Harak taka so ilamo Viet Nam hu ngak bahrau, daong rahra mbuan duah dom danak dak ilamo, pahat padhih, jirah rivang dalam negar, gam haong nan pambuak siam lagaih pamaong tal Harei Ilamo Viet Nam (24/11). Kaya ini meda pandar lagaih di angaok komputer saong smartphone. Harei hadei, ini lac bruk pambuak siam lagaih, jhul tagok bruk cakrok karo kajap di gah ngak kong ilamo Viet Nam. Kuhria, Harak taka so ilamo Viet Nam pandar ngak iek meng harei 1/11 anak tal.

So Ilimo, Padhih the thao TPHCM birau ba tabiak Jalan peih ngak dom bruk pachreih Harei Ilimo Viet Nam thun ini. Tui nan, meng harei 20 tal harei 24/11, di Jalan tapuk TPHCM ( phuong Sai Gon), kapol tapuk ngan haong kadha “ Ilimo Viet Nam tapa dom blah tapuk” hu peih ngak duh ka bhap bini. Di labik ini bhap bini saong tuai damuai hu rivang iek labik parang dom tapuk ka drap ar, sajarah saong tuai damuai saong akayat Viet Nam. Nyaom pataom tapuk daok hu peih ngak dom bruk pataom mbaok urang vak tapuk, tabiak mbaok tapuk saong Harei Ilimo Viet Nam.

Dom rairah daong gaik pandar ilamo kong nghe, duh hatai caong yaok harei saong khik bruk pambyak pagam dalam baoh sang. Ini lac asal kadha hu brei mboh tapa mbang kacah “Baoh sang salih taka so” bahrau hu tinh Dak Lak kuhria taong abih, alin yai. Dom kadha brei mboh bruk pandar ilamo kong nghe dalam bruk daok dang, ngak tabiak, bac megru saong bruk daong dom uảng dalam sang. Ong Nguyễn Quốc Hiệp, Phaok Yam ndok So Ilamo, Pahat padhih saong Jirah rivang tinh Dak Lak brei thau, bruk ngak tapa mbang kacah brei patui veik yaih khan di labik.

Gilang khik piah drap ar Urang kumei meraong negar birai parang iek kadha “ Blah ao bà ba – Gheih  takre di Meraong negar”, pamong tal pahadar 96 thun Harei padang Kapol urang Kumei Viet Nam (20/10/1930 - 20/10/2026). Gam haong nan lac kadha parang iek thaik khan ao tui kadha “ Ao bà ba – Meng kan saong hadah krah”, hu mbaok tame di dom saih bac Cih thaik khan ao. Njauk ndem tal blah ao bà ba labaih 50 thun di baoh sang nhà sưu tập Huỳnh Minh Hiệp, drap ar ndung bak sajarah dakrai saong pahadar di raidiuk urang Meraong negar.

Dalam bilan raya adat Sene Dolta, mikva bangsa Khmer Meraong Negar pamaong tal mukkei, ong amuk mei, amaik ame plang lahik meng rilo adat bhap bini meda makna siam mekre. Di sang baha Somrong Ek, phuong Nguyệt Hóa, tinh Vĩnh Long, adat caik bát hội hu khik tani tanat luac 15 harei, oh tok brei mboh adat thau dhar phol blaoh daok kak kajap hatai anit ranam dalam bhap bini. Ngan haong bhap bini Khmer, ini oh tok lac adat aguma blaoh daok lac harei piah anek taco pahadar, thau dhar phol prein pajeng, raong ba di ong amuk mei, amaik ame saong dom rai rah nao dahlau.

Di Hồng Kông, Trung Quốc, dom urang takre nghe thuat daok hu iek dom blah thaik binguk di urang cih angan Van Gogh negar Hà Lan, bruk nan oh ka bhian parang iek dalam labaih 60 thun tapa. Blah thaik binguk hu ba tabiak to yaom di New York, Mỹ di bilan anak tal, kuhria tui jien labaih 180 trieu dola My. Hu cih tavak di bilan 5 thun 1890, blah thaik hu ngan “ Dom phun dẻ chroh bingu” hu taong yam lac dom pasang hadah di Van Gogh dom bilan luac umo.

Dom urang ilamo Trung Quoc hu mbang akaok meti padang jak jeng sa harak ban do te bao 3D pagam haong labik saong tukvak, ma-om taong abih rai di phun padai, meng tukvak tamuh tagok tal tuk tabiak bangu saong brei baoh. Danak dak ini pabak halau du lieu roh duah bahrau piah thau cambaih luac jalan cakrok, patagok di phun padai jeng yau duah jalan pasiam asar siam padai. Harak ban do ini peih tabiak jalan nao bahrau ka bruk palih ruah pajaih njauk lagaih, piah mek hu nang suat glaong saong tani tanat dalam tukvak katut jang.

Hãng công nghệ Apple  iew dom urang brei cakak trun dom linh kien ka mau iPhone 18 Pro saong iPhone 18 Pro Max birau tabiak rai, kayua  jien chip tagok glong saong bruk tagok yaom  pablei ba tal urang takik blei pandar. Dom kong ty  kong nghe  daok kham  merat  blei chip  birau  saong chip tavak piah duh pak dom pasak du lieu tri tue nhan tao ( AI), ba tal kurang saong tagok yaom. Bruk nan meda ngak takik urang blei mac tinh saong samart phone dalam thun ini./.