UBMT Negar Viet Nam Ban raya HCM peih tal pasram ngak iek Danak dak pabak ilamo lek taka so thun 2026 di xa Bình Lợi. Ini lac tal akaok meti dalam majam 16 tal bac kuhria peih ngak di rilo labik dalam Ban raya. Asal kadha danak dak, duah thau dom caong khin lagaih dalam raidiuk rahra daong rahra mbuan lagaih tuk pandar dom jitvu karja online, nen tang taka so saong thau ka nyu, plaih nyaik hu dom bruk chot pagat angaok mang. Danak dak jeng piah caga prein taka so ka kapul urang jakar di labik, brei kein lagaih piah tapak daong rahra hu mbaok tame dom jalan salih taka so di Ban raya.

Meng phun jien mesre saong bruk pato bruk ngak, labaih 97% urang ngak di bhum urang bangsa takik  di Dong Nai hu bruk ngak. Labaih 3.600 dam dara urang bangsa takik taduan hu phun jien daong duah bruk ngak, duah jien tame. Yau nan min, tui ong Điểu Điều, Akaok Mban bangsa  HĐND Ban Dong Nai rilo urang ngak bruk oh tani tanat. Yau nan ye, hu dom jalan ngak lagaih jang dalam tukvak anak tal. 

UB Bhap bini tinh Dak Lak gam haong po buh jien tame saong gah kong thuong, ndien luc peih pakak Kapul sang mac ndien angin kong suat 200 MW. Ini lac danak dak ndien angin hu phun jien buh tame meng langiu negar (FDI) praong abih tinh, hu taong abih phun jien buh tame labaih 7.850 ty dong. Bruk kapul 4 sang mac ndien angin hu ba tame pandar oh lac daong pabak ndien ka majam ndien pakat negar blaoh daok brei bruk ngak ka labaih 50 urang di bhum palei, daong labaih 100 ty dong yaok thun ka kadung jien.

Bol lin duah, pataom atau talang liet si (Kapol K74) di Bộ Tư lệnh TP.HCM patui bruk peih praong bruk duah pataom labik ka 2, Khu B, Bein bingu Lê Thị Riêng, duah hu 18 atau talang liet si gam 12 kaya kan. Mbiah tal ini, hadei jaik dua bilan duah pataom atau talaNg liet si di Bein bingu Lê Thị Riêng tagok tal 311 atau talang liet si, dalam nan hu 179 kaya kan. Bruk duah, pataom daok hu dom bol lin peih ngak, caong khin duah hu veik dom liet si daok di labik ini mai haong baoh sang  di urang.

Tanut ia di dom kraong, ribaong barat di tinh Vinh Long kuhria tagok glaong tui mbang ia ndik akaok bilan 7 saka ia bulan pambuak ia sua di halau angaok. Ia ndik glaong abih kuhria rah tabiak di balai Mỹ Thuận, tanut ia meda hu tal 180cm, jaik tanut kakei ka 3. Balai Dut iek Langik tasik Kraong ribaong tinh Vinh Long pachreih kakei dom bhum palei labik halau angaok, meng dom xa Tân Phú, Chợ Lách, Cái Nhum, phuong Trà Ôn ba tagok, srap gap pasang iek, pakajap ar pacang; caik glaong kaya kan saong srap gap jalan pacang caga bruk dauk dalam ia, jaleih taneh kayua ia ndik pagam haong ia sua.

Di tinh Gyeongsang Bắc – Hàn Quốc hu labaih 1,5 trieu drei ikan raong, jaik abih lac ikan bơn iku njuk, metai kayau ia tathik pandiak. Tong abih khat lahik tagok tal 1,67 tỷ won (sumu 1,2 triệu USD). Tui Jabat Khi tuong Han Quoc, sa bhum taneh gah Meraong di taneh ia ini pandiak tagok labaih 40 do C. Ia tahik pandiak  kayua langik pandiak dui atah saong ia harei pandiak catang.

Hajan praong saong jaleih taneh patui veik ngak khat lahik di rilo labik di chau Á. Tinh Hà Nam, Trung Quoc hu panduan labaih 65 ribau urang kayua pambuak di hajan praong pambuak ribuk Dolphin. Gam haong nan paglaong bruk kakei caga hajan praong tagok tanut bhong – tanut glaong abih dalam majam kakei caga di Trung Quoc. Di An Do, takik abih yaok pluh urang metai saong gaok bala kayua jaleih taneh.

Urang jakar lien bang Mỹ chap mek hu 11 urang pambuak tame bruk lakhah ja dui atah labaih 10 thun, peih ngak labaih 1.000 mbang lakhah piah daong urang negar langiu hu daok veik ngak pakat the hijao. Dom bhap bini Mỹ  lakhah ja brei bayar labaih 30.000 USD.