Di harei Sanecar, harei Adit yaok adit, tal mon 8 tuk page lac dom adei sit daok di palei Năm Chánh gilac ieu gauk, tangin pan talak, tangin pan ragam ragu kanyi ba gauk nao tal sang ong Trần Sóc piah bac ragu ragam. Tal bac hu peih di baoh sang haong dom paban kik, ragam ragu hu ramik dak tani tanat, tapak talei. Tal urak ini, dom adei ta-eng daok tame njauk labik di drei. Dom sap yava akaok meti sameng tagok jeng lac tuk ngak ka khol dahlak hulin mboh hu hatai chreih takre di dom adei, halai gam haong hatai tian pato di gru, ngak jeng sa bruk bac megru biak chreih chrai, bui sambai saong anit ranam di tal bac karei ini. Ong Trần Sóc brei thau:

“Yau hu thau blaoh, meng sit mai dahlak hulin hu mboh ragu ragam Khmer paje, meng kal adat lakhah di halei jeng hu. Kayua nan, dahlak hulin huac hadei ini nyu kurang nan dahlak hulin meng duah jalan piah khik veik. Tuk nan dahlak hulin sahaneng yaom lac hu kan kandah yau halei jeng brei ngak ka hu.”

Majam ragu ragam talei lac janih ragu ragam bhap bini bangsa Khmer Meraong Negar. Janih ragam ragu ini jeng hu pagam kajap haong raidiuk ilamo, hatai di bhap bini Khmer saong tuk halei jeng hu me-in dalam harei raya, harei Tet, lakhah caga.

Kayua huac kanda dom janih ragu ragam bangsa mbuan kurang dalam raidiuk bahrau urak ini, ong Trần Sóc, oh huac kanda kan kandah, pataom saong pato ka dom adei dalam phum soc. Ong tacei pato yaok ragam ragu, yaok ine sap yava, yaok kadha adaoh meng dom mbang akaok meti daok rilo bruk karei. Ong Trần Sóc brei thau:

“Meng akaok meti baHrau piah brei bac me-in kanyi min, hadei di nan drei meng maong iek adei halei hadah krah ka ragam ragu halei ye brei rabha tui yaok ragam ragu, pagap yau adei halei hadah krah ka me-in Khưm ye rabha tapa nan, adei halei me-in kanyi ye ba tapa tal bac kanyi. Tuk pasram, drei jeng caik hatai tal bruk chreih takre, tangin me-in ragam ragu di dom adei iek hu lagaih halei oh piah mbeik pasiam veik ka njauk, nan ka meng me-in haong gauk hu. Kan lac kan di tuk akaok meti nan min.”

Oh ngak duh hatai gru pato, dom adei sit pabam hu hatai chreih takre sap ragu ragam urang bangsa. Ragu ragam bhap bini bangsa kayua dom adei me-in pang oh ka biak gheih dom min mboh biak dui pachreih piah pang. Adei Lâm Thiện Tâm brei thau:

“Meng akaok meti adei bac me-in kanyi adei jeng oh ka thau hagait, urak ini adei jeng me-in hu rilo kadha paje. Adei mboh biak bui sambai saong brei kham merat bac veik. Dalam dom harei lahei tukvak, adei gam haong dom ayut cuai sahabat pagun gauk tabiak me-in me-in haong gauk, piah hadei ini me-in haong gauk gheih bingi jang.”

Meda ndom meyai lac, rai rah sit thun umo yau dom adei lac dom asar ameh dalam bruk khik ramik saong patagok ragam ragu siam gheih di bhap bini bangsa Khmer. Dom kadha ragu dom adei bac megru ieu lac yau ye baoh gilang drap ar ilamo di mukkei caik mai. Dom drap ar banrik nan biak hu yaom kaom tuk hu urang patui ngak veik. Caong khin lac, tui hatai chreih takre rilo jang dalam bruk khik ramik saong patagok ragu ragam siam gheih di ilamo bangsa Khmer dalam harei hadei./.