Akaok negar Cộng hòa xã hội chủ nghĩa Việt Nam hu pok brei "Huân chương Chiến công hạng Nhất"

Tổng liên đoàn lao động (LĐLĐ) Việt Nam hu harak payua tal LĐLĐ dom tinh, ban; công đoàn gah T.Ư saong gah samu nan, công đoàn dom tổng công ty di Tổng LĐLĐ Việt Nam ka bruk pambuak gauk jhul samar peih ngak sarak daong jien pah sang ka urang ngak. Tal urak ini jeng daok 29 tinh, ban ka oh peih brei paok jien daong. Rilo labik peih brei hu biak takik yau ye: Ninh Bình, Nghệ An, Quảng Nam, Quảng Ngãi, Bình Định, An Giang, bahrau ngak hu mala 1%. Hu dom labik tuk camriep kuhria daong biak rilo urang ngak, min tal urak ini dom urang ngak taduan hu jien daong jeng daok biak bier, yau ye Quảng Ninh, Hải Phòng, Bắc Ninh, Bà Rịa - Vũng Tàu, Kiên Giang.

Biar harei ini (5/8), ndam matai 3 urang Cảnh sát pacang khuah padam khuah, daong urang gaok bala, lac Đặng Anh Quân; Đỗ Đức Việt haong Nguyễn Đình Phúc ndih trun tuk nao padam khuah di quán karaoke tuk biar harei 1/8 hu peih tabiak dalam praong prang di Nhà tang lễ Quốc gia  tui adat di gah Công an Bhap bini. Piah pok meyaom saong thau dhar phor bruk var klaak rup drei di 3 liệt sỹ nan, dahlau di nan, akaok negar Cộng hòa xã hội chủ nghĩa Việt Nam hu pok brei "Huân chương Chiến công hạng Nhất"; Thủ tướng Rajaei pok brei Bằng "Tổ quốc ghi công"; Akaok Mintri Công an brei tagok cấp bậc hàm ka 3 urang metai nan.

Hu mbaok di Harei Pataom papar sap pakat negar mbang ka 15 thun 2022, Rayo papar sap – papar binguk Bình Thuận hu ba mai danak dak “yam tabiak pambuak haong tasik” ngan haong kadha “mai meng tasik”. Danak dak khan ka dalikan ka 15 urang taong ikan Phan Thiết tabiak tasik di sruh gilai BTh 97874TS min tok daok 9 urang mai veik hadei di 12 harei daok di kreih tasik. Sa dalikan biak drut drui ka bruk diuk-metai biak jaik gauk, bruk kỳ diệu saong hatai khang di dom urang taong ikan Bình Thuận ngak ka urang pang, urang iek mboh biak drut drui. Yaok urang taong ikan di sruh gilai taong ikan thei jeng lac menuac ngak tabiak jien raong sang. Jeng thau lac bruk nao tasik biak kan kandah, mbuan metai lahik, min dom urang taong ikan jeng daok khang hatai khik caga tasik pulao palei negar, khik ramik ilamu meng kan di dalam sang.

Sở jalan mbak pajeng ba TP.HCM bahrau hu harak brei thau ka bruk ramik veik bruk nao mai di mangaok jalan Nguyễn Huệ (Quận 1) dalam mesup harei 6/8 piah duh ka Festival Nhà Thiếu nhi pakat negar mbang ka VII – thun 2022.  Tui nan, meng mon 6 tal mon 8 harei 6/8, oh brei radaih peih tame jalan Nguyễn Huệ, meng labik jalan Lê Thánh Tôn tal jalan Tôn Đức Thắng. Sở Jalan mbak pajeng ba TP jeng hu tacei tabiak dom jalan  piah nao tal jalan Lê Thánh Tôn haong Tôn Đức Thắng.

UBND tỉnh Tiền Giang hu khan brei thau yaom dịch vụ pandar jalan radaih di danak dak buh jien tame padang danak dak jalan cao tốc Trung Lương- Mỹ Thuận (tukvak 1) tui jalan hợp đồng BOT. Tui nan, dom sruh radaih buýt pajeng tuai hu yaom bier abih lac 2.000 đồng sa km sa mbang nao. Tanut glaong abih lac radaih tải trak meng 18 tấn tagok, radaih pajeng pandap panda meng container 40 feet yaom 6.500 đồng sa km sa mbang nao (samu 334.000 đồng). Tanut yaom ini hu trun rilo dut saong tanut bo doanh nghiệp danak ba tabiak dahlau di nan.

Tui Mintri Y tế Lào, kuhria meng akaok thun tal ini, taneh ia ini hu labaih 14.600 urang njauk ruak pandiak tabiak darah, dalam nan hu 16 urang metai. Kuhria ta-eng dalam jaik 1 bilan tapa, dom urang njauk ruak pandiak tabiak darah di  taneh ia ini rilo jang jaik 2 mbang. Ban ine Vientiane hu urang njauk ruak glaong abih dalam taneh ia, lac labaih 7.500 urang ruak saong 5 urang metai .. Gah Y tế dunya (WHO) brei thau, ruak pandiak tabiak darah lac sa dalam dom ruak tamuh samar di abih saong lac sa dalam dom ruak njaom mbak samar, urang ruak rilo meng mboh di Thái Lan, Lào, Philippines, Singapore..

Urang ruak đậu mùa khỉ camriep hu mboh di Australia di bilan 5 meng blaoh, min tal urak ini dalam taneh ia ini hu 58 urang njauk ruak. Anak bruk dom urang ruak meda daok tagok dalam tukvak anak tal, rajaei Australia hu peih bruk ginum biai piah blei 450 ribau mbang vắc-xin ruak đậu mùa khỉ rai ka 3 di công ty Bavarian Nordic.

Hadei di tuk mai tal Đài Loan, harei 3/8, Chủ tịch Hạ viện Mỹ Nancy Pelosi hu nao tal Hàn Quốc tui bruk mai ravang châu Á. Jeng dalam harei nan, Tổng cục Hải quan Trung Quốc brei thau lac Trung Quốc brei padeih blei tame dom janih baoh kayau hu pasiu yau kruac bung, kruac aik, cam saong ikan hố ướp lạnh, ikan sòng đông lạnh meng Đài Loan. Mintri Pablei salih Trung Quốc jeng brei thau bruk padeih pablei cuah tapa Đài Loan./.

Urang lang: Thu Thao & M. Phuong – 05/08