Đặc xá lac sa jalan ngak hu makna praong di gah chính trị, xã hội

Akaok negar Nguyễn Xuân Phúc brei patabiak Sarak ka bruk đặc xá di tuk pahadar 77 thun Harei negar 2/9, Kapul langyah bruk đặc xá hu padang tagok saong Thủ tướng Rajaei jeng hu harak pato tacei bruk peih ngak sarak di Akaok negar. Akaok negar taong yaom bruk ngak di Kapul langyah đặc xá, abih di nyu nan lac gah Công an dalam bruk peih ngak bruk ini. Akaok negar ndom lac, đặc xá lac sa jalan ngak hu makna praong di gah chính trị, xã hội, brei mboh bruk khoan hồng đặc biệt di Đảng, Kanja. Peih ngak Hukum Đặc xá thun 2007, akaok negar hu 7 mbang brei đặc xá di tuk pahadar harei lễ praong, abih tih hu đặc xá ka labaih 87 ribau phạm nhân.

Beir 3/8, Ủy viên Trung ương Đảng, Tổng Yam ndok rayo sap ndom VN (VOV) Đỗ Tiến Sỹ hu taom gaok dom akaok kapul hu mbaok di harei pataom papar sap pakat negar mbang ka 15 di ban raya .HCM.Brei panuac di var taom gaok, Tổng Yam ndok VOV ndom lac, hadei di tuk tabung glong jit ruak COVID-19, harei pataom papar sap pakat negar mbang ka 15 palih ruah angan “Sami samar salih bahrau- Lagaih piah yam tagok” lac hu rilo makna. Angan ni, jeng dok brei mboh cambaih dom kham merat di dom urang ngak papar sap dalam bruk peih ngak sami samar dom sarak njauk di rajaei dalam bruk pacang caga jit COVID-19.

Dalam dom harei jaik di ini, tỉnh Cà Mau hu 23 urang njauk ruak Covid-19 bahrau. Dom urang ruak rilo meng lac di dom sruh jit di huyện Thới Bình, Ngọc Hiển saong U Minh. Jaik abih dom urang njauk ruak jeng hu klauk 4 mbang vắc xin, takik di abih jeng hu klauk 2 mbang. Langyah gen meng Viện Pasteur Ban raya Hồ Chí Minh brei thau lac dom biến thể BA.2, BA.1, Delta. Tui taong yaom di gah y tế Cà Mau, dom sruh jit hu bruk njom pabak biak samar saong dom urang njauk ruak dalam tukvak anak tal meda daok tagok glaong.

Di tukvak 5 tuk harei g 4/8, sruh radaih tải trak 15 tấn hu biển số BKS 62C-063.02 kayua urang peih radaih angan Nguyễn Văn Vũ (umo 46 thun , di tỉnh Bến Tre) peih di mangaok jalan nduac samar TP.HCM – Trung Lương, mai gah Miền Tây. Tuk tal Km40+650 di huyện Châu Thành, tỉnh Tiền Giang, sruh radaih tải ni, njauk pui khuah meng gah likuh. Urang peih radaih samar brei radaih pataok tame jalan padeih samar piah pandam pui. Kayua radaih ni, pajeng rilo pandap mbuan khuah, yau nan ye pui mbang khuah khang. Taduan hu panuac khan, gah Cảnh sát pacang khuah pandam khuah (Công an tỉnh Tiền Giang) hu ba 2 sruh radaih pandam khuah song yaok pluh urang jakar , urang lin hu mbaok di pak nan, samar pandam pui. Bruk khuah oh ngak urang halei njauk hagait, min apui mbang ralai abih sruh radaih, khat lahik yaok riuth triệu đồng; gam song nan, bruk nao mai di angaok jalan nduac samar ni njauk gar abih.

Bier harei sup 3/8, di mbang langyah tui hukum bruk cuh metai trùm giang hồ Đào Quốc Liêu, Kapul langyah hu tabiak 2 án tử hình ka Tô Nhựt Khanh saong Trần Trung Thành ka duas pametai manuac. Dom bị cáo daok veik dalam vụ án njauk kaoh meng 2 thun tal 20 thun guk ka dom duas: padauk dom tội phạm, khik piah suan hukum phao ndao quân dụng saong duas oh khan brei thau tội phạm. Kayua mesao gauk meng dahlau, kreih pandiak harei 25/7/2020, di tuk Đào Quốc Liêu daok nao di jalan Roya 1, labik tatua Tân Hương, Tiền Giang gah mai tỉnh Long An ye Tô Nhựt Khanh, Trần Trung Thành, Lê Thanh Phúc mek radaih mac pagui tui. Thành mek phao cuh ong Liêu, ngak ka ong ini metai.

4 taneh ia Nam Mỹ dalam nan hu Uruguay, Argentina, Chile song Paraguay hu mbaok tame bruk pakacah mek quyền dang tabiak peih VCK World Cup 2030. Meyah bruk to yaom hu angan “Juntos 2030” ("Ba gauk 2030") jak jeng, ni meda lac mbang camereip hu 4 taneh ia gam hu dang tabiak peih ngak sa mbang World Cup. Akaok Liên đoàn adat blong Nam Mỹ, Alejandro Dominguez ieu ni lac “bruk ndih lapei di abih châu lục”. 

Cố vấn Tổng thống Ukraine Mykhailo Podolyak harei 3/8 ndom lac, bruk ndem mayai halei jeng brei iek tui bruk Nga padeih cuh phao saong ba lin tabiak. Panuac di ong Podolyak hu ba tabiak hadei di tuk Thủ tướng Đức dahlau deih ong Gerhard Schroeder ndem lac panuac sanya ka bruk pambuak veik pablei tabiak negar langiu ngũ cốc di Ukraine mek hu dalam bilan dahlau meda peih tabiak sa jalan bahrau di gah anak.

Tapa pasang iek song tong yaom bahrau abih di pasak lingik tasik pakat negar Trung Quốc brei thau, kuhria meng akaok hè tal ni , dom harei pandiak glong kuhria rah tapa di taneh ia ni, lac 9,2 harei, rilo jang 3,6 harei, dut song tuk vak ni song dom thun dahlau song rilo di abih kuhria meng di thun 1961. Di dom labik di tỉnh Hà Nam, An Huy, Hồ Bắc, Chiết Giang, Phúc Kiến song Tân Cương dom harei ni pandiak glong tagok tal labaih 30 harie.Pasak ni brei thau, meng di harei 13/6, Trung Quốc mbang camereip hu langik pandiak glong dalam thun, tuk vak ni dui atah , praong rilo labik, khang song kanyah jhak glong./.

Urang lang: Hani Pha & Thu Thảo – 04/08