meta, biak hu makna daok ngak brei pasiam veik hatai jia di bhap bani, pabak veik talei rohim pambuak bruk nao mai bol lin – bhap bani dak harei dak khang kajap, gam pamaong tal sa thun bahrau trei sil, bak hatai anit ranam./.