Meng ini tal thun 2030, Ban raya HCM brei salah blaoh bruk panduan 41.540 baoh sang tapen kraong, ribaong, peih 115 danak dak pasiam ban medin hu phun jien kuhria jaik 397 ty dong. Ini lac Danak dak pasiam ban medin labik sang daok saong tapen kraong, ribaong tukvak thun 2025 – 2030 bo So Padang Ban raya HCM. Dom danak dak ini pataom tame padang ar pacang, jalan mbak rah ribaong saong mậm ha tang ky thuat samu gauk. Kayua rilo baoh sang tapen ribaong barat oh hu ginup kein lagaih bayar ka taneh kayua lih mek, Ban raya kuhria pandar bruk karei di drei, pandar sang daok rahra piah ramik caga labik daok karei.

Mbiah tal ini, dalam tinh Dong Thap peih bruk dut iek prein yawa, oh mek jien ka labaih 2,5 trieu bhap bini, hu jiak 76% bhap bini. Dong Thap kham merat taong abih bhap bini hu dut iek prein yawa takik abih sa mbang dalam thun 2026. Yau nan min, bruk peih ngak daok gaok rilo kan kandah. Hu takik bhap bini sahaneng oh ginup ka bruk dut iek prein yawa, iek ruak; urang umo taha, urang jaoh jo gaok kan kandah dalam bruk nao mai.

Kuhria hu 704 labik pato megru patrun, pambuak jaik 1.400 akaok sang bac, phaok akaok di Ban raya HCM saong labaih 2.000 labik bruk ngak hadei ramik sang bac. Urak ini dalam ban raya kurang jaik 1.000 labik bruk hu ilamo, hadei pagam brei jak ba, ramik ka njauk lagaih. Gam haong nan, anak meta brei padeih palih ruah ka thun bac bahrau.

Thun bac 2026 -2027, Sang bac Pho thong Bangsa gam bac gam daok tinh Lam Dong (labik tinh Binh Thuan klak) kuhria mboh dahlau hu 950 anek saih, dom adei gam bac gam daok. Tui bruk padang sang bac birau, yaok duk bilik ndik daok brei 4 anek saih, trun meteh dut haong dahlau diah. Yau nan min, daok 10 harei tra meng tame thun bac birau, min di mblang sang bac, dom tal bac, labik ndik daok di anek saih, labik mbang huak daok rilo pambuk patau kayau…Gru Lương Đào Quốc Dũng, Akok sang bac khan lac, dom bruk nan kuhria jao bayar di akaok bilan 8. Yau nan min, mbiah tal ini daok tamo ah-mah.

Danak dak Vanh ndai 4 Ban raya HCM tapa Tay Ninh hu bayar labaih 90% mbaok taneh hu peih paha. Min, daok 811 urang oh ka mek jien, rilo meng lac kayua tavak caga labik daok, ndom meyai ka taneh riya, drap ar, meraik saong harak gal hukum. Ong Nguyễn Minh Hùng, Yam ndok Pasak Patagok taneh riya tinh Tay Ninh, brei thau bruk rahra oh ka samu gauk taduan jien bayar, jao taneh, Pasak Patagok taneh riya brei pambuak haong bhum palei patui veik jak ba.

Bol bala Han Quoc khan brei thau Trieu Tien birau cuh takik abih lac sa ten lua đạn đạo meng bhum Wonsan, tapen tathik Esar kaoh pulao Triều Tiên. Tui Hoi dong Tham mưu akaok Liên quân Hàn Quốc, negar ini daok pakhang bruk tui iek saong tuk halei jeng kuhria caga blaoh blai, tui nan pambuak Mỹ saong Nhat Ban tui iek  bruk rah tabiak. Ini lac bruk cuh birau abih di Triều Tiên hadei taneh ia ini cuh 1 ten luan dan ndao katut tame tatik di adit dahlau. Bruk rah tabiak dalam tuk Han Quoc saong My kuhria pasram kalin yaok thun rah tabiak di adit anak.

Canh sat Han Quoc bahrau taong tayah sa jalan talei kol duas praong, pandar dom blah web khieu dam saong patabiak asal kadha ngak kanjah jhak tal uranaih, uranaih si jeng dam jeng dara piah dui pachreih urang pandar saong salih tapa dom blah web me-in mbia online, mek laba suan hukum yaok pluh ty won. 2 urang medil njauk duas lac urang likei 40 thun, dang bruk ngak di Philippines saong sa urang 36 thun, tien si ky thuat mac tinh, ciuk bruk patagok, pasang iek, pasiam saong pandar majam blah web.

Hajan hangin daok ngak kan kandah ralo ka dom dothi di chau A. Di Mumbai, An Do hajan praong ngak glut jaleih di ralo labik jaik ban raya, ba tal ceik jaleih trun, kateik 3 baoh sang. Takik abih 6 urang metai; 4 urang karei njauk rambuac. Dalam tuk nan Manila di Philippines, hadei rilo harei hangin hajan, hareik pandar yaok harei di dom jalan saong dom labik mbuan ia dauk. Ban ine Manila bhian dang anak bruk ini tuk hangin, hajan meng bikan 6 tal bilan 9./.