Patui danak dak Mbang nyaom ka 2, Quoc hoi mbang 16, ginum biai ka du thai Dom Hukum (pasiam veik), rilo urang lambaok vakil brei kuhria caga tani tanat bruk taong phat tử hình ka duis pablei salih matuy suan hukum. Langyah di var ginum biai, Akaok Mentri Kong an ong Lương Tam Quang ngak brei cambaic laic dom bruk daok sahaneng suh sah di urang njauk brei atah klak atau trun bruk taong phat tử hình ngan haong urang pablei salih matuy. Tui mentri, dom urang nan meda pato padar saong mek bruk ngak piah duh paklah diusa. Yau nan ye, bruk brei kaoh catang abih lac tử hình dom urang nan oh ka biak lagaih.

UBND phuong Long Thành, Ban Dong Nai birau khan brei thau  danak dak bayar jien taneh, daong Danak dak ngak jalan tathuak ia jaik labik mblang kapal ahaok Long Thành mbang ka 1. Mbang ini  hu 26 urang njauk mek veik taneh jaik 27.000 met vuong, kuhria abih tih bayar tui jien labaih 16 ti dong. Dahlau di nan, UBND phuong Long Thành 4 mbang, kuhria tui jien labaih 80 ti dong. 

Meng akaok thun tal ini hu labaih 110 baoh sang urang bangsa takik di xã Phước Vinh, tỉnh Tây Ninh hu mesre phun jien di Gilang Sarak xa hoi kuhria abih tih labaih 2,3 ti dong. Langiu di nan, xã hu jao brei phun jien padang mbang ngui ka urang bangsa  hu raidiuk ka kandah; nao rivang, sangka kuhria saong alin pandap nda ka urang bangsa takik; daong phun jien mesre bac megru saong bac bruk ngak gam peih ngak rilo sarak brei patagok kinh te - xa hoi…Tapa nan, rik tame paglong raidiuk saong jalan sahaneng ka urang bangsa takik, paglong bruk hu taduan jitvu xã hội, pakajap bruk jum pataom taong abih bangsa. 

Dom bhum palei di Bhum taneran kraong Cuu Long daok peih ngak rilo jalan brei patrun taphon pabui njom jit ruak pabui chau Phi. Meng akaok thun tal ini, tinh Ca Mau hu 23 sruh jit ruak, ngak kan kandah tal 138 baoh sang raong glang, ba tal labaih 1.660 drei pabui am cuh klak. Tui danak dak, di dom bilan puac thun, bruk ba tal jit ta pabui chau Phi njom mbak di ralo labik. Yau nan ye, urang jakar gah ngak nong daok daong tapak, tacei pato ka dom bhum palei  hu sruh jit ruak oh ka tapa 21 harei.

Dalam 9 bilan tapa, Khu dulich pakat negar Ceik Bà Đen, tỉnh Tây Ninh taduan raok 3,7 trieu mbang tuai damuai, jien mek tame labaih 36 ti dong. Dom bruk ngak ilimo, nghe thuat  yau parang iek alat ragam ngũ âm, tamia hagal Chhay-dăm, adat palao gom saong adat Kaya nong karei krih bingi, kaya OCOP rik daong yaih khan, pok meyaom ilimo meng kan  saong parilo bruk rivang iek ka tuai damuai. Meng nan, pachreih urang mai rivang iek dom labik mekre di tinh Tay Ninh.

Thái Lan chap khik labaih 3 tấn bla lamen saong dom kaya di athur glai kuhria tui jien labaih 4,6 trieu USD dalam sa mbang pablei salih suan hukum tapa negar. Dom kaya kan nan padauk kandauk dalam dom kapal kayau, pajeng meng Zambia tapa Thái Lan payua mai negar ka 3. Urang jakar mboh lac kapol nyaom blei athur glai dauk.

Nga saong Ukraine brei padeih cuh di ban medil Oleshky kayua  Nga khik iek, di gah meraong Ukraine, piah ba mbuan lagaih pajeng kaya daong saong ba bhap bini tabiak truh labik kurang kaya mbang saong jru tavao. Bruk ginum biai padeih cuh rah tabiak dalam tuk mesruh metak Nga - Ukraine daok rah tabiak, brei mboh dom gah pambuak bruk ngak pahala.

Nyaom raya Lien hop quoc brei langyah saong buh phieu ka du thao sarak “ Njauk brei padeih  bruk pakauk kinh te, pablei salih saong jien padai kayua Mỹ ba tabiak ka Cuba”. Ini lac mbang ka 34 bruk hu ba tabiak ginum biai di Nyaom raya Lien hop quoc. Ngoại trưởng Cuba ndem puac Mỹ ngak suan hukum dunya tapa dom jalan ngak kinh te saong pacang khik xang menyek. Hukum pakauk di My ngan haong Cuba dui atah labaih 60 thun./.