Kol dahlak nao rivang  trang trại raong limo ia tasau di sa-ai Nguyễn Trung Lập daok di palei 5, xã Bình Mỹ, huyện Củ Chi tuk page mesup. Njauk di nyu, ini lac tuk urang raong daok jar var brei limo mbang piah caga iak mek ia tasau. Yau nan bo sa-ai Lập jeng daok thong thả menyum cà phê, yaom lac 25 drei limo ia tasau tok hu ta-eng sa-ai glang iek, oh lac 3 urang glang iek yau dom sang karei. Nao rivang trại limo ia tasau gah likuk sang, kol dahlak tatuak drei mboh taong abih bruk dalam trang trại meng menei ka limo, brei limo menyum ia, pataom mek khak limo jeng hu jamriak ngak, nan lac dom jamriak hu sa-ai Lập ngak tabiak. Hareik ka limo mbang jeng hu jamriak cakak bloh ba mai tal var ro. Kadha praong di abih dalam bruk ngak di sa-ai Lập lac pasiam saong caik máy nhịp tim piah iak ia tasau limo. Jamriak sit, mbuan padar, min paglaong pren meriak gauk ka mikva urang ngak ong. Meng sáng chế ini, sa-ai Nguyễn Trung Lập jeng 1 dalam 17 urang nong hu Thủ tướng brei harak meyaom dalam tuk peih bruk pok meyaom hợp tác xã, tổ hợp tác saong urang nong sáng tạo thun 2016. Sa-ai Lập lac:

"Tuk drei ngak, drei kuhria mboh abih dom rituh ribau min, bloh tuk ngak, drei njauk blei sa sruh radaih jhul bahrau piah roh duah. Bruk nan nyu abih rilo tukvak. Bruk iak mek ia tasau limo lac tuk pagaiy mesup saong biar harei. Tal tuk nan bo drei roh duah oh ka bloh atau nyu khut ye drei oh ngak samu."

Tabiak truh bhum taneh Củ Chi, kol dahlak nao rivang labik pablei ikan cảnh di xã An Phú Tây, huyện Bình Chánh di ong Nguyễn Văn Thạch,urang ngak meda meng sahneng tabiak jamriak raong ikan lăng saong iakn cảnh angaok taneh praong oh ka tal 500m2. Dom jamriak raong ikan di ong Thạch biak đơn giản, hu sa jamriak bơm ia, dom điện tử peih dom van nding ia, 2 thùng ia meng nding katak jaik 15m3, 1 danao ia 10m3 taphia nan, sa jamriak halang ia saong dom nding katak piah ia nduac. Tapa nan, raong hu jaik 30 kg ika pajaih, jien ngak abih jaik 100 triệu đồng. Dalam sa chu kỳ labaih 2 bilan, urang raong meda mek veik hu phun jien. Ong Nguyễn Văn Thạch, pok labik raong ikan cảnh An Phú Tây brei thau:

"ahlak eng drei roh duah, ngak tabiak kayua drei khin blei jeng oh hu, kayua lingiu darak pasar oh hu. Tuk nan, dahlak raong ikan mboh nyu njauk hu. Dahlak ngak rilo janih, puac di abih meng ngak hu nyu. Dahlak hu ba nyu tame pandar mboh biak mbuan. Tuk khut, drei meda pasiam veik hu."

Angaok nan lac  2 dalam yaok pluh urang nong hu công trình nghiên cứu khoa học daok hu pandar dalam raong glang, pala drak di ban raya Hồ Chí Minh. Di grauk dom xã palei pala bahrau di ban raya, bruk  urang nong sáng tạo daok chreih chrai rah tabiak. Dalam nan meda ndom tal dompandap ba mai kein laba, siam lagaih yau ye: jamriak ka hadang mbang pambuak saong palao ikan rô phi dalam danao raong hadang takai mbong di ong Võ Văn Công daok di xã Lý Nhơn, huyện Cần Giờ; pruh rau meng pandar tin nhắn điện thoại di động di ong Bùi Ngọc Minh Tâm daok di phường An Lạc, quận Bình Tân; bruk xử lý ia raong hadang meng Zeolite  njom  na-nô bạc di huyện Cần Giờ;  bruk khik ia dalam ngak sara; bruk raong ring ralo meng anek pajaih nhân tạo di huyện Nhà Bè...

Ong Trần Trường Sơn, Phó Chủ tịch Kapul urang ngak nong ban raya Hồ Chí Minh brei thau, ban raya daok pataom dom urang nong takre roh duah ilamu saong hu dom jalan công nghệ dalam pala drak, raong glang, chế biến saong pablei pandap piah padang dom kalup kapul urang nong  sáng tạo, meng nan daong ka urang dalam bruk ieu pataom phun jien saong pablei pandap:

 "Kalup kapul urang nong sáng tạo ini meda duah thau, roh duah tapa bruk daong di Kapul urang nong ban raya saong  Sở Khoa học - Công nghệ piah padang dom đề tài roh duah cambaih laih. Dalam nan hu bruk daong di dom urang ilamu piah pambuak dom urang nong, urang ilamu, karja saong  doanh nghiệp piah kol drei patagok kein laba jang bruk sáng tạo di urang nong dalam thun 2017."

Dom urang nong sáng tạo dalam roh duah ilamu nan lac bruk ngak hu meng sarak daong patagok ngak nong tui chuỗi giá trị, pamaong tabiak darak pasar di ban raya Hồ Chí Minh. Urak ini hu 3 labik piah daong urang nong gah bruk ini, lac Sở Khoa học - Công nghệ, Sở ngak nong saong patagok palei pala, kapul urang ngka nong ban raya Hồ Chí Minh. Bhum ngak nong Công nghệ glaong di ban raya daok ngak iek hu rilo bruk sản xuất tiên tiến, ngak jeng pren khang pambak praong ilamu công nghệ dalam gah ngak nong.

5 thun tapa, ban raya Hồ Chí Minh hu peih ngak 18 đề tài roh duah ilamu duh ka danak dak salih bahrau bruk ngak nong tui jalan ngak nong đô thị saong yaom jien abih jaik 14 tỷ đồng. Rilo urang nong khang hatai buh jien tabiak roh duah, ngak tabiak saong ba tame pandar dalam sản xuất, ba mai kein laba glaong. Yau ye amuk Nguyễn Thị Bảy,sa-ai Trần Ngọc Tuyết hu tapa tal Trung Quốc, Thái Lan bac megru ilamu pabam pajaih saong iek glang bingu lan, duah tabiak dom janih lan mekre, năng suất glaong ka mikva urang ngak nong huyện Củ Chi.

Tui jalan dak padang bruk ngak nong bahrau, ban raya Hồ Chí Minh daok ba mbuan lagaih ka urang nong hu phun jien piah roh duah saong pandar dom ilamu bahrau dalam bruk ngak. Min ngan saong dom bruk roh duah sit sot, bruk daong di dom sở, ban ngànhgaok kan kandah kayua dom thủ tục hành chính dalam bruk padang  đề tài saong jien peih ngak. Ong Trịnh Minh Tâm, Phó Giám đốc Sở Khoa học saong Công nghệ ban raya Hồ Chí Minh brei thau:

Dom urang nong sami samar, hadah krah daok rik daong ngak brei salih bahrau jalan bhian randap ngak meng tangin, sit sot, năng suất biar piah pamaong tal sa brukngak nong bahrau, hiện đại di ban raya Hồ Chí Minh. Dom urang nan, yau dom baoh bingu, daong ngak brei mekre jang bilan xuân di ban raya angan Wa harei ini./.