Akaok negar Nguyễn Xuân Phúc hu mbaok tame saong jao jai thuong

Dah page 19/5, di Hà Nội, Mintri Khoa học saong Công nghệ pambuak haong Mintri Quốc Phòng peih mbang jao Giải thưởng Hồ Chí Minh ka ilamo saong công nghệ mbang 6 ka dua danak dak đặc biệt gheih di abih dalam gah quân sự, quốc phòng. Akaok negar Nguyễn Xuân Phúc hu mbaok tame saong jao jai thuong. Dua danak dak di gah quân sự, quốc phòng di Tập đoàn Công nghiệp - Viễn thông Quân đội taduan hu Jai thuong Hồ Chí Minh hu pok manyaom di dunya, brei mboh tapa 2 sáng chế dunya ka công nghệ hu brei bằng độc quyền; 8 sáng chế hu brei bằng độc quyền di Việt Nam saong 15 kadha vak angaok mbao hu pathau khan di mbang nyaom biai ilamo dunya hu angan je.

Brei panuac di tuk tabiak bruk “Tết pala phun miat miat hadar dhar phor Wa Hồ” di tuk pahadar 132 thun harei ndih tapui di Wa, ong Võ Văn Hoan Phaok chủ tịch UB bhap bini ban raya HCM brei thau, ban raya jak ba tukvak meng ini tal thun 2025, yaok rahra kham merat pala saong iek glang 1 phun hijao piah ngak ka ban raya hijao, hacih, mekre jang. Ban raya HCM jeng hu danak dak, jalan ngak brei tagok samar phun hijao, mblang bein hijao. Bruk ini hu daong ka harei hadei, ban raya meda lagaih hu haong dom hagait rah tabiak di alam môi trường.

Akaok UBND tỉnh Đồng Tháp Phạm Thiện Nghĩa hu tabiak harak padang Kapul gah pandap caraih Đồng Tháp. Kapul gah pandap caraih Đồng Tháp tabiak rai piah daong ka bruk pala drak, ngak mbang, pambuak darak pasa, paglaong ilamo pablei salih, pambuak jaik haong dom gah phân phối bahrau; padang bruk ngak iek dom talei pambuak di urang nong – doanh nghiep – urang ilamo saong kanja, piah padang ngak saong cak rok patagok darak pasa dalam taneh ia khang kajap, pamaong tal bruk pablei tabiak dom pandap ngak meng caraih. Urak ini, Đồng Tháp hu labaih 600ha pala caraih. Dom pandap ngak meng caraih hu biak rilo janih.

Gah pasang iek saong siam mekre salamat pandap mbang Mỹ (FSIS) di Mintri Ngak nong Mỹ (ieu katut lac USDA) bahrau brei pabak angan 6 sang mac ngak ikan pra di Việt Nam hu adat pablei tapa darak pasar ini. Yau nan, tal harei ini, FSIS hu tacei tabiak angan 19 sang mac ngak ikan pra di Việt Nam hu adat pablei tame Mỹ.

Hadei di mbang jayah 1-0 anak kapul pacacah kumei Myanmar  di mblang Cẩm Phả, kapul kumei pacacah caoh dat blaong Việt Nam daok kham marat piah ngak jeng "hat-trick" mek hu 3 HC ameh SEA Games gam gam. HLV trưởng kapul kumei Việt Nam Mai Đức Chung brei thau, kapul caoh dat blaong di ong dalam tukvak urak ini hu pataom rilo urang rilo umo thun karei gauk saong ong meda pambuak veik dom urang hu ilamo saong prein yava dalam mbang chung kết gaok kapul Thái Lan di melam 21/5. 

Rajaei bahrau di Sri Lanka daok kuhria bruk pablei hãng kapal haoh negar piah pabak dom khat lahik, yau sa binah dalam bruk kham merat tani tanat jien padai di taneh ia dalam tuk srau kadau. Taneh ia bhum Nam Á haong  22 triệu menuac ini, daok rah tapa srau kadau gah kinh tế trak damak di abih kuhria meng thun 1948 kayua kurang ngoại tệ piah blei meng negar langiu tame dom janih pandap caong hu di abih.

Tui pathau khan kayua Hiệp hội ô tô Mỹ (AAA) brei thau, yaom xăng tui kuhria mbang camriep yam tapa tanut 4 dollars yaok gallon, samu jaik 3,8 lít di taong abih 50 bang di Mỹ.  Kuhria tal dah page 18/05 (tui maong di Mỹ), tok hu 11 bang hu yaom xăng 4,1 dollars yaok gallon. Bang California daok dang akaok dalam taneh ia ka yaom xăng glaong, ngan haong tanut tui kuhria 6,05 dollars yaok gallon.

Pasak khik ramik côn trùng Buglife, Negar Anh, bahrau khan brei thau bruk roh duah brei mboh lac, dom côn trùng par - trun jaik 60% dalam oh ka tal 20 thun tapa. Bruk roh duah jeng kuhria mboh dahlau lac, meyah lahik nao dom janih côn trùng thụ phấn, gah ngak nong janih pandap mbang negar Anh meda khat lahik jaik 2 tỷ bảng Anh. Bruk trun takik côn trùng meyah oh dang veik, 8 dalam 10 janih bingu glai di taneh ia ini meda lahik nao. Dalam tuk dom janih cim thau preo meda metai nao meyah oh hu dom côn trùng khang kadang. Roh duah ini brei mboh lac bruk trun biak rilo côn trùng ini meda ngak khut abih hệ sinh thái min jeng meda pasiam veik hu meyah kol drei ba gauk tame ngak./.

Urang lang: Thu Thao – M. Phuong – 20/05