Tapa bruk duah thau, Kong an xa Lệ Thủy hu mboh sa-ai Nguyễn Thị D. (1991) dan saong sa-ai Phạm Thị Hồng D. (1981) hu mbaok tame bruk ngak agama hu ngan “Kapul nyaom thánh Đức Chúa Trời Mẹ”. Harei 4-8, Kong an xa hu daa 2 bhol ini mai ngak bruk. Tapa ngak bruk, sa-ai Nguyễn Thị D. saong sa-ai Phạm Thị Hồng D. brei thau, kayua oh thau rilo adat hukum, kurang bruk kadha yau nan ye njauk tui panuac meyaih khan, jak ba di dom urang daok pak atah mai. Hadei di pathau khan, langyah, 2 urang ini hu thau cambaih jang ka dom adat hukum, halar hatian mboh tangin tame harak brei padeih bruk hu mbaok tame ngak agama, oh pang tui dom bruk pathau khan jak ba, katung dui suan adat hukum saong bruk ngak njauk siam tui adat hukum.

Dahlau di nan, Kong an tinh Quang Tri, hu mesruh matak, ngak brei cambaih “Kapul nyaom thánh Đức Chúa Trời Mẹ” kayua urang angan Nguyễn Duy Cường (ndih tapui thun 1991, palei daok di Bắc Ninh) pal akaok, peih ngak bruk pathau khan pambak prong bruk ngak yang mabang mê tín dị đoan, piah duah mek kein laba dalam tinh Quang Tri.

Kapul nyaom “Hội thánh Đức Chúa Trời Mẹ” kayua Nguyễn Duy Cường pal akaok, peih ngak di Quang Tri tui jalan ngak parabha pakat ngan haong dom labik dang yau: urang katung dui, urang dang akaok kapul nyaom, urang dang akaok labik. Kapul nyaom ini peih ngak tui jalan ngak biak kandauk, hu bruk tacei pato di “akaok kapul nyaom” daok di negar langiu, pandar rilo jalan ngak piah taom gaik, duah thau saong pal hu hatai saneng di bhap bani. Njauk caik hatai, dom urang ini pamong tame dom urang laman lamuac, urang kamei, urang gaik kan kandah piah katung dui tame kapul nyaom.

Jalan katung dui hu peih ngak tui rilo jalan yau: ngak krein randap, mek hatung hatian, duah thau ka jien bilan mek tame di urang, mbang angui daok dang di urang dalam sang, meng ba ba tabiak jalan ngak piah taobg tame hatai saneng. Tuk hu manuac urang jia tui, ye dom urang nan duah jalan ngak karung karang talei rohim dalam baoh sang nan, ngak brei patagok bruk pambak tame kapul nyaom. Hu dom bruk ngak adat cambat di kapul nyaom nan oh hu siam, mboh ngak tui jalan me tin di đoan, gaok mai daok pachreih dom “tin ndo” tah klak adat kakuh paling amuk akei, ngak carac mbaih talei rohim dalam baoh sang.

Sa di dalam dom bruk ngak njauk brei caik hatai caga nan hu lac bruk pandar mek rik daong jien padai. Akaok mereip, urang hu mbaok tame tok thau “ngak adat” pagap yau, min hadei di nan mek rik daong 1/10 jien duah hu dalam yaok bilan. Bruk ngak di kapul nyaom biak kandauk, pandar mang xa hoi, pandar ndom biai nao mai oh brei ka thei thau piah tacei ba, gam haong nan peih ngak tui jalan ngak rilo pakat, yaok urrang hu jeng sa “meta pambuak” katung dui urrang bahrau.

Jabat Kong an brei panuac lac, “Kapul nyaom thánh Đức Chúa Trời Mẹ” oh ka hu brei adat peih ngak di Viet Nam, oh hu dom talei pajaih Tin Lanh harat chinh thong taduan brei angan, hu mboh pathau khan dom asal kadha kanjah jhak, oh hu ilamu, ngak oh siam tal rai diuk di bol bhap rahra.

Dang Anak bruk yau nan, Kong an tinh Quang Tri kakei bhap bani njauk paglaong akaok saneng anak dom panuac daa “pachreih hatai”, “lang yah kan kandah dalam rai diuk”. Bhap bani njauk juai hu mbaok dalam dom mbang pataom biai, bac megru “giao ly” tuk oh ka thau cambaih laih asal di kapul nyaom nan; juai pabak brei thong tin rup drei yau mbang angui dalam baoh sang, jien padai duah mek hu yaok bilan, taka phone. Taphia di nan, tuk duah mboh medil hu bruk bleik saleik, njauk pathau khan brei ka manuac urrang dalam sang, karja puk palei atau jabat  karja thau piah samar hu jalan daong veih./.