Urak ni hu yaok rituh ribau urang ngak dok veik oh nao palei mbang Tết

Di mbang nyaom tapak haong mBan tacei pato pacang caga jit TPHCM mesup (8/2), Akaok Mintri Y tế Nguyễn Thanh Long hu panuac caong ban raya pasang iek brei pandar Sarak 16 di Thủ tướng di dom labik dalam tuk jit pambak tabiak bhap bini ngan haong 29 urang, dalam nan hu 24 urang mboh yau njom blaoh. Urak ini Quận 1 brei pacang labik 168 Nguyễn Cư Trinh, 245 Nguyễn Trãi hu 775 sang gam haong 3.500 menuac saong brei dut iek 3.500 mẫu. Quận Bình Thạnh mesup ini brei pruh jru pametai anek ruak, pacang labik 5 urang daok di 2 phường 28 saong 21. Dom quận: Gò Vấp, Bình Tân, Quận 12…jeng brei pacang veik dom urang pambuak tal menuac mboh yau njom ruak.

Tui Tổng Liên đoàn lao động Việt Nam, urak ni hu yaok rituh ribau urang ngak dok veik oh nao palei mbang Tết, abih di nyu nan lac di gah merong. Kayua jit Covid-19 dok rah tabiak srau kadau song mbuan pambak samar, Tổng Liên đoàn Lao động Việt Nam hu panuac ieu dom pakat công đoàn peih bruk nao ravang, brei pandap tal tangin urang ngak dalam doanh nghiệp, labik sang trọ, oh daok peih bruk pataom rilo gauk. Tui kuhria tong abih pok jien dong ka urang ngak dalam tuk Tết lac labaih 500 tỷ đồng.

LĐLĐ tỉnh Bình Dương brei padeih dom radaih pajeng urang ngak nao palei mbang Tết saong danak dak Tết taom gauk. Piah khik kajap quyền lợi di đoàn viên, dom pok pandap daong hu ba tal labik piah alin brei. Bình Dương urak ini hu 18.000 urang ngak gaok kan kandah daok veik mbang Tết, tỉnh hu daong 500 rabau đồng sa urang gam haong pandap mbang Tết. Daok 4.000 urang ngak hu alin hadiah harak radaih, Công đoàn hu daong yaok urang 500 rabau đồng saong hu dom jalan daong patui di nan.

Harei ni (8/2), UBND tỉnh Bình Phước hu harak drah samar ka bruk oh peih bruk palao thun klak, taduan raok thun bahrau anek sak kubao 2021 song oh cuh phao bingu. Jalan bingu xuân, Harei pataom bingu xuân daok hu peih ngak min ngak sit, oh pataom rilo menuac. Daok dom jalan bingu xuân, kayua jit ruak nan ye oh hu dom bruk yau: labik parang tapuk, parang main alat ragam meng kan, ảo thuật, chat tamia, xiếc, múa rối…. Bruk pakacah Lân - Sư - Rồng tỉnh Bình Phước mbang ka 2 thun 2021 brei padeih tal tuk halei hu panuac khan bahrau.

Jabat pasang iek, duah thau di Mintri Công an bahrau khởi tố bị can, cap kreik ong Nguyễn Minh Khải, Yam ndok Sang iek ruak meta TP.HCM haong 1 Phaok yam ndok, saong 2 urang karei piah duah thau dom bruk ngak suan pambuak tal bruk tagok yaom thủy tinh thể nhân tạo. Dahlau di nan, gah duah thau hu pasang iek Sang iek ruak meta TP.HCM, pataom mek hu rilo harak gar pambuak tal bruk ngak suan nan.

Hãng tin Reuters harei ni brei thau, karja Tổng thống Mỹ Joe Biden hu tame veik Kapul quyền anek menuac di Liên Hợp Quốc, 3 thun hadei di tuk Tong thong dahlau deih lac Đô-nan Trăm tabiak truh kapul ni. Bruk Mỹ tame veik Kapul quyền anek menuac di Liên Hợp Quốc lac jalan ngak siam piah salih bahrau song patagok bruk pacang veik bạo quyền song bất công di dunya. Thun 2018, karja di Tổng thống dahlau deih lac Đô-nan Trăm tabiak truh Kapul quyền anek menuac di Liên Hợp Quốc song panuac lac trak gah I-xra-en song kurang salih bahrau.

Tui CNN, bruk akaok Mintri Pablei salih Hàn Quốc Yoo Myung-hee tabiak truh bruk pakacah tame ngak Tổng giám đốc Gah pablei salih dunya (WTO) hu peih tabiak jalan ka amuk Ngozi Okonjo-Iweala, dahlau daih ngak kaaok mintri Jien padai Nigeria, jeng urang kumei TGĐ lac urang châu Phi camereip abih di WTO. Amuk Okonjo-Iweala dahlau daih hu 25 thun ngak bruk di Gilang pariak dunya. Amuk jeng lac Chủ tịch Gavi, kapul daong parabha vaccine Covid-19 di dunya saong bahrau abih tukvak ngak bruk di bilan 12/2020.

Jabat ngak nong ngak ikan song khik ramik di Đặc khu hành chính Hồng Kông (Trung Quốc) brei thau hu gac sa janih ruak meng sa var ro pabui karei dalam sa trang trại di bhum Yuen Long dut iek mboh dương tính song virus ba tal ruak tả pabui châu Phi. Dahlau di nan, jeng hu duah mboh sa mẫu dương tính meng trang trại ni. Anak tal, Hồng Công brei am cuh labaih 590 drei pabui; saong daok brei padeih bruk pajeng ba pabui di dom trang trại rong glang pagam tal 3 trang trại pabui karei dalam labaih 3km/.

Urang lang: M. Phương – Hani Pha – 08/02 15:55:55