Ban raya Ho Chi Minh brei hu 3 labik cuh phao bangu glaong di Harei Negar 2/9, hu papar binguk tapak dalam nan hu: Jalan labang kraong Sai Gon, Bein bangu pasak Ban bahrau (phuong Binh Duong), Mblang bein pasak Bãi Sau (phuong Vung Tau). Langiu di nan daok 1 labik cuh phao bangu biar di bein bangu Ilamo Đầm Sen. Bingun ini Ban raya jeng peih rilo danak dak yau ye parang thaik thaot, peih bruk nao rivang kubo liet si, cuh gilau nyang pok bangu.

UBND tinh Vinh Long likau Mentri Jien padai kuhria iek dom bruk pok tagok Thu tuong brei pasang iek pabak phun jien daong ka tinh peih ngak dom gah vaktu 2026-2030  ngan haong labaih 66.000 ti dong. Dalam nan, peih ngak 18 danak dak hu makna, brei ngak drah samar, abih di nyu lac dom danak dak patagok jalan mbak siam mekre, dom danak dak pacang glut jaleih ar kraong, pacang bruk langik salih karei saong 9 danak dak hu makna pambuak, salah hu pambuak sumu gauk jalan mbak, kraong ribaong…

Dalam tuk rilo yaom athur raong trun biar ye yaom pabe mek raloaw di Bhun taneran kraong Cuu Long daok di tanut glaong. Urak ini, pabe mek rilo pablei di var hu yaom meng 150.000 - 160.000 dong/kg. Ngan haong tanut yaom ini, yaok kg pabe urang raong glang hu laba labaih 50% dut haong jien buh tame. Jaik ini, bruk raong pabe mek ralaow patagok khang di bhum taneran kraong Cuu Long rilo meng lac di tinh Dong Thap, Vinh Long, Ca Mau. Rilo urang raong pabe tui jalan meteh ngak kong, bahrau pandar hareik saong kaya mbang kong nghiep ka pabe mbang.

Rilo po bein pala durian di xã Kim Long, TPHCM (dahlau diah ini lac xã Láng Lớn, tỉnh Ba Ria - Vũng Tàu) daok tame bilan yuak, suai jang yaok thun meng 1 bilan tal 1 bilan meteh. Yaom durian trun min rilo po bein daok hu laba labaih. Mbiah tal ini, di tinh Ba Ria - Vung Tau hu 5 ma taka so bhum pala durian pablei ka negar Trung Quoc. Dom jabat chuc nang daok daong ka urang ngak nong, HTX padang ngak dom ma taka so labik pala phun durian piah pablei ka negar langiu hu tani tanat, patagok jien mek tame ka mikva.

Pandiak tabiak darah di ban raya Can Tho daok rah tabiak biah njauk duh hatai. Meng akaok bilan 8 tal ini dalam ban raya hu labaih 1.500 urang njauk ruak pandiak tabiak darah. Anak bruk mbuan tamuh jit ruak meda tamuh pambak praong, Akaok UB Bhap bini ban raya Can Tho bahrau pandar dom jabat hu pambuak, dom bhum palei pataom tame peih dom asal kadha hu makna piah oh luai ka jit ruak tamuh. Abih di nyu nan lac bhum palei brei ciuk bruk anak Akaok UB Bhap bini ka bruk pacang caga jit ruak pandiak tabiak darah dalam bhum…

Gah khik salamat negar Thai Lan chap mek 500 kilo matuy patau kuhria hu labaih 60 trieu Baht dalam mbang pagui chap mek catang. Dua urang chap mek hu khan lac urang bayar 80.000 Baht  ka yaok mbang pajeng ba. Ini lac sa dalam dom bruk pablei salih ma tuy praong abih di Thai Lan dalam thun ini, tapa nan brei mboh dom jalan pablei salih dauk tapa rilo negar daok ngak bruk catang saong kan duah mboh.

Ha vien An Do bahrau brei tapa Hulum Pasang iek kadha me-in online thun 2025. Ini hu maong yau lac sa bruk mbaoh tangin hu daong salih karei, pagun sanya brei salih taong abih he sinh thai kadha me-in online di An Do. Hukum brei adat pakauk taong abih dom kadha me-in online mbang jien. Langiu di nan, hukum jeng ba tabiak jalan ngak pacang khik urang me-in - abih di nyu nan lac dam dara saong kapul urang mbuan gaok kan kandah - anak dom bruk kan kandah ka dalam rahra.

Taneh ia Bỉ khik catang bruk tame negar ini, tui nan urang khin taduan urang di baoh sang drei tapa Bỉ brei ngak duah jien tame hu takik abih lac 110% jien bilan, gam hu 10% jien pabak ka yaok urang dalam baoh sang hu nao tui. Langiu di nan, urang dang tabiak taduan raok nao labik daok lagaih haong bao hiem y te ginup. Tui yaok kuhria, dom harak likau thi thuc pataom haong baoh sang parilo tagok meng thun 2024 ngan haong 60.000 urang hu brei harak gar daok veik mbang camereip piah hu mai pataom haong baoh sang urang./.