Kuhria tal harei 6/7, ban raya HCM hu 13 sang iek ruak Covid-19

Cục Khik ramik bruk dut iek ruak, jru ruak di Mentri Y te birau payua harak samar chip ka dom Sở Y te dom tỉnh, ban saong dom labik y te ka bruk khik iek urang ruak Covid-19 saong gauk gar di urang ruak dalam sang iek ruak njauk brei daok karei gah y te. Tui nan, birau ini hu bruk urang ruak Covid-19 dauk tabiak truh labik taong ruak Covid-19, saong urang ruak, gauk gar urang ruak ngak oh njauk bruk ba tabiak ka tukvak daok karei di dom sang iek ruak. Cục Khik ramik bruk dut iek ruak, jru ruak caong khin dom Sở Y tế, dom mentri dom gah tacei pato dom labik dut iek ruak, jru ruak di drei, samar khik iek saong taong ruak ka urang ruak pambuak bruk saong dom jabat piah pasang iek, duah thau saong patagok dom jalan ngak piah khik iek urang ruak Covid-19 daok taong ruak di labik iek ruak tui bruk ba tabiak di Hukum ruak njom mbak.

Kuhria tal harei 6/7, ban raya HCM hu 13 sang iek ruak Covid-19. Lingiu di nan, labik daok tái định cư di phường An Khánh (ban Thủ Đức) jeng hu salih jeng sang iek ruak dã chiến iek ruak Covid-19 ka 3, hu 3.000 papan ndih iek ruak saong tui kuhria, hu peih pabah mbang taduan menuac ruak tame meng 8/7. Langiu di nan, Sở Y tế daok kuhria padang sang iek ruak dã chiến taong ruak Covid-19 ka 4, hu meng 3.000 tal 5.000 papan ndih iek ruak meng salih bruk di labik tái định cư dalam phường Vĩnh Lộc B (huyện Bình Chánh). Yau nan, meng bruk hu dom sang iek ruak dã chiến, urak ini, ban raya HCM hu 15.000 papan ndih piah taduan tame saong taong ruak ka urang njauk Covid-19 dalam ban raya.

Page ini 7/7, tỉnh Phú Yên birau brei padeih 2 labik pakacah tamat THPT thun 2021 mbang 1, ngan saong labaih 700 anek saih brei salih tapa pakacah mbang 2, kayua 2 labik nan mboh pambuak tal menuac ruak. Daok di tỉnh Quảng Ngãi, meng biar harei kabroi tal dah page ini, Sở Y tế tỉnh Quảng Ngãi brei thau hu 23 urang njom virut SARS-CoV-2, dalam nan hu 6 urang dalam bhap bini, tui nan, abih tih urang dương tính di tỉnh ini tagok 142 urang. Tỉnh Quảng Ngãi daok pataom tame pasang iek jalan pacang caga jit, bruk brei daok karei, duah urang taom gaok manuac ruak, mek mau dut iek…caga blaoh blai meyah hu ruak njom mbak.

Yaom lac gaok rilo kan kandah meng jit ruak Covid-19, min bruk dui pachreih urang buh jien tame ngak mbang di tỉnh Long An dalam 6 bilan akaok thun jeng daok mek hu rilo siam mekre. Abih di nyu nan lac, Long An lac tỉnh dang akaok taneh ia ka dui pachreih phun jien negar lingiu buh tame ngak mbang. Hu thau, tỉnh hu brei harak chứng nhận đầu tư ka 77 danak dak dalam taneh ia haong yaom phun jien tut angan lac jaik 5.600 tỷ đồng saong 30 danak dak di negar lingiu ngan saong yaom phun jien tut angan lac labaih 3,3 tỷ USD; dalam nan, ta-eng danak dak sang mac điện LNG Long An I saong II hu phun jien tut angan labaih 3 tỷ USD.

Piah langyah bruk kurang ia pandar ka bhap bini di dom palei dalam dom bilan thu thun 2021 saong dom thun anak tal, Sở Ngak nong saong patagok palei pala tỉnh Bình Thuận birau pok panuac tagok UB bhap bini tỉnh brei pasang iek, daong saong likau Trung ương daong jien kuac 39 baoh bingun ia, blei 414 bồn padang ia, ngak 1 kuang padang ia saong pasiam veik 1 kuang padang ia di huyen Tánh Linh ngan saong yaom jien jaik 5 tỷ đồng. Langiu di nan, likau tỉnh pasang iek, daong jien piah pasiam, peih praong 26 danak dak ba ia pandar di dom bhum palei dalam tỉnh ngan saong yaom jien abih tih 292 tỷ đồng. Kayua biến đổi khí hậu, dom bhum palei yau Hàm Thuận Bắc, Hàm Tân, Tánh Linh, Đức Linh…bhian kurang ia pandar dalam tukvak katut panak di bhum atah bayah, oh hu nding raok ba ia.

Rajaei Japon tabiak adat brei ngak catang bruk pasang iek menuac mai meng rilo taneh ia piah pacang cakak bruk njaom tame di dom anek ruak bahrau di SARS -CoV-2 ba ruak Covid-19 tame taneh ia ini. Dom menuac negar lingiu nan jeng brei dut iek virus SARS-CoV-2 hadei di harei ka 3, harei ka 6 saong harei ka 10 kuhria meng harei tame negar Japon.

Anak bruk jit ruak Covid-19 daok rah tabiak dalam sraw kadau, dom urang njom Covid-19 biến chủng Delta njom mbak dalam bhap bini jeng daok tagok rilo hadei di 12 harei ba tabiak adat brei pacang veik, ban Sydney di Australia brei dui atah harei pacang veik ban Sydney peih praong saong bhum jaik taphia sa adit tra tal harei 16/7. Anek saih jeng hu salih tapa bac online.

Pabak veik bruk caong khin di menuac takre angaok dunya, Harei pataom phim Cannes mbang ka 74 hu peih tabiak di pasak peih bruk praong Palais des Festivals (negar Prang), brei mboh bruk mai veik di gah điện ảnh dunya hadei di labaih 1 thun kandang joa kayua jit praong COVID-19. Dalam tuk dom bruk pa-atah di gauk daok ngak brei trun meneing dom bruk ngak praong, nan ye harei pataom phim Cannes thun ini meda trun meneing bruk chreih chrai, bui sambai bhian mboh./.

Urang lang: M. Phương – Ái Nghiêm – 07/07 4:19:05 PM