So Y te TPHCM peih ngak danak dak gru jru salih gauk ngak bruk di dom sang iek ruak mai dom balai y te daok kurang bac si, piah paglong bruk iek ruak, jru ruak di bhum palei, daong bhap bini taduan hu jit vu y te lagaih jang di labik daok. Ong  Tăng Chí Thượng, Yam ndoc Sở Y tế TP.HCM khan lac, bruk ba gru jru meng sang iek ruak mai balai y te oh lac langyah hu bruk kurang gru jru di labik, bo daok pamong tal bruk paglong  ilimo chuyen mon. Bac si salih gauk iek ruak, jru ruak, gam klak rabha ilimo ngak bruk, daong chuyen mon ka urang jakar y te bhum palei saong pambuak  balai y te haong pakat angaok.

Hoi dong Bhap bini tinh Lam Dong brei tapa Sarak njauk hatai ka bruk ramik pasiam labik hành chính di kreh ban Dong Nai saong tinh Lam Dong. Tui nan, bruk ramik taneh Bein pakat negar Cát Tiên hu taneh praong labaih 272 km di tinh Lam Dong mai ban Dong Nai khik iek. Taneh Bein pakat negar Cát Tiên jao ka Ban Dong Nai di taneh praong 5 xã tinh Lam Dong, nan lac: Cát Tiên 2, Cát Tiên 3, Bảo Lâm, Đạ Tẻh saong Đạ Tẻh 3. Hadei ramik pasiam, kuhria abih taneh di tinh Lam Dong daok 23.900 km vuong.

Ngan haong kadha “ Dak Lak - Labik  pataom ralo ilimo siam gheih”, Adit Ilimo Jum pataom taong abih bangsa Dak Lak thun ini peih ngak meng harei 17 tal harei 24/11, di phuong Buôn Ma Thuột. Dalam tukvak ini, bhap bini saong tuai damuai di Dak Lak  hu rivang iek labik prang drap ar ilimo, Harei nyaom pataom Khan bai saong parang iek khan ao di bangsa, Jalan drap ar ilimo caphe, adit phim  saong dom bruk ngak ilimo bac tapuk. Gam haong nan, Harei Jum pataom taong abih bangsa pakat tinh hu peih ngak di harei 18/11 di phuong Ea Kao. Danak dak peih ngak brei hu labik ka bhap bini, tuai damuai taom gaok urang nghe nhan, duah thau saong khik ramik drap ar ilimo. 

Kapol K76 (Mentri Chi huy bollin Ban Dong Nai) duah mboh saong kuac mek atau talang liet si di bein sang urang di palei Thạch Màng, xã Tân Lợi. Atau talang hu papaok 2 tal saong tauk baar nilong kapal pang đinh vin taom dar. Langiu di nan, daok hu dom drap ar gam haong gai vak di urang lin, 1 thong takhaoh, 1 kalaoh Bixilin, sa dang talei yu gam haong kadung nilong buh harak ba-ar.

Di palei Bà Lắm, xã Tân Phú Đông, tỉnh Đồng Tháp birau hu sruh jit ruak kum manuk ada A/H5N6 di taphon ada di sa baoh sang, hu 167  drei ada njom jit ruak. Tal harei 24-10, bhum palei brei ba nao am cuh phn manuk ada. Anak bruk nan, UBND xã Tân Phú Đông tacei ba dom gah chuyen mon pambuak bruk peih ngak, rao hacih var ro saong alam moi truong labik nan, pakhang bruk pathau khan ka bhap bini ngak tui dom jalan pacang caga jit.

Anak bruk dom jit ruak jalan suan yawa kayua athak dhur mun kayua apui khuah glai, karja ban Palangka Raya di Indonesia brei radaih “xe buýt pabak oxy” ka bhap bini. Angaok radaih hu pagam binh oxy saong kapol y te tavak angan urang ruak, daong dom urang gaok kan kandah dalam kurang oxy hu daong labaih 5 tal 10 phut yaok sa mbang. Bhap bini njauk hatai ka bruk ngak ini, kayua nyu daong ka urang taduan hu jit vu y te mbuan jang dut haong dom balai y te.

Bruk ngak ka dom urang umo meng 55 tal 64 thun di Han Quoc yam tapa 70%, glong abih meng dahlau mai tal ini. Yau nan min, tui harak pathau di Gah Hop tac saong Patagok Kinh te (OECD), rilo urang umo taha di Han Quoc salih tapa dom bruk ngak siam lagaih saong jien mek tame biar hadei abih tukvak bruk ngak umo 50 thun. Urang umo meng 66 thun tagok raidiuk kathaot jiak 40%, glong jang dalam khoi OECD. Yaom tagok gam haong dom bruk kurang di jien padeih hưu ba tal urang taha ye daok ngak bruk.

Dua sruh radaih pui ginuh gauk di tinh Toledo, bhum kreh Tây Ban Nha, ba tal labaih 60 urang metai saong labaih 180 urang njauk rambuac. Hadei rah tabiak bruk nan, gah daong padam apui, cảnh sát saong urang y te hu ba mai labik ini. Taong abih dom sang iek ruak kakei tanut bhong brei manuac hu mbaok piah daong. Urak ini, oh ka thau bruk ba tal bala rah tabiak.