Jit ruak di ban raya HCM daok pasang iek hu

Biar harei 7/12, di mbang ginum biai Mban tacei jalan pakat negar ka pacang caga jit Covid-19, Mentri Y tế brei thau urak ini di dom mbang par daong saong taduan raok urang ilamu, urang ngak ky thuat glaong meng negar langiu jeng daok hu dom urang njom ruak birau. Di dom tỉnh taphia negar jeng daok hu dom urang tame negar suan hukum, oh ngak tui bruk brei daok karei, pacang caga Covid-19 tui bruk ba tabiak di karja. Kayua yau nan ye, jit Covid-19 tuk halei jeng mbuan njom tame, dalam tuk puac thun, tuk Tết dương lịch, Tết nguyên đán, bruk nao mai, gilac veik mai negar di bhap bini biak ralo. Dom urang ilamu jeng hu panuac khan lac bruk njom mbak Covid-19 di Ban raya HCM meda rah tabiak di labik karei meyah urang iek lap, oh pacang caga.

Harei 8/12, ong Nguyễn Đức Cường, akaok Sở Y tế Quảng Bình brei thau, tapa dut iek SARS-CoV-2 di urang ruak ka 1291 (dok di palei Liêm Hóa 1, xã Trung Hóa, huyện Minh Hóa, tỉnh Quảng Bình) mboh lac dương tính. Urang ruak ka 1291 meng Romania mai tal mblang kapan haoh Tân Sơn Nhất harei 8/11 song hu brei dok karei di sa labik praong. Hadei di tuk mboh lac dương tính song SARS-CoV-2, urang ruak hu ba tame sang iek ruak dã chiến Củ Chi, ban raya Hồ Chí Minh. Dalam tuk iek ruak, urang ruak hu dut iek rilo mbang mboh âm tính song tabiak sang iek ruak harei 3/12. Hadei di tuk tabiak truh sang iek ruak, urang ruak nao radeih An Bình meng Thành phố Hồ Chí Minh tal Quảng Bình, mong 6 biar harei 4/12. Gah chức năng hu ba urang ruak tame sang iek ruak, brei dok karei song dut iek dom urang F1; khan ka dom puk palei hu urang ruak nao tal piah pasang iek, duah thau dom urang hu taom gaok jiak

Tui pathau khan di bruk tui iek ruak Covid-19 di Ban raya HCM, jit ruak di ban raya daok pasang iek hu. Langiu 33 urang njom ruak daok hu taong ruak, tapa hu 6 harei blaoh, ban raya oh hu urang njom birau dalam bhap bini. Bruk tui iek kapol urang peih kapal haoh di dom mbang par dunya hu daok veik di ban raya, jabat chức năng hu mek mâu dut iek 10.632 mbang urang, dalam nan hu 19 urang dương tính. Pasak pasang iek jit ruak Ban raya HCM jeng hu peih praong bruk dut iek dom kapol urang mbuan njom mbak glaong saong brei urang tame negar daok karei, urang brei daok karei di dom tỉnh, ban karei mai daok di ban raya. Urak ini, ban raya brei daok karei 2.185 urang saong daok karei di sang lac 3.251 urang.

Mesup ni (8/12), di Hà Nội rah tabiak nyaom biai “bruk di anak meta song jalan ngak ka bruk dong ka urang njauk tong paoh dalam bhap bini bangsa takik ”. Bruk ni kayua kapul CARE dunya daok di Việt Nam (Kapul pahla pacang eik lipa dunya song dong samar drah) hong Viện patagok pren yava bhap bini hadah tanyah – LIGHT pambuak song mạng lưới GBVNet peih ngak. Nyaom biai lac tuk piah ka dom kapul nyaom, menuac urang dok ngak bruk song sangka tal bruk ni meda ndom biai nao mai haong dom urang padang sarak, jang yau batabiak dom panuac piah mboh cambaih jang bruk di sarak song bruk kurang labik dong ka urang njauk tong paoh dalam bhap bini bangsa takik di Việt Nam. Tapa nan, meda dong ka urang njauk tong paoh dalam bhap bini bangsa takik hu siam lagaih jang.

Page ini 8/12, Công an phường Lái Thiêu, ban sit Thuận An, tỉnh Bình Dương brei thau, hu duah thau cambaic ka panuac khan, ka thaot binguk sa uranaih kumei njauk urang chap mek di phường daok hu ba tagok rilo angaok mạng xa hoi, ngak brei menuac sia suh sah nan lac bruk oh biak. Dahlau di nan, melam harei 7/12, angaok mạng xa hoi, hu ba tagok bruk lac, caong abih gauk daong, klak rabha piah duah 1 uraniah kumei angan Lê Mỹ Linh ndih tapui thun 2017 njauk sa urang likei dam chap mek di phường Lái Thiêu. Tapa nan daok hu blah thaot binguk ranaih kumei saong harak brei thau ka urang medil lac chap mek, gam phone di cong an phường piah khan brei thau meyah mboh. Sa-ai H amaik di adei kumei dalam thaot binguk lac njauk urang chap mek brei thau, sang daok di ĐăkLăk oh njauk di Bình Dương saong anek di sa-ai daok di sang oh thei chap mek. Sa-ai H ngak harak pathau tagok Công an tỉnh Đăk Lăk ka bruk mek thaot binguk anek kumei sa-ai ba tagok mạng ndem meyai oh njauk.

Đại hội đồng Liên Hiệp Quốc (LHQ) harei 7-12 hu brei tapa sarak camereip ka bruk padang Harei dunya caga pacang jit ruak di harei 27-12 yaok thun. Ni lac sarak camereip di Đại hội đồng LHQ dalam bruk ni, jeng lac sarak camereip abih kayua Việt Nam dang akaok ba tabiak, ginum biai song jhul patagok tapa jak jeng di Đại hội đồng LHQ. Sarak ieu tong abih dom negar dalam LHQ, dom kapul nyaom di LHQ, dom kapul nyaom dunya song dom kapul nyaom lingiu rajaei, dom viện roh duah, dom menuac urang song dom urang pagam tal karei karei padahar harei dunya caga pacang jit ruak yaok thun piah patagok hatai sahneng ka bruk pacang caga jit, meng nan hu bruk kuhria caga song pambuak bruk siam jang ka bruk ni di tong abih dom pakat.

Rajei Đài Loan (Trung Quốc) birau taong phạt sa urang likei Philippines 3.500 USD kayua ngak suan bruk brei daok karei dalam 8 giây. Urang likei nan lac urang ngak mai meng negar langiu, eng drei daok karei di sa khách sạn di Ban Cao Hùng. Tapa camera tui iek, dom urang di khách sạn mboh urang likei ini tabiak truh bilik saong dang anak pabah mbang bilik dalam 8 giây. Hadei di nan, urang iew phone ka jabat y tế saong jabat ini taong phạt urang likei ini 3.500 USD. Tui adat brei daok karei di Đài Loan, urang dalam tuk daok karei oh brei tabiak truh bilik daok, oh lac suai atau drah.

Tui panuac khan di rajaei Japon harei ni, bruk patagok abih pandap dalam negar (GDP) dalam quý 3/2020 lac 22,9%, glong jang 1,5% dut song kuhria tuk camereip. Ni lac mbang camereip dalam 4 quý tapa, kinh tế Japon hu tagok veik. Urak ni rajaei Japon hu ba tabiak 2 pok jien pachreih kinh tế hu yaom abih tih tagok tal 230 ribau tỷ yên (samu 2 ribau 2 rituh tỷ đô la Mỹ) piah dui tagok veik bruk kinh tế dok gaok kan kandah kayua jit ruak praong. Mboh lac rajaei Japon meda brei tapa pok jien pachreih ba patui di nan hu yaom labaih 73 ribau tỷ yên dalam mbang ginum biai harei ni (8/12). Tui kuhria mboh dahlau Japon njauk lahik rilo thun tra meng meda ba GDP mai veik hu tanut pataogk yau dahlau di tuk rah tabiak jit ruak praong./.

Urang lang: Ái Nghiêm – Hani Pha – 08/12 15:27:14