Tui Jabat Negar ka bruk patrun kathaot, Viet Nam daok pamaong tal jalan ngak tal puac thun ini tok daok 1% baoh sang kathaot dalam negar, meng bruk peih samu Danak dak Jalan ngak pakat Negar patrun kathaot karo kajap tukvak 2021-2025. Yaom lac ciuk kan kandah di jit COVID-19, bala saong langik salih karei, bruk patrun kathaot jeng mek hu jak jeng, ngan haong baoh sang kathaot kuhria rah tapa trun 1-1,5% yaok thun. Daok baoh sang kathaot bangsa takik trun labaih 3% saong dom huyen kathaot trun 4-5%yaok thun.

TPHCM lac labik diukrai di 53 bangsa takik kuhria abih tih labaih 500 ribau urang, meblah 4,8 % bhap bini ban raya. Hadei tuk pagam tame, ban raya hu 9 xa ngan haong 135 palei, bhum urang bangsa takik. 4 bangsa  hu rilo bhap bini, diukrai lavik abih saong daok pataom ralo lac Lo, Khmer, Cam saong Cho Ro. Kuhria tal bilan 9 thun 2025,  ban raya oh daok baoh sang kathaot saong baoh sang jaik kathaot tui tanut chuan negar. Bruk blei BHYT ka taong abih bhap bini sumu labaih 93% tame puac thun 2024. Rilo danak dak sangka kuhria peih ngak bhian, meng bruk daong paok jien bac, dak padang saong ramik pasiam baoh sang anit ranam kuhria Tet ka bhap bini.

UB Bhap bini tinh Dong Nai daok roh duah ka bruk ieu da-a gah buh jien tame peih ngak danak dak rah rivang maong iek lamein glai, piah hu kein lagaih buh jien tame veik, pasiam thaik thaot karei ka lamein. Min, piah khik kajap gah hukum, UB Bhap bini tinh jao ka dom jabat hu pambuak, dom urang ilmao ka bruk khik ramik dom adat hukum urak ini, kein lagaih thaik thaot labik lamein daok, siam lagaih bruk yau nan dalam saong langiu negar. Dong Nai hu rilo drei lamein glai praong ka 2 dalam negar, labaih 25 – 27 drei, ini lac bruk njauk uan bui brei mboh kapul lamein daok patagok siam.

Dalam tinh Dong Thap hu labaih 5.400 doanh nghiep daok ngak bruk, dalam nan labaih 98% lac doanh nghiep mbiah saong sit. Meng akaok thun tal ini, Dong Thap hu labaih 500 po ngak mbang pablei salih hu padang birau saong 100 doanh nghiep ngak gilac veik. Dong Thap brei cakak trun, takik harak gal karja, ba 100% jitvu karja tui taka so, cambaic laic, bruk ba tabiak saong buh jien tame ngak mbang. Dong Thap brei thau lac bruk ngak mbang di urang hu makna praong saong tuk halei jeng sangka daong ba mbuan lagaih dalam bruk cak rok patagok.

UB Bhap bini tinh Vinh Long bahrau mbaoh tangin Danak dak Buh jien tame padang tatua Đình Khao tui jalan pambuak bruk karja saong ta-eng menuac urang (PPP). Danak dak hu atah 4,3km, tukvak thiet ke 80km/giờ; taong abih tanut buh jien tame labaih 2.850 ty dong. Danak dak tatua Đình Khao lac danak dak hu makna, daong pasiam bruk gar tavak di tapen gilai bha Đình Khao, dui katut tukvak pambuak di Vinh Long haong dom tinh Bhum taneran kraong Cuu Long.

Dom bruk kan kandah di gah kinh te daok ngak parilo urang kathaot di Australia. Tui Hoi dong Jitvu xa hoi Australia, urang kathaot di taneh ia ini hu 12,4% dalam taong abih bhap bini, sumu labaih 3 trieu 200 ribau urang. Dalam nan, dom uranaih sang kathaot lac 16,6%, sumu labaih 750 uranaih. Dalam dom bruk ba tal iek lipa di Australia rilo tagok nan kayua yaom pah sang tagok samar dalam dom thun jiak ini.

Sa janih jru taong ruak ung thu glo kayua dom urang ilamo khoa hoc di Thiên Tân, Trung Quoc patagok hu ngak piah hu mbaok tame ngak iek dahlau di tukvak ka 3, brei mboh janih jru ini daok meda dui atah tukvak diuk veik 50% di dom urang ruak ung thu glo. Gru Chen Yue di Jabat ngak iek pakat negar ka sinh, hóa jru di Dai hoc Nam Khai di Thiên Tân brei thau, ini lac janih jru akaok meti di dunya saong lac janih jru ka dua di Thiên Tân mek hu angan Chỉ định liệu pháp đột phá.

Canh sat Liên bang Brazil chap mek sa labik bhian ngak phao mesruh prang kuhria hu tal 3.500 mbaik yaok thun, piah pablei phao ka dom kol duis di ban Rio de Janeiro. Langiu di nan, jabat karja brei kareik drap ar yaom 40 trieu real, sumu 7 trieu USD di dom urang cakak jien padai saong chap mek abih dom bruk ngak di kon nyu.