Malam kabroi 23/8, labaih 40.000 urang hu mbaok tame danak dak seni chinh luan “Negar dalam haratai” di labik Vạn Phúc City saong yaok ribau urang maong iek tapa man hinh praong di jalan nao tabak takai Nguyễn Huệ, Ban raya Ho Chi Minh pambuak ngak bruk, pamaong tal pahadar 81 thun Harei Negar 2/9. Concert Negar dalam hatai mbang ini hu 3 banah: “Negar sa talei”; “Sambo bhong hadah mbaok meta” saong “Negar dalam hatai”. Danak dak taduan hu biak rilo bruk maong iek di urang.

Akaok UB Bhap bini tinh Dong Thap bahrau mbaoh tangin brei 16 xa, phuong lac xa Salamat labik dalam jaman mesuh metak taong Prang saong taong My. Rahra di dom xa, phuong salamat labik hu mbang tui dom sarak brei laba di Karja yau pabak kat BHYT saong mbang tui dom kein lagaih pasang iek ruak, taong ruak tui adat di hukum ka BHYT. Ini lac sa dalam sarak lagaih piah pahadar, sangka raidiuk rahra di dom labik hu rik daong hu makna ka kat mang dalam jaman mesuh metak.

Mbang pasang iek danak dak buh jien tame padang danak dak jalan mbak saong gah ngak nong ban raya Can Tho brei thau, Danak dak buh jien tame padang jalan peih samar Chau Doc – Can Tho – Soc Trang tukvak 1 tal ini mek hu labaih 61% tukvak ngak tui harak pambuak bruk. Hadei tuk gaok kan kandah ka pandap tamo, rilo meng lac cuah saong patau, dom labik daok pataom tame jak ba gah pabak, parilo mac jamraik, kaya ndap nda, urang ngak bruk saong peih bruk padang rilo piah dil samu tukvak ngak, khik kajap jalan ngak tui Sarak di Quoc hoi.

Harei kabroi 23/8, Kapul Urang kamei Ban raya HCM pambuak peih ngak Harei raya “Rahra Ban raya HCM jum tangin padang ban raya hijao – hacih, siam mekre alam langik”. Dalam danak dak, rahra hu ba drei tame danak dak “Tapen ia ribaong hijao”, rivang iek saong klah rabha ilamo khik ramik bruk hacih sa-at rah tui ar kraong; pandar ilamo ky thuat ka tathuak ia, pahacih sa-at alam langik; hu mbaok tame dom tadai salih hareik mek kaya, tacei ba neh rabha hareik di halau…

Tinh Vinh Long hu peih bruk ramik, peih ngak gilac majam sang bac tui pato tacei di Mentri Pato Megru. Tapa nan, dalam tinh hu patrun labaih 53% dom sang bac. Dom bhum palei dalam tinh daok samar drah pasiam bruk karja, tani tanat kapul ngak bruk, srap gap dom kein lagaih njauk hu, srap gap ka thun bac bahrau, khik kajap dom bruk pato saong bac tui pato tacei.

Kapul Bao an Lien hop quoc bahrau peih bruk buh harak pasamg iek mbang ka dua ngan haong dom ung cu vien ka bruk Tong Thu ky Lien hop quoc pok bruk ngak ka ong Antonio Guterres. Ini lac bruk buh harak phieu oh ka njauk ngak biak di nyu saong hu ngak kandauk piah taong yaom tanut daong di 15 negar dalam Bao an ngan haong yaok urang ung cu vien. Bruk buh harak phieu oh hu brei pathau khan.

Nyaom roya Pahat Padhih Robot thaik menuac dunya mbang ka dua hu peih pakak di Sang padhih Tachak băng samar pakat negar di Bac Kinh, ngan haong bruk hu mbaok di 2.000 robot mai meng 16 negar. Dom robot thaik menuac me-in phling ragam pambuak majam phling hlai ragam anek menuac me-in dom kadha adaoh tamia peih camreip. Yaok ribau robot hadei nan hu daong menuac ngak dom bruk salih kapul saong parang iek, brei mboh bruk pambuak lagaih di menuac saong robot.

Mentri Y te Campuchia bahrau ba tabiak kakei caga samar chip ka bruk parilo dom urang njauk ruak tangin takai pabah, njauk ndom tal lac di kapul uranaih di 5 thun. Dom bruk brei mboh rilo abih di ruak dalam nan hu: Pandiak rup, kan kandah ngak pandik dalam pabah saong rah tabiak dom inem ndaih baoh, gandung bhong di palak tangin, takai, taok… Mentri Y te Campuchia ieu rahra hu mbaok tame ngak dom bruk caga ruak tapa dom kenh di jabat chuc nang.