Lac urang dang tapak hu mbang tui dom kein lagaih di bruk ngak ini, ong Điểu Ma Lơn daok di palei Bù Khơn oh pandauk hu hatai chreih chrai bui sambai di drei tuk ndem mayai ka dom salih bahrau biak siam lagaih dalam bruk langyah dom adat ngak harak gal jabat di bhum palei. Meng di tuk Pasak pabak hanh chinh kong xa ba tame ngak, bruk ngak harak gar hu mbuan lagaih jang biak rilo, tuk hu langyah chip di pakat xa, oh daok njauk nao atah tal pakat huyen yau dahlau diah. Thau lac mikva bangsa ilamo daok biar ka gah ngak kong yau nan ye pato tacei cambaih, tani tanat meng yaok bruk meng bruk mbuan tal bruk kan, meng bruk bah mah mã, buh angan khau tin tal bruk ngak salah harak gar. Jalan ngak bahrau ini, mikva mboh sahanang hatai sang.

Meng dom panuac ndem mayai siam di mikva hu brei mboh bruk ngak harak gal hanh chinh kong daok nao njauk jalan saong hu brei mboh kein lagaih di bhum labik tapen negar. Bruk salih bahrau oh daok di adat, jamraik blaoh daok hu makna di abih lac hatai pabak ka mikva di dom urang jakar, urang pan bruk kong chuc.

Ong La Văn Dũng daok di palei Bù Khơn chreih chrai bui sambai ndem mayai lac: ngak harak gar di pasak xa urak ini mboh biak siam lagaih ka mikva. Dom urang jakar ngak biak samar oh daok cang suai, dom urang jakar jeng ndem mayai saong mikva bui sambai jang, abih hatai pato tacei, nan ye thei jeng bui sambai chreih chrai saong hu hatai caong maong kanja patui veik khik tani tanat, pabak ka mikva dak harei dak siam jang.

Urak ini, taong abih tih dom urang jakar, urang pan bruk kong chuc ngak bruk di Pasak pabak harak karja hanh chinh kong di xã Đăk Ơ hu rami ramik jamraik komputer, jamraik in, jamraik scan, ramik mạng internet nduac samar gam saong jamraik mek otomatik, màn hình pasang iek khau tin daong ka mikva, doanh nghiep mai tal ngak harak gar hu mbuan lagaih.

Amuk Hoàng Thị Hải Yến hu 9 thun ngak Akaok palei 9, xã Đăk Ơ nan ye thau cambaih dom cuang kandah, dom glaih glar di mikva tuk nao ngak harak gar. Tui amuk Yến, meng di tuk peih ngak karja bhum palei dua pakat hu ba tame pandar, hu mboh salih bahrau cambaih laih saong biak njauk pok mayaom di abih lac pabak hatai brei ka mikva di dom urang jakar pak di labik "sa pabah mbang". Bruk uan raok, tacei pato biak bui sambai ka mikva di dom urang jakar ngak ka mikva oh daok kanda, mikva mboh sahanang hatai jang saong biak thau dhar phol biak praong di mikva bhum tapen negar. Min bruk ngak hu tuk jeng daok suai. Kayua yau nan ye, amuk Yến gam saong rahra bhum palei biak caong maong ngak katut veik masa tukvak langyah harak gar dalam harei atau tapa harei adei piah ka bruk salih bahrau harak gar hu siam lagaih jang.

Hu padang tabiak ngak meng bruk dalam xa hu lagaih 40% rahra lac mikva bangsa, ilamo pambuak saong kong nghe jeng daok bier, Pasak hu caga dahlau bruk batabiak jalan padang ngak dom kalup kapul pak di labik saong nao tal yaok puk palei. Ngan saong bruk pambuak di Kalup kapul dam dara saong dom urang ranaih hu ilamo, thau cambaih kong nghe, dom kalup kapul ini hu pataom prein tame “par tangin pato bruk”, pato tacei mikva pathau khan, peih ngak jit vu kong online luac jalan. Ngan saong dom urang hu ilamo bier, urang jakar dalam xa nao tal yaok puk palei taduan harak gar, pato tacei ka jalen ngak harak gar, adat daong ka mikva hu pambuak saong bhian randap saong bruk ngak di komputer.

Pasak pabak ngak harak gal hanh chinh kong dalam xa tapen negar Đắk Ơ daok dak harei dak patagok dom yaom glaong kein lagaih. Tui jalan ngak lac mek rahra ngak hatai pasak, bruk pambuak pagam, abih hatai di dom urang jakar nan lac jalan piah taoh talaih dom cuang kandah di kong nghe, ba bruk salih laik paka ba tame bruk raidiuk saong dak padang ngak harak gar pak bhum tapen negar dak harei dak siam lagaih, cambaih laih jang./.