Dalam thun 2026 -2027, Mentri Pato megru pok tagok Thu tuong Rajaei dom sarak brei mesre phun jien ka anek saih, sinh vien. Dalam nan, pataom tame langyah dom bruk daok tavak cuang kandah; dom bruk brei langyah yau ye: pabak jien brei mesre tagok 10 trieu dong sa bilan sa urang bac; kuhria brei mek jien laba 4,8 % sa thun; tui nan ngak salah sarak tukvak mesre, pagol tukvak bayar sre ka urang gaok kan kandah hadei bac tamat blaoh.

UBND tinh Ca Mau peih bruk uan raok “ Harei Ilimo Viet Nam( 24/11) saong Festival hadang Cà Mau – Mbang ka 2 thun 2026" di puac bilan 11 ini. Kuhria jien peih ngak danak dak labaih 31 ti dong. Dalam dom bruk ngak piah uan raok Harei Ilimo Viet Nam yaih khan ilimo di bhap bini 3 bangsa Kinh - Khmer - Hoa diukrai di Ca Mau. Di Festival hadang kham merat jhul khang bruk ngak hadang tui jalan sinh thái, pandar kong nghe glong saong lagaih langik salih karei.

Di mbang nyaom HĐND tinh Dak Lak mbang XI peih ngak di page ini, dom urang lambaok vakil ba tabiak pasang iek daong 100% jien blei BHYT ka urang umo meng 60 thun tagok tal 75 thun oh ka hu BHYT. Tui nan, Dak Lak kuhria daong BHYT ka labaih 83.700 urang umo taha, kuhria  jien labaih 114 ti dong yaok thun.

UBND phuong Vị Tân, ban Cần Thơ birau padang Labik thông minh di Bhum 4. Ini lac bruk ngak camereip di bana raya hu ngak piah ba kong nghe so mai jaik jang haong bhap bini, duh ka bruk khik iek, ramik pasiam saong paglong raidiuk di bhap bini. Tukvak anak tal phuong Vị Tân dak harei dak ba tame ngak tui kong nghe di Sang ilimo pak ini; brei pandar wife oh mek jien, mac vi tinh, may in saong dom mac jamraih karei, ba mbuan lagaih ka bhap bini duah khaw tin, pandar jitvu so saong daong tuk hu bruk.

To hop vòm thép atah 187 m, glong labaih 20 m, trak 3.400 tấn hu pagam tatua nao tapa kraong Sai Gon hu jak jeng siam mekre di page ini. Tatua  ndih kreh tatua Ba Son saong lubang tapa kraong Sài Gòn, pambuak jalan Tôn Đức Thắng haong jalan Nguyễn Thiện Thành. Thaik binguk “ hala la-u ia” di vòm pathei thép bhian randap haong bhum kraong ia Meraong negar. Bruk pagam salah, danak dak hu brei ka urang nao tabak di kreh pasak ban raya saong Thủ Thiêm, rik tame  peih praong labik tapen kraong Ban Gon.

Jabat chuc nang Singapore khan lac dom mbang pachot pagat pandar yaih khan ngak ja di angaok mang xa hoi ba tala bhap bini taneh ia ini lahik jaik 800.000 dola Mỹ. Meng thun 2019, khat lahik kayua pachot pagat di Singapore yam tapa labaih 3 ti USD. Ta-eng 6 bilan mbiah tal ini, hu labaih 321 trieu USD. Dalam nan, urang umo meng 65 thun tagok  meblah hu labaih 14% kuhria taong abih urang, kuhria khat lahik ralo dalam dom nyaom umo.

Meng akok thun 2025 mbiah tal ini, Mỹ mek veik labaih 300.000 thị thực. Bruk chap mek veik daok jhul pakhang  dalam tuk karja Tong thong Donald Trump daok pakhang bruk khik iek urang negar langiu tame saong patrauk  urang negar langiu tabiak piah khik brei salamat. Mỹ jeng hu peih ngak dom jalan tagok jien mek tame di dom janih harak gar di urang ngak.

Thái Lan brei thau hu 6  inem takai patau di gah Pur Barak negar ini,  lac takai di khủng long mbang rilo atah 6,3 met, daok atah di ini 120 trieu thun. Dom jabat chuc nang di taneh ia ini pambuak haong dom jabat  chuc nang  peih ngak dom bruk pacang khik labik hu inem takai nan. Langiu di nan, Thái Lan daok pasang iek labik ini jeng labik piah roh duah, pato megru saong yulit./.