Tal tukvak ni, dom bhum palei hu ngak blaoh saong barau padak padang labaih 88.000 baoh sang ka manuac hu prein daong taneih ia meng dahlau, baoh sang kathaot, jaik kathaot dalam nagar; dalam nan hu jaik 28.000 baoh sang di Danak dak brei oh daok baoh sang taik tahak hu padak padang haong ngak blaoh. Tukvak puac thun min dom tinh jak ba abih gah phun jien, prein manuac piah daong ka dom baoh sang kathaot, jaik kathaot hu sang barau piah raok Tet Nguyen dan, ngan haong panuac pandar suai abih lac harei 20/1 mikva hu sang barau piah daok. Meng ini tal abih thun 2025, dalam nagar daok jaik 226.000 baoh sang taik tahak caong khin padak padang, pasiam veik.

Mbo Chi huy bol lin tỉnh Kiên Giang birau jao 3 baoh Sang Ayut bol lin di xã Phú Lợi, huyện Giang Thành. Baoh sang hu padang ngak khang kajap, angaok taneh di baoh sang hu blaoh, praong pak meta 90 met, tabung sang tauk ton, ala sang thauk kriak bingu, kuhria abih jien labaih 150 trieu dong. Dalam nan, Kadung jien padang ngak Sang Ayut bol lin di Mbo Chi huy bol lin tỉnh daong 50 trieu dong, jien daok veik kayua dom baoh sang rik tame ngak.

Ban Can Tho barau peih ngak dom bruk Tet Bol lin-Bhap bini thun 2025 ngan haong kadha “Bol lin-Bhap bini Can Tho bui sambai raok Tet, pahadar 80 thun Harei padak padang Bol lin Bhap bini Viet Nam”. Tet Bol lin - Bhap bini thun ni bhum palei hu maong iek glaong di bruk bayar dhar phol, tani tanat rai diuk dalam nagar tapa bruk iek ruak, paphat jru oh mek jien, alin hadiah ka dom baoh sang sarak karja, baoh sang gaok kan kandah; alin paok jien bac ka dom adei bac krah. Ngan haong nan lac padak padang baoh sang Anit ranam, baoh sang Gul Pataom, baoh sang Gauk yut. Peih ngak saong veih glaong dom jalan mbak nao mai, padang talei ndien, gom manyek; caik camera pasang iek bhum palei…

Tet akaok padai birau atau daok iew lac Tet Nhôbrêhê hu meng lavik rai, lac harei tet hu makna praong, pambuak pagam haong bruk ngak padai kalon padai puh di urang bangsa Raglai, K’ho huyen Bắc Bình, tỉnh Bình Thuận. Thun ini, langik oh hu lagaih, yuak padai, jaoh tangei oh hu ralo, min pablei hu yaom jien tani tanat. Padai pambu thu yaom 7.500 đồng sa kilo, tangei  6.000 đồng sa kilo. Langiu di nan, dom sở, dom gah, mat tran, kapol nyaom saong huyen Bắc Bình hu padang kapol urang jakar nao rivang, alin pandap ka mikva, abih di nyu nan lac daong kuhria ka dom baoh sang kathaot, baoh sang dalam sarak karja hu yau nan mikva uan raok tet hu ginup tri sir.

Di tinh Soc Trang, njom ia mbak dak harei dak tagok glaong saong kuhria mboh dahlau di tukvak anak tal, njom ia mbak daok srau dau biak trak. Urakni njom ia mbak dalam 4‰ di kraong Mỹ Thanh ndih dalam meng 32 - 37km, di kraong Hậu dalam meng 34 - 39km. Piah pacang caga hu kanjah jhak kayua tua riya, njom ia mbak, tinh Soc Trang pachreih mikva pala drak padai đông xuân tui harei bilan kuyua gah jabat hu ilimo ba tabiak. Oh pala drak padai Đông Xuân suai lavik di dom bhum daok njom ia mbak, salih tapa pala dom phun katut harei takik pandar ia.

Mentri pathau khan saong ilamo taka so Indonesia khan lac, negar ini hu ba tabiak sarak ka umo thun takik abih ngan haong urang pandar mang xa hoi, nan lac sa bruk piah khik pacang uranaih dalam bruk pandar kong nghe so. Sarak nan hu ba tabiak dahlau “ hukum khik iek catang jang” ka bruk padar mang xa hoi ngan haong uranaih umo. Tui pasang iek di Kapol nyaom dom urang pabak jitvu Internet Indonesia, urang pandar Internet di Indonesia hu jaik 80% di thun 2024. Dalam nan 48% uranaih umo ala 12 thun brei adat pandar  Internet.

Takik abih hu 100 urang matai kayua gal ala taneh ralo bilan dalam tukvak cakac meh suan hukum di sa labang meh klak saoh pak Nam Phi. Daok saneng lac urang matai kayua eik lapa atau oh hu ia manyum. Canh sat daok duah khao tin di dom urang matai hu duah mboh saong dom urang daok diuk hu ba tabiak truh di labang hadei peih praong bruk daong duah manuac meng harei 13/1. Cakac meh suan hukum biak ralo di dom bhum pak Nam Phi.

Tui kuhria mboh di Lien Hop Quoc, hu labaih sa trieu manuac, dalam nan  meteh lac uranaih, urak ini daok brei panduan ba tabiak truh bhum taneh  Ha-i-ti tuk bruk dom kapol nyaom daok mesruh gauk veik bo oh mboh cadu trun. Ini lac mbang kaok meti Ha-i-ti hu mboh urang panduan ba nao kayua taong paoh gauk tagok catang. Tui Gah Di cư Dunya (IOM), dom labik daok pandaok  dak harei dak takik, dalam tuk nan rilo urang gaok kan kandah kayua kurang pandap mbang saong ia hacih./.