Patui veik danak dak mbang nyaom ka 2, Quoc hoi mbang 16, page ini, Quoc hoi ginum biai ka 6 hukum. Dalam nan,hu bruk kuhria jien ndien tui jalan pasang iek jien cai pandar, cambaic laic saong parabha dom khat lahik hu dom urang jakar Quoc hoi biak caik hatai sangka. Yaom jien ndien oh lac jien cai pandar yaok bilan di yaok baoh sang bo daok lac bruk oh kurang hu dalam bruk ngak mbang pala drak, pablei salih saong pabak jitvu. Yau nan min, hukum pasiam veik, pabak dom asar kadha di Hukum Den luc njauk brei ngak tui hukum tani tanat tuk rahra  thau drei bayar dom jien hagait saong thau ka bruk halei drei oh njauk bayar.

Thanh uy TPHCM birau taom mbaok ayuh Harei pahadar dak padang dom jabat chuyen trach, daong bruk ka Dang saong Harei Urang kumei Viet Nam 20-10.  Di var pataom mbaok Pho Bi thu Thanh uy TPHCM Đặng Minh Thông ndem meyai yau ini: Dom bruk rik daong biak praong, ngak brei patagok jabat, don vi, baoh sang saong di TPHCM. Urang ngak praong di TPHCM tuk halei jeng caong khin dom adei sa-ai  kumei patagok bruk ngak hadah trah, naih joi, abih hatai taduan bruk ngak birau piah daong dak harei dak  hu rilo jang ka bruk dak padang saong patagok di TPHCM.

Tui khaw tin meng He thong klau jru VNVC, jaik 40.000 jru vaccien caga ruak não mô cầu hu brei klauk di jaik 300 pasak dalam negar klauk dalam 4 harei tapa, patagok 3 mbang dut saong tukvak ini thun dahlau. Ta-eng TPHCM hu jaik 15.000 mbang vaccine, tagok 125 mbang dut saong thun dahlau. Tui Viện Pasteur TP.HCM, dalam 10 bilan tapa, di bhum meraong  negar  hu 42 mbang urang ruak não mô cầu, dalam nan 7 urang metai. Klau sruh jit ruak  di sang bac saong labik pataom mbaok bac megru di An Giang, Cà Mau saong TP.HCM.

Tui Viện Pasteur TPHCM, 9 bilan tapa urang ruak pandiak tabiak darah SXH di bhum meraong negar tagok tal 60%, glong jang ralo dut saong 2 thun dahlau. Piah kuhria caga jit ruak, Viện Pasteur TPHCM caong khin pasak pasang iek ruak kik di dom tỉnh, ban pambuak dom balai y te xa, phuong tui iek catang saong taong yaom yaok adit yaok urang ruak di labik daok, khu pho piah pacang jit. Dom bhum palei  brei padang Kapol urang iek ruak, sanya taong abih sruh jit ruak pandiak tabiak darah SXH brei pruh jru, dalam nan brei ramik hacih taong abih dom pandap hu ia kandong.

Tinh Lam Dong brei padang jalan Gia Nghĩa - Bảo Lâm atah labaih jaik 9 km, nao tapa Đông Gia Nghĩa saong  xã Bảo Lâm 5, hu jien buh tame ngak 2.850 ti dong. Bruk praong di danak dak lac tatua tapa kraong Dong Nai atah labaih 1.166m, hu tatua talei tuan. Jalan  birau pambuak Nam Tay Nguyen gam haong bhum gah Pur negar, daong pajeng pandap pandar kaya kan pambuak  pasak quang boxit, patia kim ban Tân Rai haong pasak kong nghiep Nhân Cơ.

Thủ tướng Italia Giorgia Meloni bahrau pataom mbang nyaom biai rajaei piah biai ka jalan khik kajap an ninh siam mekre, hadei tuk riyak trun jalan ngak cagar ka jien pandar glaong tagok saong asar siam jitvu karja kurang salih jeng taong paoh di rilo ban medin di puac adit blaoh. Canh sat hu mek kareik 271 urang sit umo dalam dom mbang trun jalan srau kadau di ban Milan di harei 18/10. Rilo srau kadau di Italia rah tabiak dalam bruk negar jaik taphia Prang jeng gaok dom mbang trun jalan praong.

Bộ Điện tử saong Công nghệ Khau tin Ấn Độ (MeitY) bahrau ini hu caong khin Kapul Meta pasang duah thuat toan patabiak asal kadha di angaok Facebook saong Instagram, piah patakik bruk pambak tabiak rilo dom khau tin meda ngak nda suan, pacuh taong paoh atau ngak kan kandah tal siam mekre bhap bini rahra. Langiu di nan, Bộ jeng caong khin Meta pambuak dil samu haong dom jabat ngak hukum pabak khau tin, du lieu pambuak saong daong langyah dom asal kadha mbuan ngak suan hukum.

Kapul Jalan Tasik Dunya (IMO) patui veik pachreih dom gilai plaih nao tapa eo tasik Hormuz saong patakik ngak bruk pablei salih di labik ini, dalam tuk dom mbang gilai pajeng kaya njauk đạn meng tuk mesuh metak di Mỹ, Israel saong Iran rah tabiak di meng puac bilan 2, ngak ka takik abih 24 urang nao gilai metai. IMO kakei caga bruk ngak di tasik salamat kan si pasiam meyah dom makna gok agha di mesuh oh ka hu langyah./.