Tui Mentri Ilamo, Pahat padhih saong Jirah rivang Viet Nam 24/11 pagam haong Harei Gul pataom dom bangsa dalam negar 18/11, brei hu dom danak dak naih gheih yau ye: Nyaom biai Ilamo dalam negar di bilan 11/2026; Danak dak adaoh tamia karei crih ngak tui Harei Ilamo Viet Nam; Labik parang iek nghe thuat saong patagok ilamo Viet Nam dalam tukvak ba drei tame; Danak dak “Sap yava Viet Nam 2026”; Adit phin salam uan Lien hoan Phim Dunya Ha Noi mbang ka 8 saong Harei Ilamo Viet Nam; pathau khan Nen tang Harak Ban do Ilamo Viet Nam…

Di Gilang Khik piah drap ar Quan khu 9 daok parang iek kadha “ 80 thun khang kajap ala hala daok Dang hadah krah”. Parang iek tal bhap bini dom harak gal, thaik binguk saong kaya drap ar biak gheih ghang brei mboh dom bruk praong dalam luac danak 80 thun dak padang, mesruh metak saong patagok di Cục Chính trị saong Ngành Chính trị LLVT Quân khu 9, pambuak haong dom bruk patagok di LLVT Quân khu saong jayak di bruk ngak cach mạng di bhum Pei negar.

Tinh Vinh Long jhul khang pambuak, patagok dom kaya jirah rivang hu angan je, rilo meng lac jirah jalan tapen kraong, piah dui pachreih dui pachreih tuai damuai dunya saong patagok jien tame dalam dom bilan puac thun. Quý 4, tinh caik kham merat raok veik labaih 1,3 trieu mbang tuai damuai, tapa nan kham merat luac thun duh labaih 6,2 trieu mbang tuai damuai. Piah mek hu jalan ngak ini, Vinh Long patagok dom kaya ndap nda hu angan yau jirah rivang sinh thai, drap ar ilamo Khmer, jirah rivang ngak nong, gam haong nan peih praong janih ngak bahrau yau jirah jalan tapen kraong, jirah nyaom biai, danak dak saong kinh te malam.

So Y te TPHCM birau langyah du lieu duk iek prein yawa taong abih bhap bini, brei mboh labaih 51% urang umo 60 tagok hu ruak darah tagok. So Y te brei caik hatai, du lieu brei mboh ruak dahlau dalam rup, dut iek darak dalam rup saong pasang iek ruak camareip yau nan ye oh njauk thei jeng mboh ruak njauk abih. Dom urang darah tagok brei dut iek tui tacei ba. Tapa bruk nan, gah y te TPHCM duah mboh ruak aval, tui iek saong khik iek urang ruak tagok darah dalam bhap bini.

Raya kacah limo Bảy Núi, An Giang thun ini hu dui pachreih yaok ribau mbang rahra, tuai damuai dalam saong langiu negar mai rivang iek, daong prein, daong khik ramik saong patagok ilamo bhap bini di bangsa Khmer Meraong Negar dalam bingun raya adat Sene Dolta. Bruk kuhria hu luac abih, yau limo ka 23 di ong Nguyễn Thành Tài, xa Núi Cấm, mek hu yai Glaong abih. Dalam harei raya, Gah padang peih ngak daok peih dom danak dak ilamo; yaih khan kaya OCOP, kaya nong, kaya mbang saong dom kaya hu angan di bhum palei, daong yaih khan kein lagaih jirah rivang di tinh.

Tapa mbaok 76 anek saih, urang siam binai Jihan Mohin Dimack mai meng Tanzania jeng Urang siam binai Hoa binh Dunya - Miss Grand International 2026. Lambaok Viet Nam -  Emoura Phạm taduan angan Á hậu dhi 4. Dalam pakacah javap calei piah duah tabiak angan je glong abih, hu sa panuac tangi sua yau gauk top 5 “ Tui ayut, sa urang kumei siam hatai salut mbut njauk brei hu dom kadha yau halei?”, Jihan Mohin Dimack iek praong hatai anit ranam, mek maik ngak kareih camin bac megru. Anai lac “ Urang kumei salut mbut brei thau sangka  daong ka urang karei, thau iek praong kein lagaih di urang karei dahlau rup drei saong dui ba tui hatai ranam”…

Ai Cập bahrau pathau khan salah blaoh bruk pakajap thaik cih biak gheih abap ka II “Blah thaik cih vil di dua adei sa-ai” danei angan. Ini lac kein lagaih hu makna piah srap gap ba blah thaik cih ini tapa parang di Italia di puac thun ini. “Blah thaik cih di dua adei sa-ai” hu dom urang ilamo taong yaom lac biak kan si hu meng thaik vil gheih karei saong cih dua urang, salih ka bruk tok sa urang yau bhian. Thaik cih hu ngak meng bruk srau tapung sambo hoang raling pandiak jeng ia.

Mai tal Thu lũng Lamen glai di tinh Vân Nam, Trung Quốc, tuai damuai hu mboh sa kaya piah alin biak gheih karei: so siphau, buu thiep, nam cham pambuak pagam tu la-ar saong dom kaya ngak meng khak lamen. Bruk nan daong pandar veik meng dom hagait di lamen. Yaok drei lamen  praong mbang labaih 200 kilo kaya mbang yaok harei, ralo meng gar, hala saong dhar phun meda, min ralai tok 45%. Yau nan ye,  khak lamen hu rilo kanjiak xơ ngak jeng ba-ar./.