Tui Thieu tuong Lê Xuân Minh, Akaok Jabat An ninh mang saong Pacang caga kol bleik pandar ilamo jammariak ngak kong pakat glaong (A05), Mentri Kong an, Phaok Akaok Kapul An ninh mang pakat Negar, “klaik mek cap tui online” lac bruk kan kandah bahrau, tuk kol duas pandar ilamo kong nghe piah plue urang, kateik geik urang cakak klaoh bruk pambuak haong baoh sang, piah ndok jien atau pablei urang. Khat lahik jien padai meda tagok tal yaok ty dong, oh kuhria dom kan kandah glo akaok dui suai atah. Dalam bruk nan, Lien minh Hatai Je lek taka So hu peih ngak saong ba tui Jalan “Oh Sa Drei” gam haong kadha “Gam gauk karo salamat online” jak ba prein khang bhap bini piah pacang khik uranaih saong dam dara di angaok rayak mang”.

Jalan “Oh Sa Drei” mek hu bruk daong dom gilang pariak saong dom mon majam lek taka so yau ye TikTok, Meta, Google gam haong rilo kapul pacang khik rup uranaih dalam saong langiu negar. Meng harei 6/10 tal 30/11, rilo danak dak bac pasram ilamo salamat karo online brei peih ngak di dom labik sang bac dalam 34 tinh, ban daong anek saih, sinh vien brei thau saong langyah bruk kan kandah angaok mang, gam haong nan patagok bruk pambuak amaik ame – sang bac – anek saih dalam bruk pacang khik salamat karo lek taka so.

Jalan “Oh Sa Drei” lac labik ieu da-a yaok urang, baoh sang, sang bac kapul saong gah ngak mbang pablei salih jum tangin pacang khik uranaih saong dam dara, padang sa bhap bini pagam pambuak, anit ranam saong salamat di angaok mang, labik oh hu thei gaok kan kandah sa drei.

Dalam jalan “OH SA DREI”, Lien minh Hatai Je lek taka So hu ba tabiak 10 paka Dam dara uranaih brei thau piah khik kajap salamat karo online, dalam nan hu:

1. Pacang khik khau tin ta-eng menuac urang drei: Oh brei lek taka phone ka, labik daok, lek taka CCCD tagok angaok online mang xa hoi

2. Caga haong urang karei: Oh cuak ayut, oh javap calei harak meng urang drei oh thau krein. Brei pasang iek angan ka tantu tani tanat.

3. Khik kandauk lac bruk brei mboh bhong meraih: Meyah hu thei pandar khik kandauk, yaom lac haong amaik ame atau ayut cuai jaik taphia, ini lac bruk brei mboh ka kanja jhak.

4. Plaih caga link/zoom drei oh krein: Oh click tame link atau ba drei tame Zoom tapa panuac da-a meng urang drei oh krein. Kong an polih OH ngak bruk tapa Zoom

5. Oh ngak tui dom panuac pandar jhak: Patruh oh thaot binguk, thaot video drei, hu thaik thaot oh lagaih. Meyah hu payua blaoh? Brei cakak bruk payua harak atau taong phone di nyu blaoh khan haong urang dalam sang.

6. Juai ngak mblo khau tin tapa thaik: Oh ba tagok thaik, livestream brei thau labik daok, sang bac.

7. Pambuak haong baoh sang, ayut cuai: Cuak ayut angaok mang haong amaik ame saong khan samar tuk gaok tin nhan oh krein.

8. Juai huac: Meyah taduan hu gham, brei ngak suai gilac, thaot binguk mek inum saong sua tangi urang praong.

9. Oh mek ndap nda urang alin, oh gaok karei: Oh tok pandap alin meng urang oh krein. Meyah gaok urang thau tapa mang, brei padaong haong urang praong.

10. Pathau khan brei ka drah ka samar meyah drei oh tantu medil: Cakak anagn tai khoan oh krein saong pathau khan samar, gam haong nan taong phone hotline 111 (Tong dai Negar Paacang khik uranaih) atau khan brei thau haong kong an piah hu daong./.